Read Iban 1 Korint 5 Bible Online

1 Korint 5 - Iban bible

1 Korint 5

¹ Orang bisi udah madah, sekeda bala kita bisi udah ngaga ulah ti kamah. Indah orang kapir deh enda ngaga ulah ti kamah baka nya. Laban siku lelaki tinduk enggau indai-tiri iya empu!

²Lalu kita temegahka nya! Enda ka kita patut tusah ati lalu muai orang ke udah ngaga ulah nya ari bala kita?

³ Laban taja pen aku enda begulai enggau kita batang tubuh, tang aku bisi enggau kita dalam roh, lalu baka aku ke begulai enggau kita batang tubuh, aku udah ngeletak ukum

⁴ dalam nama Tuhan Jesus ba orang ke udah ngaga ulah ti baka nya. Lebuh kita begempuru, lalu roh aku bisi enggau kita sama enggau kuasa Jesus Kristus Tuhan kitai,

⁵ kita enda tau enda nyerahka orang nya ngagai Sitan, ngambika tubuh iya dirusak, tang roh iya diselamatka lebuh Hari Tuhan.[17]

⁶ Kita enda patut temegah! Kati kita enda nemu, ka semina mimit aja ragi diguna kena ngasuh semua tekang tepung kembai?

⁷ Buai semua ragi ti lama, ngambika kita amat tuchi. Nya baru kita deka nyadi baka tekang tepung ti enda beragi, laban aku nemu kita sigi baka nya. Laban Gawai Paska kitai udah sedia, laban Kristus, iya nya anak domba Gawai Paska kitai, udah diserahka ngagai Allah Taala nyadika piring.

⁸ Nya alai aram kitai ngintu Gawai Paska kitai, ukai ngena ragi ti lama, iya nya ragi pemenchi enggau penyai, tang ngena roti ti enda beragi, iya nya ati ti tuchi enggau pemendar.

⁹ Aku bisi udah nulis nagang kita begulai enggau orang ke kamah ulah.

¹⁰ Aku ukai bejakuka pasal orang dunya ke ngereja ulah ti kamah, tauka orang ke amu, tauka penchuri, tauka orang ke nyembah engkeramba, laban enti kita deka nyeliahka sida, kita enda tau enda pansut ari dunya tu.

¹¹ Tang diatu aku nulis ngagai kita, enda nyagi kita begulai enggau orang ke ngaku diri orang Kristian, tang ngereja ulah ti kamah, tauka amu, tauka nyembah engkeramba, tauka bejai orang, tauka pemabuk, tauka penchuri. Indah makai enggau orang ke baka nya, deh kita enda tau.

¹² Laban aku nadai hak ngakim orang ke ari luar eklisia. Kitai semina ngakim orang ke dalam eklisia.

¹³ Allah Taala Empu ke deka ngakim orang ke ari luar eklisia. “Buru orang ke jai nya ari bala kita.”