Read Iban Galatia 5 Bible Online

Galatia 5 - Iban bible

Galatia 5

¹Laban Kristus udah ngelepaska kitai ngambika kitai amat-amat dilepaska. Nya alai bediri tegap, lalu anang nejuka diri dikungkung nyadi ulun baru.

²Dinga kita! Aku, Paul, madah ngagai kita, enti kita nejuka diri ditutus, Kristus nadai guna ba kita.

³Sekali agi aku bejaku ngagai genap iku orang ke nejuka diri ditutus: iya enda tau enda ngasika semua Adat.

⁴Kita ke nguji diau lurus[26] ulih Adat, udah ngetas diri ari Kristus; kita udah tebelengka ari pengasih Allah Taala.

⁵Laban ulih Roh Kudus enggau ulih pengarap, kitai gagit ati nganti pengelurus ti disadang kitai.

⁶ Laban dalam Jesus Kristus, pengawa betutus tauka enda betutus, sigi nadai reti. Utai ti beguna nya pengarap ti ngayanka diri ulih pengerindu.

⁷Kita udah maju amat! Sapa udah nagang kita ngasika pemendar?

⁸Jaku pujuk ti baka nya ukai datai ari Allah Taala ke ngangauka kita.

⁹ Ka semina mimit aja ragi diguna kena ngasuh semua tepung kembai.

¹⁰Tang aku nemu, dalam Tuhan, kita tetap enda ngembuan penemu bukai. Tang barang sapa udah nyarutka runding kita, deka diukum.

¹¹Menyadi, nama kebuah aku agi kena perinsa enti aku amat agi mengkang ngajar pasal adat betutus? Enti aku agi mengkang ngajar nya, reti nya ajar aku pasal regang Kristus enda patut ngasuh orang pedis ati.

¹²Manah agi enti orang ke ngachau runding kita tak terus netak utai sida empu![27]

¹³Laban kita, menyadi, udah dikangauka ngagai pengelepas. Tang anang ngena pengelepas nya nyadika peluang kena kita nurutka pengingin tubuh, tang kena nulung pangan diri ulih pengerindu.

¹⁴ Laban semua Adat disimpul ngena siti aja pesan: “Rinduka pangan diri baka kita ke rinduka diri empu.”

¹⁵Tang enti kita ngigit lalu bepakaika[28] pangan diri, bejaga kita, enggai ke kita diempa[29] pangan diri.

¹⁶Tang aku madah ngagai kita, idup nitihka iring Roh Kudus, lalu anang nurutka pengingin tubuh.

¹⁷ Laban utai ti dikinginka tubuh bemunsuh ngelaban utai ti dikinginka Roh Kudus, lalu utai ti dikinginka Roh Kudus bemunsuh ngelaban utai ti dikinginka tubuh, laban utai dua bengkah nya endang bemunsuh ngelaban pangan diri, lalu nagang kita ngereja utai ti dikedekaka kita.

¹⁸Tang enti kita diiring Roh Kudus, kita ukai diperintah Adat.

¹⁹ Utai ti dikereja mensia endang nyata: bambai, runding ti kamah, kereja ti kamah,

²⁰besembahka engkeramba, bemanang, bemunsuh, charut enggau pangan diri, kepapas, belaya, bepechah-belah, beripih,

²¹ngining orang, pemabuk, berami enda beiga-iga, enggau utai ti baka nya. Aku meri kita jaku tangkan, baka ti udah dikereja aku suba: orang ke ngereja utai nya enda ulih bempu Perintah Allah Taala.

²²Tang buah Roh Kudus nya pengerindu, pengaga, pemaik, pengeliat ati, penyiru, pemadas, penetap ati,

²³penelap, ulih nagang diri. Nadai adat ngelaban utai nya.

²⁴Lalu orang ke enggi Jesus Kristus, udah ngeregang tubuh sama enggau penenguk enggau pengingin iya.

²⁵Enti kitai idup nitihka Roh Allah Taala, awakka Roh nya meh ngiring kitai.

²⁶Anang sumbung; anang nyemekih[30] pangan diri; anang ngining pangan diri.