Read Iban Galatia 6 Bible Online

Galatia 6 - Iban bible

Galatia 6

¹Menyadi, enti orang bisi ditemu ngereja penyalah, kita ke udah nerima Roh Kudus patut mai iya pulai baru ngagai jalai ti ngena enggau chara ti nelap. Tang bejaga kita, enggai ke kita empu kena laban penguji.

²Besaup mai ma pangan diri; nya meh jalai kita ngamatka adat Kristus.

³Laban enti orang ngumbai diri pama agi ari ti patut, iya nipu diri empu.

⁴Genap iku kita patut meresa pengawa diri. Nya baru iya tau temegahka diri empu, ukai temegahka orang bukai.

⁵Laban genap iku kita enda tau enda mai ma diri empu.

⁶Orang ke diajar pasal pesan Allah Taala, enda tau enda bekunsika semua utai ti manah enggau pengajar iya.

⁷Anang nejuka diri ditipu. Allah Taala enda ulih dikeleseka, laban kita deka ngetau utai ti ditanam kita empu.

⁸Enti kita nanam nitihka pengingin tubuh, kita deka ngetau pemati, tang enti kita nanam nitihka iring Roh Kudus, kita deka ngetau, ari Roh Kudus, pengidup ti meruan belama iya.

⁹Nya alai anang leju ngereja utai ti badas, laban ba maya ti patut kitai deka ngetau, enti kitai enda mantul ngapa.

¹⁰Nya alai, genap kali kitai bisi peluang, kereja pengawa ti badas ngagai semua orang, kelebih agi ngagai orang ke sama pengarap enggau kita.

¹¹ Peda kita pemesai tulis aku lebuh aku nulis ngena jari aku empu!

¹²Semina orang ke minta diri dipuji mensia ba tubuh aja ke mejalka kita ditutus, lalu sida ngereja nya ngambika sida enda kena perinsa ketegal regang Kristus.

¹³Indah orang ke ditutus deh enda nitihka Adat. Tang sida dekaka kita ditutus ngambika sida ulih ngemegahka diri ketegal kita.

¹⁴Tang aku enggai temegahka utai ti baka nya, tang semina temegahka regang Jesus Kristus Tuhan kitai, ti udah dikena ngeregang dunya ke aku, lalu aku diregang ke dunya.

¹⁵Laban betutus tauka enda betutus sigi nadai reti. Utai ti beguna nya nyadi mensia ti baru.

¹⁶ Awakka pemaik enggau pengasih meruan enggau semua orang ke nitihka adat tu, nyengkaum orang Israel ke nembiak Allah Taala.

¹⁷Berengkah ari diatu, awakka orang enda agi ngenusahka aku, laban aku mai litan Jesus ba tubuh aku tu.[31]

¹⁸Awakka pengasih Jesus Kristus Tuhan kitai meruan enggau kita semua, menyadi. Amin.