Read Iban 2 Korint 11 Bible Online

2 Korint 11 - Iban bible

2 Korint 11

¹ Aku ngarapka kita deka sabar enggau aku, enti aku beli mimit. Aku minta kita sabar enggau aku!

² Aku chemburuka kita, baka Allah Taala ke chemburuka kita, laban aku udah ngasuh kita betunang enggau siku laki, iya nya nyerahka kita dara bungas ngagai Kristus.

³ Tang aku irau enggai ke, baka ular ke ngena pemintar iya nipu Awa, runding kita dibai tesat ari ati ti tuchi ti balat angkunka Kristus.

⁴ Laban enti orang datai lalu nusui pasal Jesus ti lain agi ari Jesus ke ditusui kami, tauka kita nerima roh ti lain agi ari Roh ke diterima kita, tauka kita nerima berita manah ti lain agi ari Berita Manah ti diterima kita, kita jampat amat nunduk ngagai utai nya.

⁵ Aku ngira diri enda kurang agi ari sida rasul ke ngumbai diri lebih agi bekuasa nya!

⁶ Aku nyangka nadai udah kala belajar lanchar bejaku, tang aku bisi penemu, lalu tu udah diayanka kami ngagai kita dalam semua utai ti dikereja kami.

⁷ Kati aku bedosa lebuh aku ngemaruhka diri ngambika kita ditinggika, ketegal aku nusui Berita Manah Allah Taala ngagai kita enggau nadai minta bayar?

⁸ Aku ngerumpak eklisia bukai laban aku nerima sukung ari sida, ngambika aku ulih bekereja ke kita.

⁹ Lalu lebuh aku begulai enggau kita, lalu aku suntuk utai, aku enda nating kita, laban utai ti dipeguna aku diberi bala menyadi ke datai ari Masedonia. Nya kebuah aku enggai, lalu deka majak enggai nating kita dalam semua utai.

¹⁰ Laban ajar Kristus bisi dalam ati aku, nadai orang ulih madamka temegah aku tu di menua Akaia.

¹¹ Nama kebuah? Laban aku enda rinduka kita? Ukai! Allah Taala nemu aku rinduka kita!

¹² Lalu aku deka majak ngereja utai ti dikereja aku, ngambika enda meri peluang ngagai orang ke ngiga peluang temegah madahka diri bekereja baka kami.

¹³Laban orang ke temegah baka nya, nya nabi ti pelesu, pengelakar, ke nyaru diri nyadi rasul Kristus.

¹⁴Sigi aruh iya! Indah Sitan deh nemu nyaru diri nyadi melikat penampak.

¹⁵Nya alai, enda nyelai enti bala ulun Sitan nemu nyaru diri nyadi ulun pengelurus. Sida deka nerima ukum ti setipak enggau utai ti udah dikereja sida.

¹⁶Aku nandu nya baru: anang orang ngumbai aku beli. Tang enti sema kita ngumbai aku beli, terima aja meh aku ke beli tu, ngambika aku tau mega temegah mimit.

¹⁷ Aku ke temegah tu ukai ari asuh Tuhan, tang ari pemeli aku empu.

¹⁸Laban mayuh orang temegahka utai ti dikereja dunya, aku pen deka mega temegah.

¹⁹ Laban kita gaga ati sabar enggau orang ke beli, laban kita empu pintar!

²⁰Kita sabar lebuh orang ngaga kita nyadi ulun, tauka ngelakar kita, tauka ngambi ulih ba kita, tauka ngerigangka diri, tauka nampar mua kita.

²¹Aku malu ngaku tu, tang kami enda ulih natka nya! Tang enti orang berani temegahka sebarang utai -- aku bejaku baka orang ke beli -- aku pen berani mega temegahka utai nya.

²²Kati sida nya orang Hebrew? Aku mega orang Hebrew. Kati sida nya orang Israel? Aku mega orang Israel. Kati sida nya peturun Abraham? Aku mega peturun Abraham.

²³ Kati sida nya ulun Kristus? Aku bejaku munyi orang ke gila -- aku manah agi ari sida, aku udah bebendar agi bekereja ari sida, suah agi ari sida udah ditutup dalam rumah jil, suah agi udah disipat, lalu suah nyau deka mati.

²⁴ Lima kali aku udah disipat orang Judah, empat puluh kali (kurang siti) sekali-sekali aku disipat.

²⁵ Tiga kali aku dipalu ngena batang kayu; sekali aku dituku ngena batu; tiga kali ditabanka kapal karam, lalu sekali aku rarat sehari semalam ba tasik.

²⁶ Aku seruran bejalai, nyau deka bebadi ba sungai, laban perumpak, laban orang ke ari bansa aku empu, laban orang bansa bukai, nyau deka bebadi dalam nengeri, nyau deka bebadi di menua puang, ba tasik, nyau deka bebadi ba jari pangan ti pelesu;

²⁷ bebendar bekereja sereta merinsa, suah semalam-malam enda tinduk, lapar sereta aus, suah nadai pemakai, chelap sereta telanjai.

²⁸Lalu kelimpah ari utai bukai, tiap hari aku ngasaika diri ditekanka pengirau ke semua eklisia.

²⁹ Sapa ke lemi, lalu aku enda lemi? Sapa ke dibai orang bedosa, lalu aku enda pedis ati?

³⁰Enti aku enda tau enda temegah, aku deka temegahka utai ti nunjukka pengelemi aku.

³¹Allah Taala ti Apai Tuhan Jesus - awakka nama Iya dipuji belama iya! - nemu aku enda bula.

³² Lebuh aku di Damaskus, tuan gabenor[23] ke bekereja di baruh Raja Aretas, nyaga nengeri nya laban sida deka nangkap aku.

³³Tang aku diulurka ngena bakul nengah lubang ba dinding kuta, lalu aku ngerarika diri ari iya.