Read Iban 1 Korint 9 Bible Online

1 Korint 9 - Iban bible

1 Korint 9

¹ Kati aku apin dilepaska? Kati aku ukai rasul? Kati aku nadai udah kala meda Jesus Tuhan kitai? Kati kita ukai asil ari pengawa ti dikereja aku ke Tuhan?

²Enti sema orang bukai enda ngaku aku rasul, kita ga patut ngaku aku rasul, laban pengidup kita dalam Tuhan nandaka aku amat rasul.

³Tu meh saut aku ngagai orang ke mansik aku.

⁴ Kati kami nadai hak diberi pemakai enggau utai irup?

⁵ Kati kami nadai hak mai bini kami baka rasul ti bukai, enggau baka sida menyadi Tuhan, enggau Peter?[35]

⁶ Tauka semina kami duai Barnabas aja ke enda tau enda bekereja ngulihka pengidup ke diri empu?

⁷Kati orang ke nyadi soldadu kala ngaji diri empu? Kati orang ke nanam kebun anggur enda tau makai buah ari kebun nya? Kati orang ke ngibun raban jelu enda tau ngirup ai tusu ari raban jelu nya?

⁸Kati aku nyebut tu ngena penemu mensia? Kati nya nadai disebut Adat?

⁹ Laban endang udah ditulis dalam Adat Moses, “Anang mampul mulut sapi lebuh iya ngindik gandum.” Kati Allah Taala bejakuka pasal sapi?

¹⁰ Enda ka Iya bejakuka pasal kitai? Utai nya endang ditulis ke kitai, laban orang ke ngeradu tanah enggau orang ke ngetau endang patut ngereja pengawa sida, laban sida ngarapka diri diberi ungkup ari utai ti ditanam.

¹¹ Enti kami udah nanam benih roh ba kita, kati kami enda tau minta utai ari kita?

¹² Enti orang bukai tau ngarapka diri bulih utai ari kita, kati kami enda besai agi hak tau bulih utai nya ari kita? Tang taja pia, kami nadai udah ngena hak nya, tang natka semua utai, ngambika kami enda nekul pejalai Berita Manah Kristus.

¹³ Kati kita enda nemu, orang ke bekereja dalam Rumah Sembiang, bulih pemakai ari Rumah Sembiang, lalu orang ke ngenjuk piring ba alta, bulih ungkup ari piring nya?

¹⁴ Baka nya mega Tuhan udah meri atur, ngeletak orang ke nusui Berita Manah patut bulih utai dikena beridup ari Berita Manah.

¹⁵ Tang aku nadai udah ngena hak nya, lalu aku pen ukai mega nulis surat tu kena aku ngambu hak nya ke aku empu. Manah agi aku mati, ari ke ngereja nya. Nadai orang tau ngerampas hak kena aku temegahka diri empu!

¹⁶Enti aku nusui Berita Manah, aku enda tau temegahka nya, laban aku endang udah diasuh ngereja pengawa nya. Tulah meh aku enti aku enda nusui Berita Manah!

¹⁷ Laban enti aku ngereja pengawa nya ari peneka ati aku empu, aku tentu bisi upah, tang enti aku ngereja pengawa nya ukai ari peneka ati aku empu, reti nya aku diasuh Allah Taala ngereja pengawa nya.

¹⁸ Nya alai, nama upah aku? Semina tu aja: lebuh aku nusui Berita Manah, awakka aku enda minta bayar, enggai ke aku ngena semua hak aku ke bekereja ke Berita Manah.

¹⁹Laban taja pen aku ukai ulun orang, tang aku udah ngaga diri nyadika ulun semua orang, ngambika aku tau bulih mayuh agi orang ke Kristus.[36]

²⁰ Ba orang Judah, aku baka orang Judah, ngambika aku ulih mai orang Judah ngagai Kristus. Ba orang ke di baruh Adat, aku nyadi baka orang ke di baruh Adat, taja pen aku ukai di baruh Adat, ngambika aku ulih mai orang ke di baruh Adat ngagai Kristus.

²¹ Ba orang ke ari luar Adat, aku baka orang ke ari luar Adat (taja pen aku ukai dilepaska ari adat Allah Taala, tang di baruh adat Kristus) ngambika aku ulih mai orang ke di luar Adat ngagai Kristus.

²² Ba orang ke lemi, aku baka orang ke lemi, ngambika aku ulih mai sida ngagai Kristus. Aku udah nyadi semua macham utai ke semua mensia, ngambika aku, ngena sebarang chara, ulih nyelamatka sekeda sida.

²³Aku ngereja semua nya ke Berita Manah, ngambika aku tau nerima berekat ari nya.

²⁴ Kati kita enda nemu, orang ke belumba belanda endang mayuh, tang ka semina siku aja bulih prais? Nya alai, belanda meh kita ngambika kita bulih prais.

²⁵ Genap iku orang ke belumba, enda tau enda disiplin diri empu. Sida ngereja nya ngambika sida bulih makota ti nemu abis, tang kitai ngulihka makota ti enda nemu abis.

²⁶Nya alai aku belanda terus ngagai adan. Aku enda belaban baka orang ke mukut angin,

²⁷tang aku mandam tubuh aku lalu ngaga iya nyadi ulun aku, enggai ke aku enda bulih prais lebuh aku udah nusui Berita Manah ngagai orang bukai.