Read Iban 2 Korint 10 Bible Online

2 Korint 10 - Iban bible

2 Korint 10

¹ Aku, Paul, ulih pemaruh ati enggau penelap Kristus, minta kita--aku ti takut lebuh aku betunga mua enggau kita, tang berani lebuh aku jauh ari kita --

² aku minta kita anang nyungkak aku kasar enggau kita lebuh aku begulai enggau kita, baka ti deka dikereja aku ngagai orang ke ngumbai kami gawa ngena chara mensia.[19]

³Kami endang idup ngena chara mensia, tang kami ukai beperang ngena chara mensia,[20]

⁴laban senyata ti dikena kami beperang ukai senyata dunya, tang kuasa Allah Taala kena ngerusak[21] kuta.

⁵Kami ngerusak kelikuh enggau semua utai ti ngelaban penemu pasal Allah Taala, lalu nangkap semua runding lalu ngasuh sida ngasika Kristus.

⁶ Kami sedia deka ngukum semua orang ke enda ngasi, lebuh kita empu udah chukup ngasi.

⁷ Kita semina meda gamal utai aja.[22] Enti orang arapka diri nembiak Kristus, awakka iya berunding baru lalu ingatka kami tu mega nembiak Kristus, baka iya empu.

⁸Laban enti aku temegah lebih ari ti patut pasal kuasa kami, ti diberi Tuhan kena nirika kita, ukai kena ngeruntuhka kita, aku enda malu ke nya.

⁹Aku ukai baka ke ngemba kita ngena surat.

¹⁰ Laban ku sida, “Surat iya kasar, sereta terit, tang iya empu lemi batang tubuh, lalu jaku iya nadai guna!”

¹¹Orang ke baka nya patut nemu, utai ti ditulis kami lebuh kami enda begulai enggau kita, sigi deka mega dikereja kami lebuh kami begulai enggau kita.

¹²Kami enda berani nyemaka tauka mandingka diri enggau orang ke muji diri baka nya. Lebuh sida nyukat lalu mandingka diri enggau pangan diri, sida nunjukka diri beli.

¹³Tang kami enggai temegah lebih ari ti patut, tang semina deka temegahka pengawa ti udah diasuh Allah Taala kereja kami, nyengkaum bekereja ba bala kita.

¹⁴Laban kami ukai ngereja lebih ari ti patut lebuh kami bekereja ba bala kita, laban kami tu orang ke terubah-rubah datai ba kita mai Berita Manah pasal Kristus.

¹⁵ Kami ukai temegah lebih ari ti patut, reti nya, temegahka pengawa orang bukai; tang kami ngarap, lebuh pengarap kita mansang, pengawa ti dikereja kami deka ngerembai besai agi,

¹⁶ngambika kami ulih nusui Berita Manah di menua bukai ngilah menua kita, lalu enda ibuh temegahka pengawa ti dikereja ba endur alai orang bukai udah nusui Berita Manah.

¹⁷ “Awakka orang ke deka temegah, temegahka Tuhan.”

¹⁸Laban ukai orang ke muji diri ke diterima Tuhan, tang orang ke dipuji Tuhan.