Read Iban 1 Korint 10 Bible Online

1 Korint 10 - Iban bible

1 Korint 10

¹ Aku enggai ke kita enda nemu, menyadi, semua aki ini kitai di baruh remang magang, lalu semua sida bejalai nengah tasik,

² lalu semua sida dibaptisa magang nyadi nembiak Moses dalam remang enggau dalam tasik nya,

³ lalu semua sida makai roti roh nya

⁴ lalu ngirup siti aja ai roh, laban sida ngirup ari sigi batu roh ti nitihka sida, lalu batu nya Kristus.

⁵ Tang taja pia, Allah Taala enda lantang ati ngagai nyau ka semua bala sida, lalu bangkai sida ngachir ba sebelah menua puang[37]

⁶ Semua utai tu nyadi chunto ke kitai, ngambika kitai enda inginka utai ti jai, baka sida.

⁷ Anang nyembah engkeramba, baka sekeda sida. Munyi ti udah ditulis, “Orang mayuh duduk makai ngirup lalu angkat betanda.”

⁸ Kitai enda tau ngereja pengawa ti kamah, baka sekeda sida, lalu dua puluh tiga ribu iku sida mati dalam sehari.

⁹ Kitai enda tau nguji Tuhan,[38] baka sekeda sida, lalu sida mati dipantuk ular.

¹⁰ Lalu anang mutap, baka sekeda sida, lalu sida dibunuh Melikat Pemati.

¹¹Semua utai tu nyadi ba sida ngambika nyadika chunto ke kitai, lalu utai nya dituliska kena ngajar kitai, laban pengujung dunya udah datai ba kitai.

¹²Nya alai enti kita ngumbai diri bediri tegap, bejaga kita ngambika kita enda rebah.

¹³ Nadai penguji ti udah diasaika kita enda udah diasaika semua orang. Allah Taala endang tau dikarapka, lalu Iya enda nejuka kita diuji lebih ari ti ulih ditatka kita; tang lebuh kita diuji, Iya deka meri kita jalai kena kita ngelepaska diri, ngambika kita tan natka penguji nya.

¹⁴ Nya alai, pangan ke dikerinduka aku, anang nyembah engkeramba.

¹⁵Aku bejaku ngagai orang ke pintar. Peratika utai ti disebut aku.

¹⁶ Mangkuk berekat ti diberekatka kitai, kati nya enda nunjukka kitai bekunsi ngirup darah Kristus? Lalu roti ti dipechahka kitai, kati nya enda nunjukka kitai bekunsi makai tubuh Kristus?

¹⁷ Laban roti endang siti aja, kitai ke mayuh tu endang setubuh, laban semua kitai bela makai roti siti nya aja.

¹⁸ Peratika orang Israel. Kati orang ke makai piring nya ukai orang ke sama besaup ngereja pengawa ba alta?

¹⁹Nama utai ti ku aku? Kati aku ngumbai pemakai ti diberi ngagai engkeramba nya bisi reti, tauka engkeramba empu bisi reti?

²⁰ Ukai! Utai ti ku aku nya, piring ti diberi orang ke enda nangika Allah Taala, diberi sida ngagai antu, ukai ngagai Allah Taala. Aku enda nyagi kita besaum enggau antu.

²¹ Kita enda tau ngirup ari mangkuk Tuhan, lalu ngirup mega ari mangkuk antu. Kita enda tau makai ba mija Tuhan, lalu makai mega ba mija antu.

²² Tauka kitai endang sengaja nyungkak Tuhan chemburu?[39] Kati kitai kering agi ari Iya?

²³ “Semua utai tau dikereja magang,” tang ukai semua utai nya pulai ke penguntung. “Semua utai tau dikereja magang,” tang ukai semua utai nya ulih ngemansangka pengidup kitai.

²⁴Anang berundingka diri empu aja, tang berunding ke orang bukai.

²⁵Empa aja sebarang utai ti dijual ba kedai dagin, lalu anang betanyaka pasal utai nya ketegal pengasai ati kita,

²⁶ laban “Dunya enggau semua utai ti dalam dunya endang enggi Tuhan.”

²⁷Enti orang ke enda arap[40] mai kita makai, lalu kita deka makai enggau iya, empa aja sebarang utai ti dibantaika orang di mua kita, lalu anang betanyaka pasal utai nya ketegal pengasai ati kita.

²⁸ Tang enti orang nyebut ngagai kita, “Utai tu udah dienjuk nyadika piring,” anang kita makai utai nya, ketegal orang ke udah madahka utai nya ngagai kita, enggau ketegal pengasai ati,

²⁹ketegal pengasai ati iya, nya utai ti ku aku, ukai ketegal pengasai ati kita. Laban nama kebuah aku ke tau makai sebarang utai, diperintah pengasai ati orang bukai?

³⁰Enti aku meri terima kasih ngagai Allah Taala ke utai ti diempa aku, nama kebuah orang tau mantah aku enti aku makai pemakai nya ngena sampi terima kasih?

³¹Nya alai, nemuka kita makai tauka ngirup, tauka ngereja sebarang utai, kereja semua utai nya ke mulia Allah Taala.

³² Anang ngenusahka ati orang Judah tauka ati orang bansa bukai, tauka ati raban eklisia Allah Taala.

³³ Tunda aja aku. Aku nguji ngelantangka ati semua orang dalam semua utai ti dikereja aku, ukai berundingka diri empu, tang berundingka semua orang, ngambika sida diselamatka.