Read Iban 1 Korint 12 Bible Online

1 Korint 12 - Iban bible

1 Korint 12

¹Nyadi pasal pemeri ti diberi Roh Kudus, menyadi, aku enggai ke kita enda nemu.

² Kita nemu, lebuh kita agi nyadi orang kapir suba, ati kita tetarit lalu kita dibai tesat ngagai engkeramba ti bisu.

³ Nya alai aku dekaka kita nemu: nadai orang ke bejaku nitihka iring Roh Allah Taala kala nyebut “Awakka Jesus kena sumpah!” lalu nadai orang ulih nyebut “Jesus nya Tuhan,” enti enda ari iring Roh Kudus.

⁴ Nyadi pemeri endang mayuh macham, tang Roh siku aja.

⁵Pengawa di dikereja endang mayuh macham, tang Tuhan siku aja.

⁶Jalai ngereja pengawa endang mayuh macham, tang Allah Taala siku aja ke meri penau ngagai genap iku orang kena sida ngereja pengawa.

⁷Siku-siku diberi tanda kena mandangka Roh Kudus, ke penguntung semua.

⁸Siku diberi ulih Roh nya penemu-dalam, lalu siku diberi penemu ulih Roh nya mega,

⁹siku diberi pengarap ulih Roh nya, siku diberi pemeri ngeraika orang ulih Roh nya,

¹⁰ siku diberi pemeri ngereja kereja ajih, siku diberi pemeri benabi,[45] siku diberi pemeri ngelala roh, ngagai siku, pemeri bejaku ngena mayuh macham jaku ti nyelai, ngagai siku, pemeri nyalinka jaku.

¹¹Semua pengawa nya dikereja Roh siku nya aja, ke meri pemeri ngagai genap iku orang, nitihka peneka Roh nya Empu.

¹² Baka reti tubuh: taja pen perengka tubuh nya mayuh, tang semua sida nya nyadika raban siti tubuh nya. Baka nya mega Kristus.

¹³ Laban semua kitai dibaptisa ke dalam siti tubuh, nemuka kitai nya orang Judah tauka orang bansa bukai, ulun tauka ukai ulun, lalu semua kitai bela diberi Roh siku nya aja ke diirup kitai.

¹⁴Iya ti bendar, tubuh ukai digaga ari siti aja perengka, tang ari mayuh bengkah perengka.

¹⁵Enti kaki nyebut, “Laban aku ukai jari, nya alai aku ukai raban tubuh nya,” jaku nya enda ulih ngasuh kaki nya badu agi nyadi perengka tubuh nya.

¹⁶Lalu enti pending nyebut, “Laban aku ukai mata, nya alai aku ukai raban tubuh,” jaku nya enda ulih ngasuh pending nya badu agi nyadi perengka tubuh nya.

¹⁷Enti sema semua tubuh nya semina mata aja, nama kena iya ninga? Enti semua tubuh nya semina pending aja, nama kena iya nyium utai?

¹⁸Tang kitai sama nemu, Allah Taala udah ngatur semua perengka dalam tubuh nya, genap iti sida, nitihka peneka Allah Taala Empu.

¹⁹Enti sema tubuh nya digaga ari siti aja perengka, dini deh alai tubuh?

²⁰Nya alai, perengka tubuh endang amat mayuh, tang tubuh siti aja.

²¹Nya alai, mata enda tau nyebut ngagai jari, “Aku enda begunaka nuan!” Pala pen enda mega tau nyebut ngagai kaki, “Aku enda begunaka nuan!”

²²Utai ti patut dikereja nya, perengka tubuh ti baka ke lemi, enda ulih enda diguna,

²³lalu perengka ti kurang agi dibasa kitai, patut balat agi dibasa kitai, lalu perengka ti enda patut diayanka kitai, patut dilamun kitai enggau manah,

²⁴tang perengka ti manah agi gaya enda ibuh dibasa kitai baka nya. Tang Allah Taala udah ngatur perengka tubuh nya baka nya, meri basa ti besai ngagai perengka ti kurang agi dibasa,

²⁵ngambika nadai penyerekang dalam tubuh nya, tang semua perengka bela sama nemu ibuhka pangan diri.

²⁶Enti siti ari perengka nya pedis, semua perengka bela pedis magang enggau iya. Enti siti ari perengka nya kena puji, semua perengka tubuh nya deka rami gaga ati enggau iya.

²⁷ Kita nya tubuh Kristus, lalu genap iku kita nya perengka tubuh nya.

²⁸ Lalu Allah Taala udah ngeletak dalam eklisia, kesatu rasul, kedua nabi, ketiga pengajar, udah nya orang ke ngereja kereja ajih, orang ke ngeraika orang, orang ke nulung orang, orang ke nyadi tuai, orang ke bejaku ngena jaku ti nyelai.

²⁹Kati semua sida nya rasul magang? Kati semua sida nya nabi magang? Kati semua sida nya pengajar magang? Kati semua sida nya ngereja kereja ajih?

³⁰Kati semua sida nya bisi pemeri ngeraika orang? Kati semua sida nya bejaku ngena jaku ti nyelai? Kati semua sida nya ulih nyalinka jaku?

³¹Tang kita patut inginka pemeri ti besai agi. Aku deka nunjukka jalai ti pemadu manah ke kita.