Read Iban 2 Korint 8 Bible Online

2 Korint 8 - Iban bible

2 Korint 8

¹ Kami deka ke kita nemu, menyadi, pasal pengasih ti diberi Allah Taala ke mayuh bengkah eklisia di menua Masedonia.

²Taja pen sida udah balat diuji mayuh macham penusah, tang sida udah meri tulung enggau ati ti amat gaga sereta gerah mudah, taja pen sida udu seranta.

³ Laban, aku madah ngagai kita, sida udah meri enggau naka ulih sida, enggau lebih agi ari ti ulih diberi sida. Ari peneka ati sida empu

⁴ sida minta kami meri sida peluang sama enggau meri tulung ngagai bala nembiak Tuhan.

⁵Lalu sida ngereja nya, ukai baka ke disangka kami, tang sida dulu nyerahka diri ngagai Tuhan, lalu udah nya baru sida nyerahka diri ngagai kami, nitihka peneka Allah Taala.

⁶ Nya alai kami ngasuh Titus, ke udah ngepunka pengawa pengasih nya, mega nembuka pengawa nya ba bala kita.

⁷Nyadi diatu baka kita ke mujur dalam semua utai--dalam pengarap, dalam jaku, dalam penemu, dalam pemendar kita ngereja utai, enggau dalam pengerindu kita ke kami--awakka kita mega mujur dalam pengawa pengasih tu.

⁸Aku ukai nyebut tu laban aku deka meri atur ngagai kita, tang laban aku deka nemu pengamat pengerindu kita, enti dibandingka enggau pengerindu orang bukai.

⁹Laban kita nemu pengasih Jesus Kristus Tuhan kitai: taja pen Iya kaya, tang ketegal kita, Iya nyadi seranta, ngambika ulih penyeranta Iya, kita tau nyadi kaya.

¹⁰Ba pekara tu aku meri kita jaku lalau ti tau dititihka kita: Taun siti tu kemari kita tu orang ti keterubah, ukai semina meri tang mega orang ke terubah bisi ati deka meri.

¹¹Diatu tembuka pengawa nya, ngambika pengeransing kita ke merambu pengawa nya setipak enggau pengeransing kita nembuka iya, ngena utai ti dikemisi kita.

¹²Laban enti pengeransing nya bisi, pemeri kita nya deka diterima, beduduk ba utai ti dikemisi kita, ukai beduduk ba utai ti nadai ba jari kita.

¹³Aku ukai ngumbai kita patut ditating enggau pengawa ti berat nya, lalu orang bukai enda, tang ngambika semua bela bisi utai magang.

¹⁴Diatu lebuh kita bulih mayuh utai, kita meri sida utai ti dipeguna sida, ngambika lebuh sida bulih mayuh utai, sida meri kita utai ti dipeguna kita, ngambika semua bela bisi utai magang.

¹⁵ Munyi ti udah ditulis, “Orang ke ngumpul mayuh, nadai bulih kelalu mayuh, lalu orang ke ngumpul mimit, nadai mega bulih kelalu mimit.”

¹⁶Aku meri terima kasih ngagai Allah Taala ke udah ngasuh Titus ransing ati nulung kita baka ti deka dikereja aku empu!

¹⁷Laban iya ukai semina nerima peminta kami, tang laban iya empu endang majak ransing agi ati deka nulung kita, nya alai iya deka nemuai ngagai kita ari peneka ati iya empu.

¹⁸ Kami ngirumka enggau iya, siku menyadi ke dibasa orang dalam semua eklisia ketegal pengawa iya ke nusui Berita Manah.

¹⁹ Lalu ukai semina nya aja, tang iya mega udah diasuh mayuh bengkah eklisia bejalai enggau kami lebuh kami ngereja pengawa pengasih tu, ke mulia Tuhan Empu, enggau kena nunjukka pengeransing kami ke deka nulung.

²⁰Kami deka ngereja pengawa ba pasal pemeri tu enggau bejimat enggai ke orang mantah kami,

²¹ laban kami endang deka ngereja utai ti ngena, ukai semina di mua Tuhan aja, tang mega di mua mensia.

²²Nya alai, kami ngasuh menyadi kami tu bejalai enggau sida. Kami suah udah nguji iya, lalu kami nemu iya endang ransing dalam semua pekara. Lalu diatu iya balat agi ransing ari ke udah, laban iya arap amat ke kita.

²³Nyadi pasal Titus, iya endang tawing aku bekereja betulungka kita. Pasal bala menyadi bukai, sida nya pengari ari mayuh bengkah eklisia, ke nyadi mulia Kristus.

²⁴Nya alai di mua semua eklisia, ayanka pengerindu kita ke sida enggau kebuah kami ke temegahka kita di mua sida.