Read Iban 1 Korint 11 Bible Online

1 Korint 11 - Iban bible

1 Korint 11

¹ Nya alai, beteladan ba aku, baka aku ke beteladan ba Kristus.

² Aku muji kita, laban kita seruran ngingatka aku dalam semua utai, lalu nitihka ajar ti udah diberi aku ngagai kita.

³ Tang aku deka ngasuh kita nemu, Kristus nyadi kepala semua lelaki, lalu laki nyadi kepala bini, lalu Allah Taala nyadi kepala Kristus.

⁴Lelaki ke betudung pala lebuh iya besampi tauka benabi, ngemaluka pala iya,[41]

⁵ tang indu ke enda betudung pala lebuh iya besampi tauka lebuh iya benabi, ngemaluka pala[42] iya, laban nya sebaka reti enggau indu ke udah dikukur pala.

⁶Enti indu enggai nudung pala diri, iya patut ngukur buk iya; tang enti indu malu ke buk diri dikukur, iya patut nudung pala diri.

⁷ Lelaki enda patut nudung pala diri, laban iya ngayanka gamal enggau mulia Allah Taala. Tang indu ngayanka mulia lelaki,

⁸ laban lelaki ukai digaga ari indu, tang indu ari lelaki.

⁹ Lalu lelaki ukai digaga ke indu, tang indu digaga ke lelaki.

¹⁰Nya kebuah, enggau ketegal sida melikat, indu enda tau nadai tanda kuasa ba pala iya.[43]

¹¹Tang, dalam Tuhan, indu enda tau nyeraraka diri ari lelaki, lalu lelaki pen enda mega tau nyeraraka diri ari indu.

¹² Laban indu digaga ari lelaki, lalu lelaki diadaka indu; tang semua utai endang datai ari Allah Taala magang.

¹³Awakka kita empu berunding: kati indu patut besampi ngagai Allah Taala enggau pala ti enda ditudung?

¹⁴Kati kita enda nemu, lelaki ke panjai buk, ngemaluka diri empu?

¹⁵Tang enti indu panjai buk, buk nya nyadika mulia iya. Laban buk nya diberi ngagai iya nyadika tudung pala iya.

¹⁶ Tang enti orang bisi ati deka bekelikuhka pasal tu, kitai tauka eklisia nadai adat asal bukai.

¹⁷Tang ba atur ti nangkanka tu, aku enda muji kita, laban lebuh kita begempuru, kita ukai ngereja utai ti badas, tang ngereja utai ti jai.

¹⁸ Laban, kena aku ngemunka jaku, lebuh kita begempuru besembiang, aku ninga kita bisi beserekang ari pangan diri. Aku arapka nya mimit.

¹⁹Iya ti bendar, kita endang patut bisi bagi entara bala kita, ngambika kita nyamai ngelala sapa orang Kristian ke bendar, sapa ke ukai.

²⁰Lebuh kita begempuru, iya ti bendar kita ukai makai pemakai Tuhan.

²¹Laban lebuh kita makai, tiap iku kita terus makai pemakai diri empu, lalu sekeda kita lapar, lalu sekeda mabuk.

²²Kati kita nadai rumah alai kita makai ngirup? Tauka, kita deka mechat eklisia Allah Taala, lalu ngemaluka orang ke nadai utai? Baka ni ku jalai aku bejaku ngagai kita tu? Kati aku patut muji kita? Sigi enda!

²³ Laban aku udah nerima ari Tuhan utai ti diberi aku ngagai kita, iya nya, malam Tuhan Jesus dijual, Iya ngambi roti,

²⁴lalu lebuh Iya udah meri terima kasih, Iya mechahka roti nya, lalu bejaku, “Tu tubuh Aku ti diberi ke kita. Kereja tu kena ngingatka Aku.”

²⁵ Baka nya mega, lebuh sida udah badu makai, Iya ngambi mangkuk, lalu bejaku, “Mangkuk tu sempekat baru ti ditanggam ngena darah Aku. Kereja tu genap kali kita ngirup iya, kena ngingatka Aku.”

²⁶ Laban genap kali kita makai roti tu, lalu ngirup ari mangkuk tu, kita madahka pemati Tuhan, nyentuk ngagai Iya datai baru.

²⁷Nya alai, barang sapa makai roti tauka ngirup ari mangkuk Tuhan ngena jalai ti enda bebasaka Iya, deka bedosa ngelaban tubuh enggau darah Tuhan.

²⁸Peresa diri empu dulu; udah nya baru kita tau makai roti, lalu ngirup ari mangkuk nya.

²⁹Laban barang sapa makai enggau ngirup, tang enda ngelala tubuh Tuhan, ngukum diri empu.

³⁰Nya kebuah mayuh kita lemi sereta sakit, lalu sekeda udah mati.[44]

³¹Tang enti kitai meresa diri empu, kitai enda diakim.

³² Tang lebuh Tuhan ngakim kitai, Iya disiplin kitai, ngambika kitai enda diukum sama enggau dunya.

³³Nya alai, menyadi, lebuh kita begempuru makai, anti pangan diri.

³⁴ Enti kita lapar, kita patut makai di rumah, ngambika lebuh kita begempuru, kita enda kena ukum. Pasal pekara bukai, aku deka mutarka nya lebuh aku datai ila.