Read Iban 2 Korint 4 Bible Online

2 Korint 4 - Iban bible

2 Korint 4

¹Nya alai laban kami udah diberi pengawa tu ulih pengasih Allah Taala, kami enda mantul.

²Kami udah ngelengkaka semua utai ti dipelalaika ti tau ngasuh malu; kami enggai nipu orang, tauka nyarutka jaku Allah Taala, tang madahka utai ti bendar enggau terang di mua Allah Taala ngambika genap iku orang, ngena pengasai ati sida siku-siku, nemu kami endang madahka utai ti bendar.

³Lalu enti sema Berita Manah nya dipampul, iya semina dipampul ari orang ke tesat.

⁴ Ba pekara nya, petara dunya udah mampul runding orang ke enda arap, kena nagang sida meda penampak Berita Manah pasal mulia Kristus, ke sebaka gamal enggau Allah Taala.

⁵Laban kami ukai nusui pasal kami empu, tang pasal Jesus Kristus ti Tuhan, lalu kami empu nyadi ulun kita, ketegal Jesus.

⁶ Laban Allah Taala, ke nyebut, “Awakka penampak manchar ari pemetang,” udah manchar dalam ati kitai, ngambika kita nemu, mulia Iya ulih dipeda ba mua Jesus Kristus.

⁷Tang reta roh nya disimpan dalam periuk tanah kena nunjukka kuasa ti besai nya datai ari Allah Taala, ukai datai ari kami.

⁸Kami dituntung semua macham penusah, tang kami enda alah; beba runding tang enda kelalu tusah;

⁹kena perinsa, tang enda ditinggalka; dipalu, tang enda rusak;

¹⁰seruran mai pemati Jesus dalam tubuh kami, ngambika pengidup Jesus mega diayanka ba tubuh kami.

¹¹Laban lebuh kami idup, kami endang seruran napi pemati ketegal Jesus, ngambika pengidup Jesus diayanka ba tubuh kami ke tau mati tu.

¹²Nya alai pemati bekereja dalam kami, tang pengidup bekereja dalam kita.

¹³ Tang kami bisi roh pengarap baka ti ditulis dalam Bup Kudus, “Aku arap, nya alai aku bejaku.” Kami mega arap, nya alai kami bejaku,

¹⁴ laban kami nemu, Iya ke udah ngangkatka Tuhan Jesus ari mati, deka mega ngangkatka kami ari mati sama enggau Jesus, lalu deka mai kami sama enggau kita, ngagai mua Iya Empu.

¹⁵Semua utai tu ke penguntung kita, ngambika pengasih ti ngelekai ngagai mayuh agi orang, ngasuh mayuh agi orang meri sampi terima kasih, kena ngemuliaka Allah Taala.

¹⁶Nya alai kami enda mantul. Taja pen tubuh kami majak lemi, tang roh kami digaga nyadi baru tiap hari.

¹⁷Laban penusah ti mit sereta enda lama tu nyendiaka kami nerima mulia ti meruan belama iya, ti nadai banding,

¹⁸laban kami ukai merening ngagai utai ti ulih dipeda, tang ngagai utai ti enda ulih dipeda; laban utai ti ulih dipeda semina tan enda lama, tang utai ti enda ulih dipeda, tan belama iya.