Read Iban 1 Korint 6 Bible Online

1 Korint 6 - Iban bible

1 Korint 6

¹ Enti kita bisi laya enggau pangan diri, kati kita berani mai pekara nya ngagai kot lalu minta diri diatur orang kapir, lalu enda minta diri diatur bala nembiak Tuhan?

²Kati kita enda nemu, nembiak Tuhan deka ngakim dunya? Lalu enti kita deka ngakim dunya, nama kebuah kita enda ulih ngatur pekara ti mit?

³Kati kita enda nemu kitai deka ngakim melikat? Anang kenang pasal ngakim utai ti dalam pengidup tu!

⁴Nya alai, enti kita bisi pekara ti baka nya, indah orang ke baruh pangkat dalam eklisia deh tau diasuh kita ngakim pekara nya!

⁵Aku nyebut tu kena aku ngemaluka kita. Nyangka meh kita nadai orang ke chukup bepenemu-dalam ngatur pekara entara kita ke diri menyadi dalam Tuhan,

⁶ti ngujungka kita ke sama Kristian mansang ngagai kot, lalu minta diri diatur orang ke ukai orang Kristian?

⁷ Enti kita nyara pangan diri, nya nunjukka kita endang udah alah. Nama kebuah enda nejuka orang ngereja utai ti salah ngagai kita? Nama kebuah enda nejuka sida ngakal kita?

⁸Tang kita empu ngereja utai ti salah lalu nipu orang. Indah menyadi kita ke dalam Kristus deh ditipu kita!

⁹ Kati kita enda nemu, orang ke jai enda ulih bempu Perintah Allah Taala? Anang nipu diri! Orang ke ngereja ulah ti kamah, tauka nyembah engkeramba, tauka butang, tauka lelaki beleman enggau lelaki,[18]

¹⁰tauka ngenchuri, tauka amu, tauka pemabuk, tauka bejakuka orang, tauka perumpak, enda ulih bempu Perintah Allah Taala.

¹¹ Baka nya meh sekeda bala kita suba. Tang kita udah dituchi, udah dikuduska, udah digaga lurus[19] dalam nama Tuhan Jesus Kristus enggau ulih Roh Allah Taala kitai.

¹² Nyangka orang bisi nyebut, “Aku tau ngereja semua utai.” Amat, tang ukai semua utai nya tau mai penguntung ngagai aku. “Aku tau ngereja semua utai.” Amat, tang aku enggai nyadi ulun utai.

¹³Nyangka bisi mega orang deka nyebut, “Pemakai ke perut, lalu perut ke pemakai.” Tang Allah Taala deka ngerusak utai dua bengkah nya. Tubuh ukai dikena ngereja ulah ti kamah, tang dikena ngereja utai ke Tuhan, lalu Tuhan ngintu tubuh nya.

¹⁴Lalu Allah Taala udah ngangkatka Tuhan ari mati, lalu Iya deka mega ngangkatka kitai ari mati ngena kuasa Iya.

¹⁵ Kati kita enda nemu, tubuh kita nya perengka tubuh Kristus? Nya alai, patut tauka enda aku mai perengka tubuh Kristus, lalu ngaga iya nyadi perengka tubuh indu sundal? Enda tau sekali-kali!

¹⁶ Kati kita enda nemu, barang sapa beleman enggau indu sundal, nyadi setubuh enggau indu sundal nya? Laban endang udah disebut, “Seduai iya deka nyadi setubuh.”

¹⁷ Tang barang sapa begempung enggau Tuhan, nyadi setubuh dalam roh enggau Tuhan.

¹⁸Seliahka ulah ti kamah. Genap dosa ti dikereja mensia, dikereja iya ari luar tubuh, tang orang ke ngereja ulah ti kamah, bedosa ngelaban tubuh diri empu.

¹⁹ Kati kita enda nemu, tubuh kita nya rumah Roh Kudus, ke diau dalam kita, ke udah diberi Allah Taala ngagai kita? Kita ukai enggi kita empu.[20]

²⁰ Laban kita udah dibeli [21] ngena rega ti besai. Nya alai, kena meh tubuh kita ngemuliaka Allah Taala.[22]