Read Iban 2 Korint 13 Bible Online

2 Korint 13 - Iban bible

2 Korint 13

¹ Tu ketiga kali aku nemuai ngagai kita. “Semua dawa enda tau enda disukung dua tauka mayuh agi saksi.”

²Aku udah meri jaku tangkan ngagai sekeda bala kita ke udah bedosa suba, enggau ngagai semua sida ti bukai, lalu diatu aku meri sida jaku tangkan lebuh aku enda begulai enggau kita. Jaku tangkan tu munyi ti udah disebut aku lebuh aku nemuai kedua kali ngagai kita suba: iya nya, lebuh aku datai baru ila, aku deka nganu sida,

³laban kita minta aku ngayanka tanda kena nunjukka Kristus amat bejaku ngena aku. Kristus enda lemi lebuh Iya bekereja ba kita, tang bekuasa dalam kita.

⁴ Iya lemi lebuh Iya diregang, tang Iya idup ulih kuasa Allah Taala. Kami lemi dalam Kristus,[26] tang lebuh kami bekereja ba bala kita, kami deka idup begulai enggau Iya ulih kuasa Allah Taala.

⁵Peresa diri empu, kena nentuka kita amat idup ngena pengarap tauka enda. Uji diri empu. Kati kita enda nemu Jesus Kristus bisi dalam kita? Nyangka meh kita nemu diri enda mujur lebuh kita nguji diri empu!

⁶Aku ngarapka kita deka nemu kami ukai orang ke enda tan diuji.

⁷Tang kami besampi ngagai Allah Taala ngambika kita enda ngereja utai ti salah, ukai reti nya kami mandangka diri udah mujur lebuh kami diuji, tang ngambika kita ngereja utai ti ngena, taja pen kami baka ke enda mujur.

⁸Laban kami enda tau ngereja utai ngelaban pemendar, tang semina bekereja ke pemendar.

⁹Laban kami gaga lebuh kami lemi, lalu kita kering. Utai ti disampika kami nya kita nyadi pemadu badas.

¹⁰ Nya kebuah aku nuliska utai tu lebuh aku enda begulai enggau kita, ngambika lebuh aku datai ila, aku enda ibuh kasar enggau kita lebuh aku ngena kuasa ti udah diberi Tuhan ngagai aku, kuasa kena ngemansang, ukai kena ngeruntuh.

¹¹Ke pengujung iya, menyadi, selamat tinggal. Diau badas. Pendingka jaku aku. Besetuju enggau pangan diri. Diau bebaik enggau pangan diri, lalu Allah Taala ti pun pengerindu enggau pemaik deka meruan enggau kita.

¹² Tabi pangan diri dalam pengerindu. Semua nembiak Tuhan bela ngirumka tabi basa ngagai kita.

¹³Awakka pengasih Tuhan Jesus Kristus, enggau pengerindu Allah Taala, enggau kaul Roh Kudus meruan enggau kita semua.