Read Iban 2 Korint 12 Bible Online

2 Korint 12 - Iban bible

2 Korint 12

¹Aku enda tau enda temegah taja pen aku nadai bulih penguntung ari nya, tang aku deka temegahka pasal genera enggau pemandang ari Tuhan.

²Aku nemu siku orang Kristian ke udah dibai ngagai serega ba peringkat ti ketiga, empat belas taun tu ti udah. Aku enda nemu sekalika utai nya nyadi ba iya batang tubuh, tauka ukai -- semina Allah Taala aja nemu.

³Lalu aku nemu -- nemuka iya dibai batang tubuh tauka ukai, aku enda nemu; Allah Taala aja nemu --

⁴ iya dibai niki ke serega,[24] alai iya ke ninga utai ti pemadu manah, ti enda ulih ditelah ngena jaku mensia.

⁵Aku deka temegahka orang ke baka nya, tang aku enggai temegahka diri empu, kelimpah ari temegahka pengelemi aku.

⁶Tang enti sema aku deka temegah, aku enda beli, laban aku deka madahka utai ti bendar. Tang aku enggai temegah, ngambika nadai orang ngira aku lebih ari ke dipeda sida ba aku, tauka didinga sida ari aku.

⁷ Lalu kena nagang aku ngenyumbungka diri ketegal pemandang ti baka nya, sebengkah penyakit[25] udah diberi ngagai tubuh aku, nyadika seruan Sitan, kena merinsaka aku.

⁸Tiga kali aku udah besampika ngagai Tuhan minta penyakit nya dibuai ari aku,

⁹tang ku Tuhan bejaku ngagai aku, “Pengasih Aku chukup ke nuan, laban kuasa Aku nyadi pemadu badas lebuh nuan lemi.” Nya alai aku deka lebih agi gaga ati temegahka pengelemi aku, ngambika kuasa Kristus meruan dalam aku.

¹⁰ Nya alai ketegal Kristus aku gaga ke pengelemi aku, dipechat, dikeduan, diperinsa, enggau dituntung mayuh macham penusah. Laban lebuh aku lemi, aku kering.

¹¹ Aku udah beli. Kita empu ke nyungkak aku beli, laban iya ti bendar, kita patut muji aku, laban aku enda kurang agi ari sida “rasul” ke bekuasa nya, taja pen aku tu orang ke nadai guna.

¹²Tanda ti ngelai rasul ti bendar -- kereja ajih enggau kereja ti nyelai -- udah dikereja enggau ati ti liat ba bala kita.

¹³ Baka ni ku kita kurang agi dikibuhka enti dibandingka enggau eklisia bukai, kelimpah ari aku ke enda nating kita? Ampun meh penyalah aku nya!

¹⁴Tu ketiga kali aku sedia deka nemuai ngagai kita. Lalu aku enggai nating kita, laban aku ukai minta utai kita, tang deka betemu enggau kita empu; laban ukai anak ke patut besimpanka utai ke apai indai, tang apai indai ke patut besimpanka utai ke anak.

¹⁵Aku gaga ati ngabiska semua utai aku, nyengkaum aku empu, kena nulung kita. Enti aku bebendar rinduka kita baka nya, kati kita deka kurang agi rinduka aku?

¹⁶ Nadai ku enggau, aku amat enda nating kita. Tang kita ngumbai aku pintar nipu kita.

¹⁷Kati aku bisi udah kala ngambi ulih ba kita ngena bala seruan ke diasuh aku nemuai ngagai kita?

¹⁸ Aku udah ngansak Titus nemuai ngagai kita, lalu ngasuh siku sida ke arap nemuai enggau iya. Kati Titus bisi udah ngambi ulih ba kita? Kati juluk ati kami duai Titus enda sebaka? Kati utai ti dikereja kami duai enda sebaka?

¹⁹Kati kita ngelamatu seruran ngumbai kami udah nguji bejaku ngarika diri empu di mua kita? Kami duai bejaku di mua Allah Taala dalam nama Kristus. Semua utai ti dikereja kami, menyadi, endang kena ngeringka pengarap kita.

²⁰ Laban aku irau enggai ke lebuh aku datai ila, aku nemu kita ukai baka ti dikedekaka aku, lalu kita nemu aku ukai baka ti dikedekaka kita. Aku irau enggai ke aku tetemuka kita belaya, kepapas, ringat, berundingka diri empu aja, mechat pangan diri, bejakuka pangan diri, sumbung sereta charut.

²¹Aku irau enggai ke lebuh aku nemuai baru ngagai kita ila, Allah Taala deka ngemaruhka aku di mua kita, lalu aku nyabakka mayuh orang ke udah bedosa dulu menya lalu apin nesal ati ke runding sida ke kamah, kereja kamah ti udah dikereja sida.