Read Iban 1 Korint 15 Bible Online

1 Korint 15 - Iban bible

1 Korint 15

¹Nyadi diatu, menyadi, aku deka ngasuh kita ngingatka Berita Manah ti udah ditusui aku ngagai kita, ti udah diterima kita, ti alai kita bediri tegap.

²Berita Manah nya nyelamatka kita, enti kita bepegai teguh ba jaku[61] ti diajar[62] aku ngagai kita -- nyangka meh kita semina arap ngapa.

³ Laban aku meri ngagai kita utai ti pemadu beguna, ti udah diterima aku, iya nya, Kristus mati ketegal dosa kitai, munyi ti ditulis dalam Bup Kudus.

⁴ Iya dikuburka, lalu diangkatka idup baru ba hari ti ketiga, munyi ti ditulis dalam Bup Kudus.

⁵ Iya lalu pegari di mua Peter,[63] lalu udah nya pegari di mua semua sida ke dua belas iku.

⁶Udah nya Iya pegari di mua lebih lima ratus iku murid Iya sereta sekali. Mayuh sida nya agi idup diatu, taja pen sekeda udah mati.[64]

⁷Udah nya Iya pegari di mua James, lalu udah nya, di mua semua sida rasul.

⁸ Ke penudi iya, Iya mega pegari di mua aku, ke ada salah maya.[65]

⁹ Laban aku tu rasul ke pemadu mit ari semua bala rasul, lalu enda patut dikumbai rasul, laban aku udah merinsaka eklisia Allah Taala.

¹⁰Tang ulih pengasih Allah Taala, aku nyadi aku ke diatu, lalu Iya enda lebu kasihka aku. Sigi amat enda lebu laban aku udah bebendar agi bekereja ari sida rasul ti bukai, taja pen ukai aku empu ke bekereja, tang pengasih Allah Taala ti dalam aku.

¹¹Nya alai, nemuka orang ke bekereja nya aku tauka sida, kami mai Berita Manah lalu kita arap.

¹²Enti kami madahka Jesus udah diangkatka ari mati, baka ni ku sekeda kita tau ngumbai orang nadai diangkatka ari mati?

¹³Enti nadai pengangkat ari mati, reti nya Kristus nadai udah diangkatka ari mati;

¹⁴ lalu enti Kristus nadai udah diangkatka ari mati, reti nya pesan ti ditusui kami nadai guna, lalu pengarap kita nadai guna.

¹⁵Lebih ari nya, kami empu lalu ditemu nyebut utai ti bula pasal Allah Taala, laban kami madahka Allah Taala udah ngangkatka Kristus ari mati, enti Iya amat nadai udah ngangkatka Kristus ari mati, enti orang ke mati amat enda diangkatka idup baru.

¹⁶Laban, enti orang ke mati enda diangkatka idup baru, Kristus pen enda mega diangkatka idup baru.

¹⁷Lalu enti Kristus nadai udah diangkatka idup baru, reti nya pengarap kita nadai guna, lalu kita agi mengkang dalam dosa kita.

¹⁸ Reti nya orang ke udah mati[66] dalam Kristus, udah lenyau magang.

¹⁹Enti pengadang kitai dalam Kristus semina ke pengidup kitai di dunya tu aja, reti nya, kami tu patut lebih agi dikesinuka ari semua orang bukai.

²⁰Tang iya ti bendar, Kristus udah diangkatka ari mati, nyadi orang ke terubah diangkatka idup baru ari bala orang ke udah mati.[67]

²¹ Laban enti pemati datai ulih siku mensia, pengangkat ari mati mega datai ulih siku mensia,

²² laban semua mensia mati dibai Adam, nya alai semua mensia deka idup dibai Kristus.

²³ Tang genap iku deka diangkatka begintir-gintir: keterubah, Kristus ke buah bungas, lalu lebuh Kristus datai baru, nya baru bala nembiak Kristus.

²⁴Udah nya baru pengujung datai,[68] lebuh Kristus nyerahka Perintah ngagai Allah Taala ti Apai, lebuh Iya udah ngerusak semua pemerintah, perintah enggau kuasa.

²⁵ Laban Iya enda tau enda merintah nyentuk ngagai maya Allah Taala udah ngengkahka semua munsuh Iya di baruh kaki Iya.

²⁶Munsuh ti pemadu dudi dirusak nya pemati.

²⁷ Laban “Allah Taala udah ngengkahka semua utai di baruh kaki Kristus.” Tang leka jaku “semua utai” sigi terang enda nyengkaum Allah Taala Empu, ke ngengkahka semua utai di baruh kaki Kristus.

²⁸ Lebuh semua utai udah diengkahka magang di baruh Kristus, nya baru Anak Allah Taala Empu, deka diengkahka di baruh Allah Taala, ke udah ngengkahka semua utai di baruh Kristus, ngambika Allah Taala nyadi semua dalam semua.

²⁹ Enti nadai pengangkat ari mati, nama kebuah orang dibaptisa ngarika orang ke mati? Enti orang ke mati enda diangkatka idup baru, nama kebuah orang dibaptisa ngarika sida?

³⁰ Lalu nama kebuah kami berambunka nyawa diri tiap jam?

³¹ Aku mati tiap hari, menyadi. Jaku tu amat, baka pengamat aku ke temegahka kita dalam Jesus Kristus Tuhan kitai.

³² Enti aku udah belaban di Epesus nitihka juluk ati mensia baka ke ngelaban jelu babas, nama penguntung ulih aku ari nya? Enti orang ke mati enda diangkatka idup baru, “Aram kitai makai ngirup, laban pagila kitai mati.”

³³Anang nejuka orang nipu kita: “Orang ke jai ngerusak moral ti menyana.”

³⁴ Anang enda nemu berunding, lalu badu agi bedosa. Aku nyebut tu kena aku ngemaluka kita laban sekeda kita nadai penemu pasal Allah Taala.

³⁵Tang sekeda orang deka nanya, “Baka ni ku orang ke udah mati diangkatka idup baru? Baka ni ku gaya tubuh sida lebuh sida diangkatka idup baru?”

³⁶ Beli! Utai ti ditanam enda ulih idup enti iya enda dulu mati.

³⁷Lalu utai ti ditanam nya ukai tubuh ti deka datai, tang leka aja, nemuka utai nya gandum, tauka utai bukai.

³⁸ Tang Allah Taala meri iya tubuh nitihka peneka Allah Taala Empu. Semacham leka, semacham ga tubuh.

³⁹Ukai semua isi nya sebaka. Isi mensia lain ari isi jelu, ari isi burung, enggau ari isi ikan.

⁴⁰Utai ti di serega bisi tubuh, lalu utai ti di dunya mega bisi tubuh, tang pemanah gaya tubuh ti di serega enda sebaka enggau pemanah gaya tubuh ti di dunya.

⁴¹Mata hari bisi pemanah gaya ke diri empu. Bulan bisi pemanah gaya ke diri empu. Bintang bisi pemanah gaya ke diri empu, lalu pemanah gaya bintang sigi-sigi endang enda sebaka.

⁴² Baka nya mega pasal pengangkat ari mati. Utai[69] ti ditanam[70] nya tubuh ti nemu mati, tang tubuh ti diangkatka idup baru enda nemu mati agi.

⁴³Lebuh iya ditanam,[71] iya nadai dibasa, tang iya diangkatka dalam mulia. Iya lemi lebuh iya ditanam, tang lebuh iya diangkatka idup baru, iya bisi kuasa.

⁴⁴Lebuh iya ditanam, iya endang tubuh dunya, tang lebuh iya diangkatka idup baru, iya nyadi tubuh roh. Enti tubuh dunya amat bisi, tubuh roh mega bisi.

⁴⁵ Munyi ti ditulis, “Mensia ti keterubah, iya nya Adam, nyadi mensia ke idup”, tang Adam ti penudi nya Roh ti meri pengidup.

⁴⁶Tang ukai tubuh roh ke dulu datai, tang tubuh dunya, udah nya baru tubuh roh.

⁴⁷Mensia ti keterubah, ke digaga ari amau,[72] datai ari dunya, tang mensia ti kedua nya datai ari serega.

⁴⁸Semua orang ke digaga ari amau,[73] sebaka enggau iya ke digaga ari amau, tang orang serega sebaka tubuh enggau orang ke datai ari serega.

⁴⁹Baka kitai ke sebaka gamal enggau mensia ti digaga ari amau, baka nya mega kitai deka sebaka gamal enggau Orang ke datai ari serega.

⁵⁰Utai ti ku aku, menyadi, nya baka tu: isi enggau darah enda ulih bempu Perintah Allah Taala, lalu utai ti nemu mati, enda ulih bempu utai ti enda nemu mati.

⁵¹ Dinga kita, aku deka madahka siti misteri ngagai kita! Ukai semua kitai deka mati,[74] tang semua kitai deka diubah,

⁵²tekala nya, dalam sekejap mata, lebuh terumpit ti penudi disepu. Laban terumpit nya deka disepu, lalu semua orang ke mati deka diangkatka idup baru nyadi orang ke enda nemu mati agi, lalu kitai deka diubah.

⁵³Laban tubuh ti nemu buruk tu enda tau enda diubah nyadi tubuh ti enda nemu buruk, lalu tubuh ti nemu mati, enda tau enda diubah nyadi tubuh ti enda nemu mati.

⁵⁴ Lebuh tubuh ti nemu buruk tu diubah nyadi tubuh ti enda nemu buruk, lalu tubuh ti nemu mati diubah nyadi tubuh ti enda nemu mati, nya baru jaku ti ditulis dalam Bup Kudus dikamatka: “Pemati udah dirusak, pemenang udah ulih.”

⁵⁵ “O pemati, dini alai pemenang nuan? O pemati, dini alai penyengat nuan?”

⁵⁶Penyengat pemati nya dosa, lalu dosa bulih kuasa ari Adat.

⁵⁷Tang beri terima kasih ngagai Allah Taala ke udah meri kitai pemenang ulih Jesus Kristus Tuhan kitai!

⁵⁸Nya alai, menyadi, bediri tegap, anang bekinsit, seruran bebendar gawa ke Tuhan, laban kita nemu, kita enda lebu gawa ke Iya.