Read Iban Galatia 1 Bible Online

Galatia 1 - Iban bible

Galatia 1

¹Surat ari Paul ke nyadi rasul, ukai ari atur mensia tauka ngena kuasa mensia, tang ulih Jesus Kristus enggau Allah Taala ti Apai, ke udah ngangkatka Jesus Kristus[1] ari mati,

²enggau ari semua menyadi ke bisi enggau aku, Ngagai semua eklisia di Galatia:

³ Awakka berekat enggau pemaik diberi ngagai kita ari Allah Taala ti Apai, enggau ari Tuhan Jesus Kristus,

⁴ ke udah nyerahka Diri ketegal dosa kitai ngambika ngelepaska kitai ari dunya ti jai tu, nitihka peneka Allah Taala ti Apai kitai,

⁵ ke endang patut dimuliaka[2] belama-lama iya. Amin.

⁶Aku alit ati ke kita tu! Jampat amat kita ninggalka Iya ke udah ngangauka kita ulih pengasih Kristus, lalu nguingka diri ngagai “berita manah” ti bukai.

⁷Ukai reti nya kitai bisi “berita manah ti bukai,” tang sekeda orang nyarutka runding kita lalu nguji nunsangka Berita Manah Kristus.

⁸ Tang enti sema kami, tauka melikat[3] ari serega, bisi nusui ngagai kita berita manah ti lain agi ari Berita Manah ti udah ditusui kami ngagai kita, awakka orang nya diukum belama-lama iya.[4]

⁹Munyi ti udah disebut kami suba, lalu diatu aku nandu nya baru: enti orang bisi nusui berita manah ti lain agi ari Berita Manah ti udah diterima kita, awakka orang nya diukum belama-lama iya.[5]

¹⁰ Kati aku diatu minta diri dikerinduka mensia, tauka minta diri dikerinduka Allah Taala? Tauka aku nguji ngerinduka ati mensia? Enti aku agi nguji ngerinduka ati mensia, aku ukai ulun[6] Kristus

¹¹ Laban aku dekaka kita nemu, menyadi: Berita Manah ti ditusui aku ukai datai ari mensia,

¹²laban aku ukai nerima Berita Manah nya ari mensia, lalu orang pen nadai mega ngajar nya ngagai aku. Aku nerima Berita Manah nya ari pemandang Jesus Kristus.

¹³ Kita empu tentu udah ninga pasal pengidup aku dulu suba, lebuh aku balat angkunka agama orang Judah. Aku balat merinsaka lalu nguji ngerusak eklisia Allah Taala.

¹⁴ Aku jauh nyulut mansang dalam agama orang Judah ari orang bukai ke sama serebak enggau aku, laban aku balat agi ari sida angkunka adat asal aki ini kitai.

¹⁵ Tang lebuh Allah Taala, ke udah milih aku sebedau aku ada, lalu ngangauka aku bekereja ke Iya, gaga ati

¹⁶mandangka Anak Iya ngagai aku,[7] ngambika aku nusui pasal Iya ngagai orang bansa bukai, aku nadai betanya ngagai orang,

¹⁷lalu aku pen enda mega mupuk ngagai Jerusalem, ngagai orang ke dulu agi ari aku nyadi rasul, tang mupuk tekala nya ngagai menua Arabia, lalu udah nya pulai baru ngagai Damaskus.

¹⁸ Tiga taun udah bekau nya, nya baru aku mupuk ngagai Jerusalem nemuai ngagai Peter,[8] lalu aku diau enggau iya lima belas hari.

¹⁹Tang aku nadai betemu enggau rasul ti bukai kelimpah ari James, menyadi Tuhan Empu.

²⁰(Utai ti ditulis aku tu endang amat. Allah Taala Empu nemu aku enda bula!)

²¹Udah nya, aku bejalai ngagai menua Siria enggau Silisia.

²²Lebuh maya nya, aku apin dikelala raban eklisia Kristus di Judea.

²³Sida semina bisi udah ninga ari padah orang, “Orang ke udah merinsaka kitai suba, diatu benung ngajar pasal pengarap ti deka dirusak iya suba!”

²⁴Lalu sida muji Allah Taala ketegal aku.