Read Iban 1 Korint 4 Bible Online

1 Korint 4 - Iban bible

1 Korint 4

¹ Baka tu ku jalai kita patut ngira kami: kami tu ulun Kristus, ke ngibun misteri Allah Taala.

²Nambahka nya, orang ke ngibun utai Allah Taala, enda tau enda orang ke tau dikarapka.

³Tang ba aku siku, aku enda irauka diri diakim kita, tauka diakim dalam kot. Indah aku empu deh enda ngakim diri empu.

⁴ Aku nadai nemu diri udah ngereja penyalah, tang ukai reti nya aku nadai penyalah. Tuhan ke ngakim aku.

⁵ Nya alai anang ngakim orang sebedau maya ti patut, sebedau Tuhan datai. Lebuh Iya datai, Iya deka mantaika semua resia ti dilalaika dalam pemetang ngagai penampak, lalu deka mansutka juluk ati ti dipelalaika mensia. Nya baru semua orang deka nerima puji ari Allah Taala.

⁶ Aku udah ngena semua utai nya ba aku empu, enggau ba Apollos, ke penguntung kita, menyadi, ngambika kita tau belajar ari kami duai reti utai ti udah ditulis munyi tu, “Anang ngelui utai ti udah ditulis”. Nya baru kita enda temegahka siku, lalu bejai siku.

⁷Laban sapa ngumbai kita lain agi ari orang bukai? Nama utai ti dikemisi kita, ti ukai diberi ngagai kita?[12] Nya alai, enti utai nya udah diberi ngagai kita,[13] nama kebuah kita temegahka utai nya, baka ke ngumbai utai nya ukai pemeri ti diberi ngagai kita?

⁸Kita udah chukup semua utai ti dipeguna kita! Kita udah nyadi kaya! Kita udah nyadi raja, taja pen kami tu ukai! Naka meh pemanah enti sema kita amat nyadi raja, ngambika kami tau nyadi raja sama enggau kita!

⁹ Laban aku ngira Allah Taala udah mandangka kami ke nyadi rasul pengabis dudi ari semua orang bukai, baka orang ke diukum bunuh, laban kami udah dikeleseka dunya, melikat enggau mensia.

¹⁰ Kami nyadi orang ke beli, ke Kristus, tang kita nyadi orang ke pintar dalam Kristus! Kami lemi, tang kita kering! Kita dibasa orang, tang kami dipechat orang.

¹¹ Nyentuk ngagai diatu kami lapar sereta aus, enda chukup gari, dipalu, sereta nadai endur alai diau,

¹² lalu kami bebendar gawa[14] ngena jari kami empu. Lebuh orang mechat kami, kami merekatka sida. Lebuh orang merinsaka kami, kami tan natka diri diperinsa.

¹³Lebuh orang bejai kami, kami nyaut sida ngena jaku ti siru. Kami udah nyadi uras dunya, utai ti kamah ti enda diguna.

¹⁴Aku ukai nulis tu kena ngemaluka kita, tang meri kita jaku tangkan, laban kita anak ke dikerinduka aku.

¹⁵ Laban taja pen kita bisi sepuluh ribu iku orang ngiring kita dalam Kristus, tang kita nadai mayuh apai. Laban iya ti bendar, ulih Berita Manah, aku nyadi apai kita dalam Jesus Kristus.

¹⁶ Nya alai aku minta kita nunda teladan aku.

¹⁷ Nya kebuah aku ngasuh Timoti, anak ke tetap ati sereta dikerinduka aku dalam Tuhan, nemuai ngagai kita, ngambika iya mai kita ngingatka gaya pengidup aku dalam Kristus, baka ke diajar aku ngagai semua eklisia.

¹⁸Tang sekeda kita udah ngenyumbungka diri, laban sida ngumbai aku enggai nemuai ngagai kita.

¹⁹Aku deka nemuai ngagai kita enda lama da agi, enti nya peneka Tuhan, lalu aku deka nemu, ukai semina utai ti disebut orang ke sumbung nya, tang kuasa sida.

²⁰Laban Perintah Allah Taala ukai bepanggai ba jaku,[15] tang bepanggai ba[16] kuasa.

²¹ Ni ti dipilih kita? Sekalika aku datai mai penyipat, tauka mai pengerindu enggau penelap?