Read Iban 1 Korint 14 Bible Online

1 Korint 14 - Iban bible

1 Korint 14

¹Ulihka pengerindu, lalu bebendar minta pemeri ari Roh Kudus, kelebih agi pemeri kena nusui pesan Allah Taala.[51]

²Laban orang ke bejaku ngena jaku ti nyelai, ukai bejaku ngagai mensia, tang bejaku ngagai Allah Taala; laban nadai orang meretika utai ti disebut iya, laban iya nyebut utai ti enda ditemu reti[52] ngena jaku Roh.

³Tang orang ke nusui pesan Allah Taala, bejaku ngagai mensia, kena ngering, meransang sereta ngelantangka sida.

⁴Orang ke bejaku ngena jaku ti nyelai, semina mai penguntung ngagai diri empu, tang orang ke nusui pesan Allah Taala, mai penguntung ngagai semua raban eklisia.

⁵Aku dekaka semua kita bejaku ngena jaku ti nyelai, tang aku lebih agi dekaka kita nusui pesan Allah Taala[53] Orang ke benabi beguna agi ari orang ke bejaku ngena jaku ti nyelai enti orang nadai nerangka reti jaku nya ngambika semua raban eklisia bulih penguntung ari nya.

⁶Enti aku datai ngagai kita, menyadi, lalu bejaku ngena jaku ti nyelai, baka ni ku aku ulih mai penguntung ngagai kita, enti aku enda mai pemandang, penemu, tauka pesan Allah Taala, tauka jaku ajar?

⁷Utai tu baka reti pekekas musik; enti pekekas musik baka kesuling tauka belikan enda ditebah enggau menyana, baka ni ku kitai nemu musik ti ditebah?

⁸Lalu enti terumpit enda nyaris disepu, sapa deka nyendiaka diri mansang beperang?

⁹Baka nya mega kita. Enti kita bejaku ngena jaku ti nyelai ti enda ditemu orang reti, baka ni ku orang nemu utai ti disebut kita? Laban kita semina bejaku ngagai angin.

¹⁰Bansa jaku dalam dunya tu endang mayuh, lalu semua sida nya bisi reti magang.

¹¹Enti aku enda nemu reti jaku ti disebut orang, aku enggau orang nya baka orang kampar enggau pangan diri.

¹²Baka nya mega kita. Laban kita inginka pemeri ari Roh Kudus, kita patut lebih agi inginka pemeri ti tau dikena ngemansangka eklisia.

¹³Nya alai, orang ke bejaku ngena jaku ti nyelai, patut besampi minta kuasa kena nerangka utai ti disebut.

¹⁴Laban enti aku besampi ngena jaku ti nyelai, roh aku amat besampi, tang runding aku enda.

¹⁵ Nya alai, nama utai ti patut dikereja aku? Aku deka besampi ngena jaku Roh, tang aku deka mega besampi ngena runding aku. Aku deka belagu ngena lagu Roh, tang aku deka mega belagu ngena runding aku.

¹⁶ Enti kita meri terima kasih ngagai[54] Allah Taala ngena jaku Roh, baka ni ku orang ke ukai raban eklisia ulih nyebut “Amin” ngagai sampi terima kasih nya enti iya enda nemu utai ti disebut kita?

¹⁷Kita amat besampi ngagai Allah Taala, tang orang nya nadai bulih penguntung ari sampi nya.

¹⁸Aku meri terima kasih ngagai Allah Taala laban aku bejaku ngena jaku ti nyelai lebih ari semua kita;

¹⁹tang dalam gerija, aku deka agi bejaku ngena lima iti leka jaku ngena runding aku, ngambika ngajar orang bukai, ari ke nyebut seribu leka jaku ngena jaku ti nyelai.

²⁰ Menyadi, anang berunding baka anak mit. Ba pekara ti jai, awakka kita baka anak mit, tang ba jalai kita berunding, kita patut nyadi orang ke besai tuai.

²¹ Utai tu bisi ditulis dalam Bup Adat, “Aku deka bejaku ngagai orang tu ngena jaku ti nyelai enggau ngena mulut orang kampar, Aku deka bejaku ngagai orang tu tang taja pia, sida enggai mendingka Aku,” ku Tuhan bejaku.

²²Nya alai, bejaku ngena jaku ti nyelai nya ukai tanda ke orang ke arap, tang ke orang ke enda arap. Tang nusui pesan Allah Taala nya ukai ke orang ke enda arap, tang ke orang ke arap.

²³Nya alai, enti semua raban gerija begempuru lalu semua orang bejaku ngena jaku ti nyelai, lalu enti orang luar, tauka orang ke ukai orang Kristian tama, enda ke sida deka ngumbai kita gila?

²⁴Tang enti semua orang nusui pesan Allah,[55] lalu orang ke ukai orang Kristian tauka orang luar tama, sida tentu deka nemu diri orang ke bedosa ari utai ti disebut kita, lalu sida deka madahka pasal diri empu,

²⁵madahka resia ti dalam ati sida, lalu nyungkurka diri nyembah Allah Taala, lalu bejaku, “Allah Taala amat bisi enggau kita.”

²⁶ Nama utai ti patut dikereja deh, menyadi? Lebuh kita begempuru besembiang, siku bepantun, siku mai jaku ajar, siku mai pemandang ari Allah Taala, siku bejaku ngena jaku ti nyelai, tauka nerangka reti jaku nya. Semua utai nya dikereja kena ngeringka[56] eklisia.

²⁷Enti orang bejaku ngena jaku ti nyelai, awakka semina dua tauka tiga iku aja abis mayuh tau bejaku, udah badu siku, nya baru siku, lalu awakka siku nerangka reti utai ti disebut.

²⁸Tang enti orang dia nadai nerangka reti jaku nya, awakka sida badu agi bemunyi, tang semina bejaku ngagai diri empu enggau ngagai Allah Taala.

²⁹Awakka dua tauka tiga iku nabi[57] bejaku, lalu awakka orang bukai berundingka utai ti disebut.

³⁰Enti orang ke duduk dia bisi pemandang ari Allah Taala, orang ke benabi nya patut ngetu bejaku, lalu nejuka orang ke bisi pemandang nya bejaku.

³¹Laban semua kita tau nusui pesan Allah Taala,[58] udah badu siku, nya baru siku, ngambika semua belajar ari nya lalu diperansang.

³²Roh nabi endang dikuasa nabi nya empu,

³³laban Allah Taala ukai Allah Taala ti ngasuh utai charut, tang meri pemaik. Baka ti nyadi dalam semua eklisia nembiak Tuhan,

³⁴ sida ke indu enda tau bemunyi dalam gerija. Sida enda tau bejaku, tang seruran nunduk, munyi ti disebut Adat.

³⁵Enti sida keran deka betanyaka pasal utai, sida patut betanya ngagai laki sida di rumah. Malu amat meda indu bejaku dalam gerija.

³⁶Kati pesan Allah Taala bepun ari kita? Tauka semina kita aja ke udah nerima pesan nya?

³⁷Enti kita ngumbai diri nabi, tauka ngumbai diri bisi pemeri ari Roh Kudus, awakka kita ngaku utai ti ditulis aku ngagai kita endang amat pesan ari Tuhan.

³⁸Enti iya enggai ibuhka nya, anang ibuhka iya.[59]

³⁹Nya alai, menyadi, kita patut keran deka benabi,[60] tang anang nagang orang bejaku ngena jaku ti nyelai;

⁴⁰tang semua utai patut dikereja enggau menyana sereta meruan atur magang.