Read Iban Galatia 2 Bible Online

Galatia 2 - Iban bible

Galatia 2

¹ Empat belas taun udah bekau nya, aku mupuk ngagai Jerusalem enggau Barnabas, mai Titus enggau aku.

²Aku kin nitihka pemandang ari Tuhan, lalu aku madah ngagai bala tuai eklisia (entara kami aja) pasal Berita Manah ti ditusui aku ngagai orang bansa bukai, kena nentuka aku enda lebu ngapa nusui Berita Manah nya.

³Indah Titus, ke sama enggau aku, deh enda dipejalka betutus, taja pen iya orang bansa Gerika.

⁴Pekara tu tebantai laban sekeda orang ke nyaru diri nyadi orang Kristian, udah enselit tama ngagai bala kitai, laban sida keran deka mansik pasal pengelepas kitai dalam Jesus Kristus, lalu nguji ngaga kitai nyadi ulun sida.

⁵ Tang kami enda nunduk ngagai sida, sekejap pen enda, ngambika pemendar ti dibai Berita Manah meruan enggau kita.

⁶ Lalu orang ke dikumbai kepala (aku enda bedulika pangkat sida, laban Allah Taala enda bepilih mata) nadai nambahka penemu ti baru ngagai pesan ti dibai aku.

⁷Laban lebuh sida meda aku udah diasuh Allah Taala nusui Berita Manah ngagai orang bansa bukai, baka Peter ke udah diasuh nusui Berita Manah ngagai orang Judah,

⁸(laban Allah Taala, ke ngasuh Peter bekereja nyadi rasul ba orang Judah, mega ngasuh aku bekereja nyadi rasul ba orang bansa bukai),

⁹lalu lebuh James, Peter enggau John, ke nyadi kepala, meda Allah Taala udah kasihka aku lalu meri pengawa tu ngagai aku, sida lalu betabi enggau kami duai Barnabas, nandaka kami saum pengawa. Sida lalu besetujuka kami duai Barnabas bejalai ngagai orang bansa bukai, lalu sida bejalai ngagai orang Judah.[9]

¹⁰Sida semina minta siti aja utai ari kami duai, ngasuh kami duai ngingatka orang ke suntuk, utai ti endang deka dikereja aku.

¹¹ Tang lebuh Peter[10] datai di Antiok, aku nyakal iya mua mata, laban iya terang amat salah.

¹²Laban sebedau orang ke dikirumka James datai, Peter endang selalu makai enggau orang bansa bukai. Tang lebuh bala orang nya datai, Peter nyurutka diri lalu nyeraraka diri ari orang bansa bukai, laban iya takutka orang ke ngemeranka pengawa betutus.

¹³Bala orang Judah ti bukai lalu belabuh takut baka Peter, datai ke Barnabas empu nyau dibai sida tesat laban ulah sida ti pura-pura ngapa baka nya.

¹⁴Tang lebuh aku meda sida enda nitihka pemendar ti dalam Berita Manah, aku lalu bejaku ngagai Peter di mua semua sida, “Nuan tu orang Judah, tang nuan diau baka orang bansa bukai, ukai baka orang Judah. Nya alai baka ni ku nuan tau mejalka orang bansa bukai diau baka orang Judah?”

¹⁵“Kitai tu orang Judah ari ada, ukai orang bansa bukai ke bedosa;

¹⁶ tang taja pia, kitai nemu, orang digaga lurus ukai laban sida ngasika Adat, tang ulih pengarap sida ke Jesus Kristus.[11] Nya alai kitai mega udah manggaika pengarap kitai ba Jesus Kristus, ngambika kitai digaga lurus[12] ulih pengarap kitai ke Iya, lalu ukai laban kitai ngasika Adat, laban Adat enda ulih ngaga orang nyadi lurus.[13]

¹⁷“Tang enti sema kitai ditemu bedosa lebuh kitai bebendar diau lurus dalam Kristus, kati nya nunjukka Kristus ngasuh kitai dosa? Ukai!

¹⁸Tang enti aku nirika utai ti udah dirubuh aku, nya nunjukka aku udah ngelanggar Adat.

¹⁹Laban, ulih Adat, aku udah mati ke Adat, ngambika aku tau idup ke Allah Taala. Aku udah diregang enggau Kristus;[14]

²⁰ nya alai[15] ukai aku ke idup, tang Kristus ke idup dalam aku, lalu pengidup aku dalam tubuh tu nya pengidup ulih pengarap aku ke Anak Allah Taala, ke udah rinduka aku lalu udah nyerahka Diri ketegal aku.

²¹Aku enda nulak pengasih Allah Taala; laban enti orang digaga lurus ulih Adat, reti nya Kristus udah lebu ngapa mati!”