Read Iban Epesus 1 Bible Online

Epesus 1 - Iban bible

Epesus 1

¹ Surat ari Paul, ke nyadi rasul Jesus Kristus ulih peneka Allah Taala, Ngagai bala nembiak Tuhan ke diau di Epesus,[1] ke tetap ati dalam Jesus Kristus:

²Awakka Allah Taala ti Apai kitai enggau Tuhan Jesus Kristus meri kita berekat enggau pemaik.

³ Pujika Allah Taala ti Apai Jesus Kristus Tuhan kitai, ke udah merekatka kitai dalam Kristus ngena semua berekat roh di serega.

⁴Laban Iya udah milih kitai dalam Kristus sebedau dunya digaga, ngambika kitai kudus, lalu nadai bepenyalah di mua Iya. Ulih pengerindu

⁵Iya udah milih kitai, ulih Jesus Kristus, ngambika kitai diiru nyadi anak Iya nitihka peneka enggau juluk ati Iya.

⁶ Beri meh puji ngagai Allah Taala ketegal pengasih Iya ti bemulia ti udah diberi Iya pechuma ngagai kitai dalam Anak ke dikerinduka Iya.

⁷ Dalam Iya kitai ditebus ulih darah Iya, iya nya dosa kitai diampun, nitihka pemesai pengasih Iya

⁸ti udah dituang Iya ngagai kitai ngena semua penemu-dalam enggau pemereti ati Iya.

⁹Lalu Iya udah madahka ngagai kitai misteri peneka Iya, nitihka juluk ati Iya ti diletak Iya dalam Kristus,

¹⁰ ti deka dipejalaika Iya ba maya ti patut, iya nya, ngempuruka semua utai ti di serega enggau di dunya, di baruh siku kepala, iya nya Kristus.

¹¹Dalam Kristus kitai mega udah dipilih[2] nitihka pelan Iya ke ngereja semua utai nitihka juluk ati enggau peneka Iya,

¹²ngambika kitai, ke terubah-rubah manggaika pengadang ba Kristus, ulih idup lalu muji mulia Iya!

¹³Lalu kita mega nyadi nembiak Kristus lebuh kita ninga pesan ti bendar, iya nya Berita Manah ti mai pengelepas ngagai kita, lalu lebuh kita udah arapka Iya, kita lalu ditanda ngena Roh Kudus ti udah disemaya.

¹⁴ Roh Kudus nya nyadika jamin kitai deka nerima pesaka, iya nya penebus kitai ke enggi Allah Taala. Pujika mulia Allah Taala!

¹⁵ Aku bisi udah ninga pasal pengarap kita ke Tuhan Jesus, enggau pasal pengerindu kita ke semua nembiak Tuhan. Nya kebuah

¹⁶ aku enda ngetu-ngetu meri terima kasih ke kita lebuh aku ngingatka kita dalam sampi aku.

¹⁷Aku besampi minta Apai ti bemulia, Allah Taala Jesus Kristus, meri kita Roh penemu-dalam enggau pemandang ngambika kita lebih agi nemu Iya.

¹⁸ Aku mega besampi ngambika mata ati kita diberi penerang, ngambika kita nemu pengadang, laban kita udah dikangauka ngagai pengadang nya, iya nya pemayuh pesaka ti bemulia ti disedia Iya ke bala nembiak Iya,

¹⁹enggau pemesai kuasa Iya ti nadai banding, ke kitai ti arap. Kuasa nya sebaka enggau kuasa ti besai

²⁰ ti udah dikena Iya ngangkatka Kristus ari mati, lalu nudukka Iya muak ari kanan Iya Empu di serega,

²¹ jauh ari atas semua adat enggau pemerintah, kuasa, enggau perintah, enggau ari atas semua nama, ukai semina di dunya tu, tang mega di dunya ti deka datai.

²² Lalu Iya udah ngengkahka semua utai di baruh kaki Kristus, lalu udah ngeletak Iya ari atas semua utai, ke penguntung eklisia.

²³ Eklisia nya tubuh Kristus, ti penuh laban semua personaliti Kristus Empu ke menuhka semua utai di semua endur.