Read Iban 2 Korint 2 Bible Online

2 Korint 2 - Iban bible

2 Korint 2

¹Nya alai aku mutuska runding enggai nemuai ngagai kita baru, enggai ke aku ngenusahka ati kita.

²Laban enti aku ngenusahka ati kita, sapa deh tau dikarapka aku ngasuh ati aku gaga, kelimpah ari orang ke udah tusah ati laban aku?

³Aku nulis baka nya suba, ngambika lebuh aku datai, aku enda tusah ati laban orang ke patut ngasuh ati aku gaga, laban aku sigi arapka semua kita deka sama gaga ati enggau aku.

⁴Laban aku nulis ngagai kita enggau ati ti balat tusah sereta bekeberai ai mata, ukai deka ngenusahka ati kita, tang ngambika kita nemu pemesai pengerindu aku ke kita.

⁵Enti orang bisi udah ngenusahka ati orang bukai, iya ukai ngenusahka ati aku, tang ngenusahka ati semua kita, abis kurang iya, enggai ke jaku aku kelalu kasar.

⁶Ukum ti diletak bala mayuh ngagai orang nya, udah chukup ke iya.

⁷Nya alai diatu, kita patut ngampun sereta merindang iya, enggai ke iya enda ulih natka penusah ati diri.

⁸Nya alai aku minta kita madah ngagai iya baru pengerindu kita ke iya.

⁹Aku nulis surat nya suba kena aku ngabas ati kita, enti kita tan diuji lalu ngasi dalam semua utai.

¹⁰Barang sapa diampun kita, mega diampun aku. Orang ke udah diampun aku, enti aku udah ngampun orang, udah diampun aku di mua Kristus, ke penguntung kita.

¹¹Lalu kitai ngereja nya ngambika kitai enda ulih ditipu Sitan; laban kitai ukai enda nemu pelan iya.

¹² Lebuh aku datai di Troas nusui Berita Manah pasal Kristus, Tuhan udah muka pintu ke aku.

¹³Tang aku seruran enda nyamai ati, laban aku nadai tetemuka menyadi kitai Titus dia. Nya alai aku lalu meri selamat tinggal ngagai sida, lalu mupuk ngagai Masedonia.

¹⁴Tang aku meri terima kasih ngagai Allah Taala, laban Iya seruran nguluka kami menang dalam Kristus, lalu bejaku ngena kami ngerembaika penemu pasal Kristus baka bau rengut ti nyelamar ngagai semua endur.

¹⁵Laban ba Allah Taala kami tu bau rengut Kristus ke orang ti benung diselamatka, enggau ke orang ti tesat.

¹⁶Ba orang ke tesat, kami tu bau but pemati, tang ba orang ke benung diselamatka, kami tu bau rengut pengidup. Sapa ulih ngereja pengawa nya?

¹⁷Laban kami ukai bejualka jaku Allah Taala baka mayuh orang bukai,[7] tang dalam Kristus kami bejaku enggau ati ti beresi di mua Allah Taala, baka orang ke dikirumka Allah Taala.