Read Iban Galatia 4 Bible Online

Galatia 4 - Iban bible

Galatia 4

¹Utai ti ku aku nya baka tu: lebuh orang ke bempu waris nya agi mit, iya sigi baka ulun, taja pen iya deka bempu reta tengkira jemah ila;

²tang iya diibun nyentuk ngagai maya ti chukup ku apai iya.

³ Baka nya mega kitai. Lebuh kitai agi mit, kitai nyadi ulun roh ti merintah di dunya tu.

⁴Tang lebuh timpuh udah chukup, Allah Taala ngirumka Anak Iya, diadaka siku indu, diadaka di baruh Adat,

⁵ ngambika Iya nebus orang ke di baruh Adat, ngambika kitai diberi semua hak[24] nyadi anak Allah Taala.

⁶ Lalu laban kita tu anak, Allah Taala udah ngirumka Roh Anak Iya ke dalam ati kitai. Roh Anak Iya nya ti ngangau, “Abba![25] Apai!”

⁷Nya alai, kita ukai ulun agi, tang anak, lalu enti kita nya anak, Allah Taala udah ngasuh kita bempu waris.

⁸Dulu suba, lebuh kita apin nemu Allah Taala, kita nyadi ulun utai ti ukai petara;

⁹tang diatu, kita udah nemu Allah Taala, tauka iya ti betul agi, Allah Taala udah nemu kita, nya alai nama kebuah kita keran deka nikal baru ngagai roh ti lemi, ti seranta, lalu nyadi ulun sida baru?

¹⁰Kita ngintu hari, bulan, musin enggau taun.

¹¹Lebu ngapa meh aku udah gawa ba bala kita.

¹²Aku minta kita, menyadi, nyadi baka aku, laban aku udah nyadi baka kita. Kita nadai udah ngereja utai ti salah ngagai aku.

¹³ Kita nemu, aku terubah nusui Berita Manah ngagai kita suba ketegal penyakit;

¹⁴taja pen penyakit aku balat ngiruh kita, kita enda ngelese tauka ngemaruhka aku, tang nerima aku baka ke nerima melikat Allah Taala, baka ke nerima Jesus Kristus.

¹⁵Kini ke tunga pengaga kita? Laban, aku madah ngagai kita, enti kita ulih, kita tentu udah ngeruk mata kita empu, lalu meri mata nya ngagai aku.

¹⁶Kati aku diatu nyau nyadi munsuh kita, laban aku madahka utai ti bendar ngagai kita?

¹⁷Orang bukai nyangka amat ibuhka kita, tang ukai enggau juluk ati ti manah. Sida semina nguji nyeraraka kita ari aku, ngambika kita keras nitihka sida.

¹⁸Manah amat enti orang nemu ibuh beduduk ba juluk ati ti manah, lalu ukai semina lebuh aku begulai enggau kita.

¹⁹ Anak, aku tu baka indai ke radai deka beranak, nganti Kristus ditempa dalam kita.

²⁰Naka meh pemanah enti aku tak begulai enggau kita diatu, ngambika aku enda ibuh bejaku munyi tu, laban aku beba ati berundingka kita tu!

²¹Awakka aku nanya kita ke ingin diperintah Adat: kati kita enda ninga utai ti disebut Adat?

²² Laban endang udah ditulis, Abraham bisi dua iku anak, siku diadaka indu ke ulun, lalu siku diadaka indu ke ukai ulun.

²³ Anak ke diadaka indu ke ulun nya ada ngena jalai selama, tang anak ke diadaka indu ke ukai ulun, ada nitihka semaya.

²⁴Tu tau diambi nyadika jaku sempama: indu dua iku nya nandaka dua bengkah sempekat. Siti sempekat nya ari Bukit Sinai, ke ngadaka anak ke deka nyadi ulun. Indu nya Hagar.

²⁵Nyadi Hagar nya ngambarka Bukit Sinai di menua Arabia. Iya nandaka nengeri Jerusalem ti diatu, laban iya nyadi ulun sama enggau anak iya.

²⁶ Tang Jerusalem ti di serega nya ukai ulun, lalu iya nya indai kitai.

²⁷ Laban endang udah ditulis, “Rami gaga ati meh nuan, indu ke mandul! nuan ke nadai kala beranak, manjung sereta belagu meh nuan ke nadai kala ngasaika pemedis beranak! Laban anak ke diadaka indu ke nadai laki, mayuh agi ari anak ke diadaka indu ke bisi laki.”

²⁸Diatu kita, menyadi, nyadi anak Allah Taala ari semaya, baka Isak.

²⁹ Lebuh maya nya menya, anak ke diadaka ngena jalai selama, beduan anak ke diadaka ulih Roh Kudus; nya meh gaya utai ti nyadi diatu.

³⁰ Tang nama utai ti disebut Bup Kudus? “Buru indu ke ulun nya enggau anak iya; laban anak indu ke ulun nya enda tau enggau bempu reta tengkira ti diempu anak ke diadaka indu ke ukai ulun.”

³¹Nya alai, menyadi, kitai tu ukai anak ari indu ke ulun, tang anak ari indu ke ukai ulun.