Read Iban 1 Korint 16 Bible Online

1 Korint 16 - Iban bible

1 Korint 16

¹ Ngenang pasal duit tulung ti diberi ngagai nembiak Tuhan: kereja aja utai nya baka ti diasuh aku kereja raban eklisia di Galatia.

² Genap hari ti keterubah[75] tiap minggu, genap iku kita patut ngalau lalu naruh duit nitihka pemayuh ti ulih kita, ngambika kita enda ibuh begumpulka duit lebuh aku datai.

³ Lalu lebuh aku datai, aku deka meri surat ngagai orang ke dikemendarka kita, lalu ngasuh sida mai pemeri kita ngagai Jerusalem.

⁴Enti kita ngira aku patut mega mansang kin enggau sida, awakka sida nyempulang aku.

⁵ Aku deka nemuai ngagai kita lebuh aku udah nemuai ngagai menua Masedonia, laban aku endang deka bejalai nengah menua nya,

⁶lalu nyangka aku deka diau lama mimit enggau kita, nyangka sepemanjai musin chelap, ngambika kita ulih nulung nyendiaka aku nampung pejalai aku ngagai sebarang endur aku deka.

⁷ Aku enggai semina ngelansa aja betemu enggau kita diatu, tang ngarapka diri ulih diau lama mimit enggau kita, enti nya peneka Tuhan.

⁸ Tang aku deka diau di Epesus ditu nyentuk ngagai hari Pentikos,

⁹ laban pintu udah ditukangka alai aku ngereja pengawa ti manah, taja pen mayuh orang nyakal aku.

¹⁰ Enti Timoti datai, anang ngasuh iya nangi begulai enggau kita, laban iya bekereja ke Tuhan, baka aku empu.

¹¹Nya alai anang nejuka orang ngeleseka iya. Tulung iya mupuk enggau selamat, ngambika iya ulih mulaika diri ngagai aku, laban aku ngadang iya pulai kitu baru sama enggau orang Kristian ti bukai.

¹² Nyadi pasal menyadi kitai Apollos, aku udah bebendar ngasuh iya nemuai ngagai kita sama enggau menyadi kitai ti bukai, tang iya apin deka nemuai ngagai kita diatu. Iya deka nemuai lebuh iya bisi peluang.

¹³ Selalu bejaga, bediri tegap dalam pengarap, berani sereta kering.

¹⁴Kereja semua utai dalam pengerindu.

¹⁵ Menyadi, kita nemu sida Stepanas sebilik endang orang ke terubah-rubah nyadi orang Kristian di menua Akaia, lalu sida udah, enggau ati ti angkun, nyerahka diri bekereja ke nembiak Tuhan.

¹⁶Aku meransang kita nulung orang ke baka nya, sereta nulung semua orang bukai ke sama gawa lalu bekereja enggau sida.

¹⁷Aku balat gaga ngelaluka penatai Stepanas, Portunatus, enggau Akaius laban sida tiga udah bekereja nganti kita betulungka aku,

¹⁸laban sida ngelantangka ati aku, enggau ngelantangka ati kita. Orang ke baka nya patut dikingatka kitai.

¹⁹ Semua eklisia di menua Asia ngirumka tabi basa ngagai kita. Akuila seduai Prisila enggau raban eklisia ke begempuru dalam rumah seduai iya, ngirumka tabi basa dalam nama Jesus Kristus.

²⁰ Semua bala menyadi ditu bela ngirumka tabi basa. Beri tabi pengerindu ngagai pangan diri.

²¹ Aku, Paul, nulis jaku tabi tu ngena jari aku empu.

²² Awakka orang ke enda rinduka Tuhan, ditinggang sumpah. Datai meh Nuan, Tuhan![76]

²³ Awakka pengasih Tuhan Jesus meruan enggau kita.

²⁴Pengerindu aku meruan enggau kita dalam Jesus Kristus. Amin.