Read Iban Rome 9 Bible Online

Rome 9 - Iban bible

Rome 9

¹Aku bejakuka pasal utai ti bendar dalam Kristus.[42] Aku enda bula. Ati aku ti beresi diiring Roh Kudus lebuh aku besaksi

²madahka penyinu enggau penusah ati aku.

³ Laban manah agi aku kena sumpah lalu diseraraka ari Kristus, ketegal bansa aku empu, ketegal kaban belayan aku empu.

⁴ Sida nya orang Israel, ke diiru nyadi anak Allah Taala, ke bempu mulia, sempekat, ke diberi Adat, diberi hak nyembah Allah Taala, enggau diberi semaya.

⁵Sida nya peturun orang Hebrew ke tebilang nama, ke nyadi aki ini Kristus[43] lebuh Iya nyadi mensia, ke endang Allah Taala ti bekuasa atas semua. Awakka Allah Taala dipuji belama iya. Amin.

⁶ Ukai reti nya semaya Allah Taala udah puntan. Laban ukai semua orang Israel nya orang Israel ti bendar.

⁷ Lalu ukai semua peturun Abraham nya peturun Abraham ti bendar; tang “Semina peturun ari Isak aja deka dikumbai peturun nuan.”

⁸ Reti nya, ukai anak ke diadaka mensia ke deka nyadi nembiak Allah Taala, tang anak ke datai ari semaya aja ke deka nyadi peturun Abraham ti bendar.

⁹ Laban baka tu ku utai ti disebut semaya nya: “Ba urung maya tu Aku deka datai baru, lalu Sarah deka ngadaka anak lelaki siku.”

¹⁰ Lalu ukai semina nya aja. Utai ti sebaka enggau nya mega nyadi ba Rebekah, lebuh iya ngandungka anak iya ke besapit dua, ke aki kitai Isak.

¹¹Taja pen seduai iya apin ada, tauka apin ngereja sebarang utai, nemuka utai ti badas tauka jai (ngambika juluk ati Allah Taala ti milih seduai iya, dikamatka,

¹² ukai nitihka pengawa ti dikereja mensia, tang nitihka kangau Allah Taala), Rebekah udah dipadahka munyi tu: “Iya ke tuai deka bekereja ke iya ti biak.”

¹³ Munyi ti ditulis, “Aku rinduka Jakop, tang Aku begedika Esau.”

¹⁴ Enti pia, baka ni ku jalai kitai bejaku? Kati Allah Taala enda lurus? Ukai!

¹⁵ Laban ku Iya nyebut ngagai Moses, “Aku deka kasihka orang ke dikasihka Aku, lalu Aku deka sinu ati ke orang ke dikesinuka Aku.”

¹⁶Nya alai, utai nya ukai bepanggai ba peneka tauka ba pengawa mensia, tang bepanggai ba pengasih Allah Taala.

¹⁷ Laban ku Bup Kudus nyebut ngagai raja menua Ejip, “Aku udah ngaga nuan nyadi raja kena Aku mandangka kuasa Aku, ngambika nama Aku dipadahka di serata dunya.”

¹⁸ Nya alai, Allah Taala kasihka sebarang orang ke dikedekaka Iya, lalu Iya ngasuh orang kieh ati, sebarang orang ti patut ku Iya.

¹⁹Kita nyangka deka nyebut ngagai aku, “Enti pia, nama kebuah Allah Taala agi begigaka penyalah kitai? Laban sapa ulih nyakal peneka Iya?”

²⁰ Tang sapa nuan nya, ke semina mensia aja, ke berani bekelikuh ngelaban Allah Taala? Kati utai ti ditempa deka bejaku ngagai orang ke nempa iya, “Nama kebuah nuan ngaga aku baka tu?”

²¹ Kati tukang periuk nadai kuasa atas tanah liat, lalu ngaga ari tanah liat nya sigi periuk ti dikena lebuh maya rami, lalu sigi dikena tiap hari?

²² Kati enti Allah Taala, ke lama udah sabar enggau utai ti digaga Iya, deka mandangka pengeringat Iya lalu ngayanka kuasa Iya, ngagai utai ti nyungkak Iya ringat, ti deka dirusak Iya?

²³ Lalu kati enti Iya ngereja nya kena Iya mandangka pemesai mulia Iya ngagai orang ke dikasihka Iya, ke udah disediaka Iya nerima mulia ari Iya,

²⁴ nyengkaum kitai ke udah dikangauka Iya, ukai semina ari bansa orang Judah aja, tang mega ari orang bansa bukai?

²⁵ Munyi ti disebut Iya dalam bup Hosea: “Orang ke ukai nembiak Aku deka dikumbai Aku ‘Nembiak Aku.’ Lalu orang ke enda dikerinduka Aku deka dikumbai Aku ‘Orang ke dikerinduka Aku.’

²⁶ “Lalu ba endur alai orang dipadahka, ‘Kita ukai nembiak Aku,’ dia sida deka dikumbai ‘anak Allah Taala ti idup.’ ”

²⁷ Lalu ku Isaiah bejaku enggau nyawa ti inggar pasal orang Israel: “Taja pen orang Israel ngemayuh pasir ti ba tebing tasik, semina teda sida aja[44] deka diselamatka,

²⁸laban Tuhan deka lengkas ngukum dunya.”

²⁹ Munyi ti udah dipadahka Isaiah, “Enti Tuhan ti Pemadu Bekuasa enda ngalau sekeda peturun ke kitai, kitai tentu udah nyadi baka Sodom enggau Gomorah.”

³⁰ Enti pia, baka ni ku jalai kitai bejaku? Orang bansa bukai ke enda begigaka pengelurus, udah bulih pengelurus ulih pengarap;

³¹ tang orang Israel ke begigaka pengelurus beduduk ba Adat, enda ulih nitihka Adat nya.

³² Nama kebuah? Laban sida enda ngiga pengelurus beduduk ba pengarap, tang beduduk ba utai ti dikereja sida. Sida udah tesangkut ba “batu ti ngasuh tesangkut,”

³³ munyi ti udah ditulis, “Peda kita, Aku ngengkahka sigi batu di Sion, batu ti deka ngasuh orang tesangkut, batu ti besai ti deka ngasuh sida rebah, lalu barang sapa arapka Iya, enda malu.”