Read Iban 2 Korint 9 Bible Online

2 Korint 9 - Iban bible

2 Korint 9

¹ Aku tau enda ibuh nulis ngagai kita pasal tulung ti diberi ngagai bala nembiak Tuhan,

² laban aku nemu kita endang keran deka nulung, lalu aku udah temegahka nya di mua orang Masedonia, madahka orang di menua Akaia endang udah sedia kenyau ari taun siti tu kemari, lalu pengeransing ati kita udah nyungkak nyauka semua bala sida.

³ Tang diatu aku ngasuh Titus enggau sida menyadi tu nemuai ngagai kita, ngambika kami enda lebu temegahka kita ba pekara tu, ngambika kita endang amat sedia, munyi ti dipadahka aku ngagai sida;

⁴enggai ke lebuh orang Masedonia datai enggau aku, lalu nemu kita enda sedia, kami malu ke diri ke udah balat ngarapka kita! Lalu kita empu pen malu.

⁵Nya alai aku ngira, aku patut ngasuh sida menyadi nya nemuai dulu ngagai kita, lalu nyendiaka dulu pemeri ti udah disemaya kita, ngambika pemeri nya sedia magang, ukai ari pejal, tang ari peneka ati kita empu.

⁶Ingatka jaku tu: orang ke nanam mimit, deka ngetau mimit, lalu orang ke nanam mayuh, deka ngetau mayuh.

⁷ Genap iku kita patut meri nitihka pemutus runding diri, ukai enggau ati ti lembau, tauka ari pejal, laban Allah Taala rinduka orang ke meri enggau ati ti gaga.

⁸ Lalu Allah Taala ulih meri kita semua macham berekat ti belimpah-limpah, ngambika lebuh kita seruran chukup semua utai, kita ulih meri mayuh utai kena ngereja genap bengkah pengawa ti badas.

⁹ Munyi ti ditulis, “Iya meri enggau ati ti gerah mudah. Iya meri ngagai orang ke seranta. Pengelurus Iya meruan belama iya.”

¹⁰ Allah Taala, ke meri benih ngagai orang ke nanam, enggau roti ke pemakai, deka meri lalu nambahka semua utai kita, sereta nambahka asil pengelurus kita.

¹¹Kita deka digaga nyadi kaya ngena semua macham chara laban kita meri enggau ati ti gerah mudah, ti deka nyungkak orang meri terima kasih ngagai Allah Taala ketegal pemeri kita ke diterima sida ari kami,

¹²laban pengawa ti dikereja kita tu ukai semina meri utai ti dipeguna bala nembiak Tuhan, tang mega nyungkak mayuh orang meri terima kasih ngagai Allah Taala.

¹³ Nyadi laban kita udah diuji ngena pengawa tu, kita deka ngemuliaka Allah Taala ketegal kita ngasi lalu ngaku Berita Manah pasal Kristus, enggau ketegal kita meri enggau ati ti gerah mudah ngagai sida enggau ngagai orang bukai.

¹⁴Lalu enggau ati ti balat lelengau, sida deka besampika kita ketegal pemesai pengasih ti udah diberi Allah Taala ngagai kita.

¹⁵ Beri terima kasih ngagai Allah Taala ketegal pemeri Iya ti enda ulih ditelah!