Read Iban 1 Korint 7 Bible Online

1 Korint 7 - Iban bible

1 Korint 7

¹Nyadi ngenang pasal utai ti udah ditulis kita: Manah agi enti lelaki enda bebini.[23]

²Tang laban ulah ti kamah kelalu suah udah nyadi, lelaki patut bisi bini ke diri empu, lalu indu patut bisi laki ke diri empu.

³Laki patut ngereja pengawa iya ke nyadi laki ngagai bini iya, lalu pia mega bini ngagai laki iya,

⁴laban ukai bini ke bekuasa atas tubuh diri, tang laki iya, lalu baka nya mega, ukai laki ke bekuasa atas tubuh diri, tang bini iya.

⁵ Siku-siku seduai iya enda tau enggai besetubuh enggau pangan diri, semadi meh seduai iya sama besetuju deka ngetu enda lama ari tanggungjawap nya, ngambika seduai iya ulih besampi, tang udah nya seduai iya patut begulai baru, enggai ke Sitan nguji kita laban kita enda tetagangka pengingin diri.

⁶Aku nyebut tu kena ngajar kita, ukai meri atur.

⁷ Naka meh pemanah enti semua orang baka aku magang. Tang genap iku kita endang bisi pemeri ari Allah Taala, enggi siku pemeri tu, enggi siku pemeri nya.

⁸Ngagai orang ke enda bebini, enda belaki, enggau ngagai sida indu ke balu, aku madah ngagai sida, manah agi enti sida terus enda belaki enda bebini baka aku.

⁹ Tang enti sida enda tetagangka pengingin diri, sida patut jadi enggau pangan diri, laban manah agi sida jadi melaki-bini, ari ke merinsa natka diri tetengukka pangan diri.

¹⁰ Ngagai orang ke bisi laki, bisi bini, aku meri pesan, ukai ari aku, tang ari Tuhan: bini enda tau ninggalka laki.

¹¹(Tang enti iya ninggalka laki iya, iya enda tau jadi enggau lelaki bukai, tauka iya mulaika diri baru ngagai laki iya empu), lalu laki enda tau muai bini.

¹² Ngagai sida ti bukai, aku nyebut tu (aku, ukai Tuhan): enti lelaki ke orang Kristian bisi bini ke ukai orang Kristian, lalu indu nya besetuju deka begulai enggau iya, lelaki nya enda tau muai iya.

¹³Lalu enti indu ke orang Kristian bisi laki ke ukai orang Kristian, lalu laki iya besetuju deka begulai enggau iya, iya enda tau muai laki iya.

¹⁴Laban laki ke enda arap, digaga lurus[24] ulih bini iya, lalu indu ke enda arap, digaga lurus[25] ulih laki iya. Enti enda baka nya, anak kita enda tuchi, tang laban iya baka nya, anak kita kudus.

¹⁵Tang enti tawing ke ukai orang Kristian nyarakka[26] diri, awakka iya nyarakka[27] diri. Ba pekara ti baka nya, tawing ke orang Kristian nadai utai nanchang, laban Allah Taala udah ngangauka kita[28] ngagai pemaik.

¹⁶ Nuan ke bini, baka ni ku nuan nemu diri deka, tauka enda, nyelamatka laki nuan? Nuan ke laki, baka ni ku nuan nemu diri deka, tauka enda, nyelamatka bini nuan?

¹⁷ Tang awakka genap iku kita idup nitihka pengidup ti udah diberi Tuhan ngagai kita lebuh Iya ngangauka kita suba. Tu meh atur ti diberi aku ngagai semua eklisia.

¹⁸ Kati orang nya udah ditutus lebuh iya dikangau? Awakka iya enda ibuh muai litan tutus iya. Kati iya enda ditutus lebuh iya dikangau? Awakka iya terus enda ibuh ditutus.

¹⁹ Betutus nadai guna, lalu enda betutus mega nadai guna. Utai ti beguna nya ngasika pesan Allah Taala dalam semua utai.[29]

²⁰Genap iku orang enda tau enda baka iya ke menya lebuh iya dikangau.

²¹Kati kita ulun lebuh kita dikangau? Nya nadai ngawa. Tang enti kita ulih ngelepaska diri ari pangkat ulun, lepaska diri empu.

²² Laban orang ke udah dikangauka Tuhan lebuh iya agi nyadi ulun, nyadi orang ke dilepaska Tuhan. Baka nya mega, orang ke ukai ulun lebuh iya dikangau, iya nyadi ulun Kristus lebuh iya udah dikangau.

²³ Kita udah dibeli ngena rega ti besai; nya alai, anang nyadi ulun mensia.

²⁴Nya alai, menyadi, enda milih gaya pengidup kita lebuh kita dikangau, awakka kita meruan enggau Allah Taala.

²⁵Ngenang pasal orang ke dara bungas,[30] aku nadai pesan ari Tuhan, tang aku meri penemu diri empu, laban ulih pengasih Tuhan, aku tau dikarapka.

²⁶Aku ngira, ketegal penusah ti nyadi diatu,[31] manah agi enti kita mengkang baka gaya kita ke diatu.

²⁷Kati nuan bisi bini? Anang muai bini nuan. Kati nuan apin bebini? Anang bebini.

²⁸Tang enti nuan bebini, nuan ukai bedosa. Lalu enti dara bungas belaki, iya ukai bedosa. Tang orang ke jadi melaki-bini deka dituntung penusah dunya, lalu aku ngasuh kita nyeliahka nya.

²⁹ Utai ti ku aku, menyadi, nya baka tu: kitai nyau suntuk hari. Berengkah ari diatu, awakka orang ke bisi bini idup baka orang ke nadai bini,

³⁰lalu orang ke ngulit, baka orang ke enda ngulit, lalu orang ke rami gaga, baka orang ke enda rami gaga, lalu orang ke bebelika utai, baka orang ke nadai utai,

³¹lalu orang ke ngereja pengawa dunya, baka orang ke ukai ngereja pengawa dunya, laban gaya dunya ti diatu deka lenyau.

³² Aku dekaka kita dilepaska ari pengirau. Lelaki ke enda bebini deka irauka pasal pekara Tuhan, baka ni ku jalai ngerinduka ati Tuhan.

³³Tang lelaki ke bisi bini, irauka pekara dunya, baka ni ku jalai ngelantangka ati bini iya,

³⁴lalu iya bebagi ati. Lalu indu ke enda belaki, tauka dara bungas, deka irauka pasal pekara Tuhan, irauka baka ni ku jalai ngaga diri tuchi tubuh tuchi roh, tang indu ke bisi laki deka irauka pekara dunya, irauka baka ni ku jalai ngelantangka ati laki iya.

³⁵Aku nyebut tu ke penguntung kita empu, ukai kena nagang kita, tang dekaka kita ngereja utai ti ngena, ngambika kita enda belampung ati angkunka Tuhan.

³⁶Enti orang ngira diri udah enda manah ulah enggau tunang iya, enti iya enda ulih nagang pengingin diri, lalu utai nya enda tau enda nyadi, awakka iya ngereja utai ti dikedekaka iya: awakka seduai iya jadi enggau pangan diri. Utai tu nadai pulai ke dosa.

³⁷Tang enti lelaki, ukai ari pejal, tang ari ati iya empu, udah mutuska runding enggai bebini, iya ngereja utai ti manah enti iya enda jadi enggau tunang iya.[32]

³⁸Nya alai, lelaki ke jadi enggau tunang iya[33] ngereja utai ti manah, tang lelaki ke enda bebini, ngereja utai ti manah agi.

³⁹ Bini ditanchang ngagai laki iya, asal ga laki iya agi meruan idup. Tang enti laki iya mati, iya tau jadi enggau sebarang lelaki bukai ke dikedekaka iya, asal ga lelaki nya nembiak Tuhan.

⁴⁰Tang ba runding aku, indu nya deka beberekat agi enti iya mengkang enda belaki baru. Lalu aku ngira, aku mega bisi Roh Allah Taala.