Read Iban 2 Korint 5 Bible Online

2 Korint 5 - Iban bible

2 Korint 5

¹ Laban kami nemu, enti langkau kain ti alai kitai diau tu dirubuh, kitai bisi rumah ari Allah Taala, rumah ti meruan belama iya, ti ukai digaga jari mensia.

²Laban dalam langkau kain tu kitai bedemuh minta rumah ti di serega dirasukka ba kitai,

³ngambika lebuh rumah nya dirasukka ba kitai, kitai enda agi telanjai.

⁴Laban seagi-agi kitai diau dalam langkau kain tu, kitai bedemuh mai ma ti berat laban kitai enggai dilepaska ari tubuh tu, tang laban kitai keran dekaka tubuh serega dirasukka ba kitai, ngambika tubuh ti nemu mati tu ditelan pengidup.

⁵Allah Taala Empu ke udah nyendiaka kitai ke nya, lalu Iya udah meri kitai Roh Kudus nyadika jamin.

⁶Nya kebuah kami seruran kempang ati, lalu kami nemu, seagi-agi kami diau dalam tubuh tu, kami jauh ari Tuhan,

⁷laban kami idup ngena pengarap, ukai ngena utai ti dipeda.

⁸Kami sigi amat kempang ati lalu keran deka ninggalka tubuh tu, lalu diau begulai enggau Tuhan.

⁹Nya alai, tuju ati kami endang seruran deka ngelantangka ati Iya,[10] nemuka kami diau dalam tubuh tu tauka ninggalka tubuh tu.

¹⁰ Laban semua kitai enda tau enda bediri di mua Kristus lalu diakim ulih Iya, ngambika genap iku kitai nerima upah, nitihka utai ti udah dikereja kitai siku-siku ngena tubuh tu, nemuka utai nya manah tauka jai.

¹¹Nya alai, laban kami nemu reti nangika Tuhan, kami nguji ngumbuk orang bukai. Tang Allah Taala ngelala sapa kami tu, lalu aku mega ngarapka kita ngelala sapa kami tu dalam ati kita.

¹² Kami ukai muji diri baru di mua kita, tang meri kita peluang temegahka kami, ngambika kita ulih nyaut orang ke temegahka utai ti dipeda ba mensia lalu ukai temegahka utai ti dalam ati mensia.

¹³Enti kami gila, kami gila ke Allah Taala. Enti kami enda gila, nya ke penguntung kita.

¹⁴ Laban pengerindu Kristus mejalka kami, laban kami nemu, siku orang udah mati ngarika semua mensia, nya alai, semua mensia bela udah mati magang.

¹⁵Lalu Iya mati ke semua mensia, ngambika orang ke idup ukai idup ke diri empu agi, tang idup ke Iya ke udah mati lalu diangkatka idup baru ngarika sida.

¹⁶Nya alai, belabuh ari diatu, kami enda agi ngira orang ngena chara dunya.[11] Taja pen kami dulu suba udah ngira Kristus ngena chara dunya, tang kami diatu enda agi ngira Iya ngena chara nya.

¹⁷ Nya alai, enti orang nya dalam Kristus, iya nyadi mensia ti baru. Iya ke lama nadai agi, iya ke baru, udah datai!

¹⁸ Semua utai tu datai ari Allah Taala magang, ke udah mai kitai bebaik enggau Iya Empu, ulih Kristus, lalu udah meri kitai pengawa mai semua mensia bebaik enggau Iya.

¹⁹Reti nya, dalam Kristus, Allah Taala udah mai semua dunya bebaik enggau Iya Empu,[12] enda ngitung penyalah sida, lalu ngasuh kami nusui pesan pemaik tu.

²⁰ Nya alai, kami nyadika pengari Kristus, laban Allah Taala bejaku ngena kami. Kami bebendar ngarika Kristus ngumbuk kita, mai kita bebaik enggau Allah Taala.

²¹ Ketegal kitai meh Allah Taala udah ngengkahka dosa kitai ba Iya ke enda bedosa, ngambika dalam Iya kitai digaga lurus di mua Allah Taala.[13]