Read Iban 1 Korint 1 Bible Online

1 Korint 1 - Iban bible

1 Korint 1

¹Ari Paul, ke dikangauka nyadi rasul Jesus Kristus nitihka peneka Allah Taala, enggau ari menyadi kitai Sostenes,

² Ngagai eklisia Allah Taala di Korint, ngagai orang ke dikuduska dalam Jesus Kristus, ke dikangauka nyadi nembiak Tuhan sama enggau semua orang di semua endur ke ngangauka nama Tuhan Jesus Kristus, ti Tuhan sida enggau Tuhan kitai:

³ Awakka Allah Taala ti Apai kitai enggau Tuhan Jesus Kristus meri kita berekat enggau pemaik.

⁴ Aku endang seruran meri terima kasih ngagai Allah Taala ke kita, ketegal pengasih ti udah diberi Iya ngagai kita dalam Jesus Kristus,

⁵laban dalam Jesus Kristus kita udah nyadi kaya dalam semua jaku enggau penemu,

⁶laban saksi kami pasal Kristus udah dikamatka ba kita,

⁷datai ke kita nadai kurang ba pemeri ti diberi Roh Kudus, lebuh kita nganti Jesus Kristus Tuhan kitai dipandangka.

⁸ Iya deka mega negapka kita datai ke ujung, ngambika kita nadai penyalah lebuh Hari Jesus Kristus Tuhan kitai.

⁹ Allah Taala endang tau dikarapka. Kita udah dikangauka Iya ngambika kita bekaul enggau Anak Iya Jesus Kristus Tuhan kitai.

¹⁰Diatu, dalam nama Jesus Kristus Tuhan kitai aku minta kita, menyadi, sama besetuju enggau pangan diri, enda beserekang, tang begempung enggau pangan diri, sama seati, sama sepenemu, sama juluk ati enggau pangan diri.

¹¹Laban sida Kloi sebilik bisi udah madah ngagai aku, menyadi, pasal kita ke belaya enggau pangan diri.

¹² Utai ti ku aku nya siku nyebut, “Aku nitihka Paul,” siku nyebut, “Aku nitihka Apollos,” siku nyebut, “Aku nitihka Peter”, lalu siku nyebut, “Aku nitihka Kristus.”

¹³ Kati Kristus udah dibagi? Kati Paul udah diregang ngarika kita? Tauka, kita udah dibaptisa dalam[1] nama Paul?[2]

¹⁴ Aku meri terima kasih ngagai Allah Taala[3] ke diri ke nadai udah maptisa kita, kelimpah ari maptisa Krispus seduai Gaius,

¹⁵enggai ke orang ngumbai kita udah dibaptisa dalam nama aku. (

¹⁶ Aku udah mega maptisa sida Stepanas sebilik. Tang kelimpah ari nya, aku enda ingat enti aku bisi udah maptisa orang bukai.)

¹⁷ Laban Kristus ukai ngasuh aku maptisa orang, tang ngasuh aku nusui Berita Manah - ukai ngena pengelanchar bejaku ti datai ari penemu-dalam mensia, enggai ke kuasa regang Kristus lenyau ngapa.

¹⁸Laban pesan pasal regang nya utai ti mapap ba orang ke deka mati, tang ba kitai ke diselamatka, pesan nya kuasa Allah Taala.

¹⁹ Laban endang udah ditulis, “Aku deka ngerusak penemu-dalam orang ke pintar, lalu ngemuntanka pemintar orang ke pandai.”

²⁰ Ni orang ke bepenemu-dalam? Ni orang ke bepelajar? Ni orang ke landik belabanka penemu di dunya tu? Kati Allah Taala nadai udah nunjukka pemeli penemu-dalam ti datai ari dunya?

²¹ Laban dunya enda ulih ngelala Allah Taala ngena penemu-dalam sida, nya alai Allah Taala ngena penemu-dalam Iya, mutuska runding deka ngena pemeli pesan ti ditusui kami, nyelamatka orang ke arap.

²² Laban orang Judah minta kereja ajih, lalu orang Gerika minta penemu-dalam,

²³ tang kami nusui pasal Kristus ke diregang, pesan ti ditulak orang Judah, lalu orang bansa bukai ngumbai pesan nya beli.

²⁴Tang ba orang ke dikangauka Allah Taala, orang Judah enggau orang bansa bukai, Kristus nya kuasa enggau penemu-dalam Allah Taala.

²⁵Laban pemeli Allah Taala pintar agi ari penemu-dalam mensia, lalu pengelemi Allah Taala kering agi ari pengering mensia.

²⁶Peratika gaya kita suba, menyadi, lebuh Allah Taala ngangauka kita: nadai mayuh kita nya orang ke bepenemu-dalam enti dikira nitihka penemu mensia. Nadai mayuh kita nya orang ke bekuasa, nadai mayuh kita nya orang ke tinggi pangkat,

²⁷ tang Allah Taala udah milih orang ke beli di dunya tu kena Iya ngemaluka orang ke bepenemu-dalam. Iya udah milih utai ti lemi di dunya tu kena Iya ngemaluka utai ti kering.

²⁸ Allah Taala udah milih orang ke baruh pendiau sereta dikeleseka dunya, ke nadai reti, kena Iya ngerusak utai ti endang udah bisi,

²⁹ ngambika nadai orang ulih temegah di mua Allah Taala.

³⁰ Allah Taala nya ti pun pengidup kita dalam Jesus Kristus, ke nyadi penemu-dalam Allah Taala, nyadi pengelurus, pengudus enggau penebus kitai,

³¹ ngambika, munyi ti udah ditulis, “Awakka orang ke deka temegah, temegahka[4] Tuhan.”