Read Iban 1 Korint 3 Bible Online

1 Korint 3 - Iban bible

1 Korint 3

¹ Nya alai aku, menyadi, enda ulih bejaku enggau kita baka ke bejaku enggau orang ke bisi Roh Kudus, tang baka ke bejaku enggau orang ke agi nitihka chara dunya, ke agi mit dalam Kristus.

² Dulu suba aku nupi kita ngena ai tusu, ukai ngena pemakai ti kering,[10] laban kita apin ulih makai pemakai nya. Indah diatu deh kita apin sedia,

³laban kita agi nitihka chara dunya. Laban seagi-agi kita kepapas, lalu belaya enggau pangan diri, enda ka nya nunjukka kita enggi dunya, lalu diau nitihka chara dunya?

⁴ Laban lebuh kita nyebut, “Aku nitihka Paul,” lalu siku nyebut, “Aku nitihka Apollos”, enda ke kita bejaku nitihka chara dunya?

⁵ Laban sapa Apollos? Lalu sapa Paul? Semina ulun Allah Taala aja, ke udah mai kita arap, nitihka pengawa ti udah diberi Tuhan ngagai kami duai siku-siku.

⁶ Aku nanam, Apollos manjah, tang Allah Taala ti ngasuh utai nya tumbuh.

⁷Nya alai, iya ke nanam, enggau iya ke manjah, sama nadai tentu guna. Semina Allah Taala aja ke ngasuh utai nya tumbuh.

⁸Iya ke nanam enggau iya ke manjah, endang nadai lebih ari pangan diri, lalu genap iku deka diupah nitihka pengawa ti dikereja siku-siku orang.

⁹ Laban kami duai sama bekereja enggau[11] Allah Taala. Kita nya umai Allah Taala, rumah Allah Taala.

¹⁰ Nitihka pengasih ti diberi Allah Taala ngagai aku, aku nudukka pugu, baka tukang ke landik ngaga rumah, lalu orang bukai nirika rumah ba atas pugu nya. Genap iku orang enda tau enda bejimat ngaga rumah ba atas pugu nya.

¹¹ Laban nadai orang tau nudukka pugu bukai kelimpah ari pugu ti udah didudukka; pugu nya Jesus Kristus.

¹²Enti orang nirika rumah ba atas pugu nya ngena emas tauka pirak, tauka batu ti berega, tauka kayu, tauka batang rumput, tauka rumput ti rangkai,

¹³ pengawa ti dikereja sida siku-siku deka terang nyata, laban Hari Tuhan deka ngayanka utai nya, laban utai nya deka diayanka ngena api, lalu api nya deka nguji pengawa ti udah dikereja sida siku-siku.

¹⁴Enti utai ti udah digaga orang ba atas pugu nya tan diuji ngena api, orang ke ngaga utai nya deka nerima upah.

¹⁵ Tang enti utai ti digaga orang nya angus, iya deka rugi, taja pen iya empu deka diselamatka, tang baka orang ke udah ngerenchah api.

¹⁶ Kati kita enda nemu diri rumah Allah Taala, lalu Roh Allah Taala diau dalam kita?

¹⁷Enti orang ngerusak rumah Allah Taala, Allah Taala deka ngerusak orang nya. Laban rumah Allah Taala kudus, lalu kita nya rumah Allah Taala.

¹⁸ Anang nipu diri empu. Enti kita ngumbai diri bepenemu-dalam nitihka kira dunya, kita patut nyadi orang ke beli, ngambika kita tau nyadi orang ke bepenemu-dalam.

¹⁹ Laban penemu-dalam mensia nya utai ti beli ba Allah Taala. Laban endang udah ditulis, “Allah Taala manjuk orang ke bepenemu-dalam ngena pemintar sida empu.”

²⁰ Lalu Bup Kudus mega nyebut, “Tuhan nemu runding orang ke bepenemu-dalam endang nadai guna.”

²¹ Nya alai, nadai orang tau temegahka mensia. Laban semua utai endang enggi kita magang,

²² nemuka iya nya Paul, Apollos, tauka Peter, tauka dunya tu, tauka pengidup, tauka pemati, tauka utai ti diatu enggau utai ti jemah ila, semua sida nya endang enggi kita magang,

²³lalu kita endang enggi Kristus, lalu Kristus endang enggi Allah Taala.