Read Iban 2 Korint 3 Bible Online

2 Korint 3 - Iban bible

2 Korint 3

¹ Kati kami munyi ke muji diri baru? Kati kami begunaka surat puji ngagai kita tauka ari kita baka orang bukai?

²Kita empu ke nyadi surat kami, ke ditulis ba ati kami, [8] ngambika bisi ditemu sereta dibacha semua orang.

³ Kita empu ke ngayanka diri endang amat surat Kristus, ti udah disediaka kami, ukai ditulis ngena ai dawat tang ngena Roh Kudus Allah Taala ti idup, ukai ditulis ba papak batu, tang ba ati mensia.

⁴Nya meh pemesai pengarap kami ke Allah Taala, ulih Kristus.

⁵Ukai reti nya kami ngumbai diri landik ngereja pengawa tu ngatika diri; pengelandik nya datai ari Allah Taala,

⁶ ke udah meri kami pengelandik bekereja ke sempekat ti baru, ukai bekereja ke adat ti ditulis, tang bekereja ke Roh Kudus, laban adat ti ditulis, munuh, tang Roh Kudus meri pengidup.

⁷ Enti Adat ti mai pemati, ti ditulis ba lampang batu,[9] pegari ngena mulia ti ngemalat nya, datai ke orang Israel nyau enda ulih merening ngagai mua Moses, empa pemalat penampak mulia nya, taja pen mulia nya majak ayas-seayas,

⁸enda ka pengawa Roh Kudus deka lebih agi bemulia ari nya?

⁹Laban enti pengawa ti meri ukum bisi mulia, tentu besai agi ga mulia pengawa ti mai pengelurus!

¹⁰Laban utai ti bemulia suba nyau nadai agi bemulia diatu enti dibandingka enggau mulia ti lebih besai agi ari nya.

¹¹Lalu enti utai ti tau lesap pegari ngena mulia, tentu besai agi ga mulia utai ti tan belama iya!

¹²Nya alai laban kami bisi pengadang tu, kami amat berani.

¹³ Kami enda baka Moses, ke mampul mua diri ngena kain ngambika orang Israel enda meda penampak mulia nya majak ayas-seayas.

¹⁴Tang runding sida udah tumpul, laban nyentuk ngagai sehari tu, tambai mua sida agi mengkang lebuh sempekat lama dibacha. Tambai mua nya apin dibuai, laban semina Kristus aja ulih muai tambai nya.

¹⁵Indah nyentuk ngagai sehari tu, genap kali Adat Moses dibacha, deh runding sida agi mengkang dipampul kain tambai;

¹⁶ tang lebuh orang nguingka diri ngagai Tuhan, kain tambai nya dibuai.

¹⁷Tuhan endang Roh, lalu dia alai Roh Tuhan, dia meh pengelepas.

¹⁸Lalu semua kitai, enggau mua ti enda dipampul sereta ngayanka mulia Tuhan, deka diubah nyadi sebaka gamal enggau Iya, enggau mulia ti nambah-menambah, laban mulia nya datai ari Tuhan ke endang Roh.