Read Iban 1 Korint 8 Bible Online

1 Korint 8 - Iban bible

1 Korint 8

¹ Ngenang pasal pemakai ti diberi ngagai engkeramba: kitai nemu, “Semua kitai bela bisi penemu.” Penemu ngasuh orang ngerigangka diri, tang pengerindu ngemansangka orang.

² Barang sapa ngumbai diri nemu utai, apin bisi penemu ti patut dikembuan iya;

³ tang orang ke rinduka Allah Taala, dikelala Allah Taala.

⁴ Nya alai, ba pasal pemakai ti udah diberi ngagai engkeramba, kitai sama nemu, “engkeramba endang ukai utai ti idup”,[34] lalu “Allah Taala endang siku aja.”

⁵Laban enti sema utai ti dikumbai petara bisi di langit tauka di dunya--laban utai ti dikumbai “petara” enggau dikumbai “tuhan” endang amat mayuh--

⁶ tang ba kitai, kitai semina bisi siku aja Allah Taala, Apai ke pun semua utai, lalu kitai idup ke Iya; lalu kitai semina bisi siku aja Tuhan, iya nya Jesus Kristus. Ulih Iya semua utai udah digaga, lalu ulih Iya kitai idup.

⁷ Tang ukai semua orang ngembuan penemu tu. Laban sekeda orang udah teleba enggau engkeramba nyentuk ngagai diatu, nya alai sida agi ngumbai pemakai ti diempa sida nya pemakai ti udah diberi ngagai engkeramba, lalu laban ati sida agi lemi, sida lalu ngumbai diri bedosa lebuh sida makai pemakai nya.

⁸ “Pemakai enda ulih mai kitai semak ngagai Allah Taala. Kitai enda rugi, enti kitai enda makai, lalu kitai enda mega untung, enti kitai makai.”

⁹ Tang bejimat, enggai ke kita ke tau ngereja semua utai, ngasuh orang ke lemi, bedosa.

¹⁰Laban enti orang ke lemi meda kita ke bisi penemu makai dalam rumah sembiang engkeramba, enda ka nya deka meransang iya makai pemakai ti dienjuk ngagai engkeramba, enti iya agi lemi?

¹¹ Nya alai, menyadi ke lemi nya, ke udah ditebus Kristus, deka rusak laban penemu kita.

¹² Tang lebuh kita bedosa ngelaban orang Kristian lalu nelihka ati sida ti agi lemi, kita bedosa ngelaban Kristus.

¹³ Nya alai, enti pemakai ngasuh orang Kristian bedosa, aku enggai sekali-kali makai dagin, enggai ke aku ngasuh sida bedosa.