Read Iban 1 Korint 13 Bible Online

1 Korint 13 - Iban bible

1 Korint 13

¹ Enti aku bejaku ngena mayuh macham jaku mensia, enggau ngena jaku melikat, tang nadai pengerindu, aku tu gong ti inggar dipangkung, tauka luching ti sering-sering.

² Lalu enti aku bisi kuasa kena benabi[46] lalu nemu semua misteri, sereta nemu semua penemu, lalu enti aku bisi pengarap kena nginsitka bukit, tang nadai pengerindu, aku nadai guna.

³Enti aku meri semua utai aku ngagai orang, lalu enti aku nyerahka tubuh aku ngambika ditunu,[47] tang nadai pengerindu, nya nadai pulai ke penguntung aku.

⁴Pengerindu nya liat ati, nelap[48], enda kepapas, enda temegah tauka sumbung,

⁵ tauka jai jaku enggau orang. Pengerindu enda berundingka diri empu, enda jampat ringat tauka bedendam.[49]

⁶Pengerindu enda gaga ati ke penyalah, tang gaga ati ke utai ti bendar.

⁷ Pengerindu natka semua utai, arapka semua utai, ngadang semua utai, tan dalam semua utai.

⁸Pengerindu enda nemu abis.[50] Tang jaku ti benabi nemu abis; jaku ti nyelai nemu abis; penemu nemu abis.

⁹Laban kitai semina nemu mimit aja, lalu jaku ti benabi endang enda kala chukup,

¹⁰tang lebuh utai ti pemadu badas datai, utai ti enda chukup badas deka lesap magang.

¹¹Lebuh aku agi mit, aku bejaku baka anak mit, aku berunding baka anak mit, aku bekira baka anak mit. Lebuh aku nyau besai tuai, aku muai semua perangai anak mit.

¹²Kitai diatu semina meda ayas aja, baka ke meda dalam cheremin; ila baru kitai deka betemu betunga mua. Diatu aku semina nemu mimit aja; ila baru aku deka nemu semua utai, baka Allah Taala ke nemu semua utai pasal aku.

¹³Diatu utai tiga bengkah tu agi mengkang: pengarap, pengadang, enggau pengerindu. Tang utai ti pemadu besai nya pengerindu.