Read Iban 2 Korint 6 Bible Online

2 Korint 6 - Iban bible

2 Korint 6

¹Nya alai, laban kami sama bekereja enggau Allah Taala,[14] kami mega bebendar ngumbuk kita, anang masau pengasih Allah Taala.[15]

² Laban Allah Taala bisi nyebut: “Ba maya ti patut, Aku udah mendingka nuan, lalu lebuh hari pengelepas Aku udah nyaup nuan.” Dinga kita! Tu meh maya ti patut. Tu meh hari pengelepas.

³Kami nadai mempang jalai orang, ngambika orang enda ulih besalahka pengawa kami,

⁴ tang dalam semua utai enggau ngena semua macham chara kami udah ngayanka diri amat ulun Allah Taala. Kami udah tan natka penusah, pemerinsa enggau penyuntuk,

⁵ dipalu, ditutup dalam rumah jil, dijamah orang ke begau, bebendar bekereja, nadai tinduk, nadai utai diempa,[16]

⁶ngena ulah ti tuchi, penemu, pengeliat ati, penelap, pengerindu ti bendar,

⁷ madahka utai ti amat, enggau ulih kuasa Allah Taala; ngena pengelurus nyadika senyata ba jari kanan enggau ba jari kiba kami,

⁸dibasa orang, dikeleseka orang, dipejai orang, dipuji orang, dikumbai orang bula, taja pen kami madahka utai ti bendar;

⁹ enda dikelala orang, taja pen semua orang ngelala kami; baka ke mati, tang, baka ke dipeda kita, kami agi mengkang idup; baka ke diukum, tang enda dibunuh;

¹⁰ baka ke tusah ati, tang seruran rami gaga; baka ke seranta, tang ngaga mayuh orang nyadi kaya; baka ke nadai utai, tang bempu semua utai.

¹¹ Kami bejaku enggau terang ngagai kita orang Korint. Kami udah nukangka ati kami ngagai kita.

¹²Kami nadai sekat rinduka kita; kita empu ke nyekat diri rinduka kami.

¹³Kena kitai besilih -- Aku bejaku baka ke ngagai anak mit -- tukangka ati kita ngagai kami.

¹⁴Anang besulu[17] enggau orang ke enda arap. Laban baka ni ku pengelurus ulih begulai enggau penyai? Tauka baka ni ku penampak ulih bekaul enggau pemetang?

¹⁵Baka ni ku Kristus ulih besetuju enggau Sitan?[18] Tauka orang ke arap tau sebaka enggau orang ke enda arap?

¹⁶ Baka ni ku rumah Allah Taala ulih besetuju enggau engkeramba? Laban kitai tu rumah Allah Taala ti idup! Munyi ti disebut Allah Taala, “Aku deka diau dalam sida lalu begulai enggau sida, lalu Aku deka nyadi Allah Taala sida, lalu sida deka nyadi nembiak Aku.

¹⁷ Nya alai pansut kita ari sida, lalu seraraka diri ari sida, ku Tuhan bejaku, lalu anang negu utai ti enda tuchi; nya baru Aku deka nerima kita,

¹⁸ lalu Aku deka nyadi Apai kita, lalu kita deka nyadi anak lelaki enggau anak indu Aku, ku Tuhan ti Pemadu Bekuasa bejaku.”