Read Iban Galatia 3 Bible Online

Galatia 3 - Iban bible

Galatia 3

¹Kita orang Galatia amat beli! Sapa udah ngasuh kita beli? Kita udah dipadahka enggau terang pasal Jesus Kristus ke diregang.

²Awakka aku nanyaka tu ngagai kita: Kati kita nerima Roh Allah Taala laban kita ngasika Adat, tauka laban kita ninga lalu arapka utai ti didinga kita?

³Nama kebuah kita beli baka tu? Kita udah belabuh ngena Roh Allah Taala, kati kita diatu deka ngujungka nya ngena pengering mensia?[16]

⁴Kati utai ti udah diasaika kita nya nadai reti magang ba kita? Enti utai nya amat nadai reti.

⁵Kati Allah Taala meri kita Roh Kudus lalu ngereja kereja ajih ba bala kita laban kita nitihka Adat, tauka laban kita arapka utai ti didinga kita?

⁶ Peratika Abraham. “Iya arapka Allah Taala lalu ketegal nya Allah Taala[17] ngumbai iya lurus.”

⁷ Nya alai, ari nya kita nemu, semina orang ke arap aja ke nyadi peturun Abraham.

⁸ Lalu Bup Kudus nemu Allah Taala deka ngaga orang bansa bukai lurus ulih pengarap, nya alai Berita Manah nya udah dulu dipadahka ngagai Abraham: “Semua bansa deka diberekatka nengah nuan.”

⁹ Nya alai, orang ke arap deka diberekatka sama enggau Abraham ke arap.

¹⁰ Semua orang ke manggaika diri ba Adat, ditinggang sumpah; laban endang udah ditulis, “Tulah meh semua orang ke enda nitih sereta enda ngasika semua utai ti ditulis dalam Bup Adat!”

¹¹ Nya alai utai tu terang: nadai orang digaga lurus di mua Allah Taala ulih Adat laban “Orang ke lurus deka idup ngena pengarap.”[18]

¹² Tang Adat ukai bepanggai ba pengarap, laban, “Orang ke ngereja semua utai nitihka Adat, deka idup nitihka Adat.”

¹³ Kristus nebus kitai ari sumpah ti dibai Adat, laban Iya udah nejuka Diri ditinggang sumpah ngarika kitai, laban endang udah ditulis, “Tulah meh semua orang ke digantung ari kayu,”

¹⁴ngambika, ulih Jesus Kristus, berekat ti diberi ngagai Abraham tau diberi ngagai orang bansa bukai, ngambika kitai, ulih pengarap, tau nerima Roh Kudus ti udah disemaya.

¹⁵Aku ngambi siti chunto ari utai ti nyadi tiap hari, menyadi: lebuh sempekat[19] udah disain, nadai orang tau nambahka leka jaku ngagai sempekat nya, tauka muai sempekat nya.

¹⁶ Nyadi semaya[20] udah diberi ngagai Abraham, enggau ngagai siku peturun iya. Bup Kudus nadai nyebut “bala peturun”, tang semina siku aja peturun, “ngagai siku peturun nuan,” iya nya Kristus.

¹⁷ Utai ti ku aku nya: Adat ti digaga empat ratus tiga puluh taun udah bekau sempekat nya diberi, enda ulih muai sempekat enggau semaya Allah Taala.

¹⁸ Laban enti berekat nya datai ari Adat, iya ukai datai ari semaya. Tang Allah Taala meri berekat ngagai Abraham ngena semaya.

¹⁹ Enti pia, nama guna enggau Adat? Adat diberi laban kitai bepenyalah. Tang Adat dikena semina nyentuk ngagai maya penatai siku peturun[21] ti udah disemaya. Adat nya udah diberi bala melikat ngagai siku seruan, lalu seruan nya meri Adat nya ngagai orang mayuh.

²⁰Kitai enda begunaka seruan, enti kitai semina bejakuka siku aja orang. Lalu Allah Taala endang siku aja.[22]

²¹ Kati nya nunjukka Adat ngelaban semaya Allah Taala? Ukai! Laban enti Adat ulih meri pengidup, pengelurus tentu datai nengah Adat.

²² Tang Bup Kudus madahka semua dunya diperintah dosa, ngambika berekat ti udah disemaya diberi ngagai orang ke arap, ulih pengarap sida ke Jesus Kristus.

²³Sebedau pengarap datai, kitai kena jil sereta dijaga Adat nyentuk ngagai maya pengarap dipandangka.

²⁴Nya alai kitai diperintah Adat nyentuk ngagai maya penatai Kristus, ke deka ngaga kitai lurus ulih pengarap.

²⁵Diatu pengarap nya udah datai, nya alai kitai nadai agi diperintah Adat,

²⁶laban dalam Jesus Kristus semua kita nyadi anak Allah Taala, ulih pengarap.

²⁷Semua kita ke udah dibaptisa dalam Kristus,[23] udah ngerasukka Kristus.

²⁸ Kita ukai orang Judah agi tauka orang bansa bukai agi, ukai ulun tauka ulun, ukai lelaki, ukai indu, laban semua kita nyadi siku dalam Jesus Kristus.

²⁹ Lalu enti kita enggi Kristus, reti nya kita peturun Abraham, bempu waris nitihka semaya.