Read Iban Epesus 2 Bible Online

Epesus 2 - Iban bible

Epesus 2

¹ Kita menya mati laban penyalah enggau dosa,

²lebuh kita agi diau nurutka sida, nitihka chara dunya, nitihka pemerintah ti merintah kuasa ti di langit, iya nya roh ti benung bekereja ba orang ke enda ngasika Allah Taala.

³Semua kitai suba udah idup begulai enggau sida, nurutka pengingin mensia, nurutka pengingin tubuh enggau runding mensia. Nya alai Allah Taala ringat ngagai kitai, baka Iya ke ringat ngagai semua orang bukai.

⁴Tang laban Allah Taala balat rinduka kitai, ulih pemesai pengasih Iya,

⁵Iya udah ngasuh kitai idup begulai enggau Kristus, taja pen kitai udah mati dalam dosa kitai -- kita diselamatka ulih pengasih.

⁶Lalu Iya ngangkatka kitai idup baru enggau Kristus, lalu ngasuh kitai duduk enggau Iya di serega dalam Jesus Kristus,

⁷ngambika, dalam dunya ti deka datai, Iya ulih mandangka pemesai pengasih Iya ti nadai banding, ngena penelap ati Iya ke kitai dalam Jesus Kristus.

⁸ Laban kita udah diselamatka ulih pengasih, ketegal pengarap. Pengelepas nya ukai utai ti ulih kita ari pengawa kita; pengelepas nya pemeri Allah Taala,

⁹ukai datai ari pengawa ti dikereja kita, ngambika kita enda ulih temegahka nya.

¹⁰Laban kitai digaga Allah Taala, ditempa Iya dalam Jesus Kristus ngambika kitai ngereja pengawa ti manah ti udah disedia Allah Taala ke kitai nyadika jalai pengidup kitai.

¹¹Nya alai ingat: dulu suba kita orang bansa bukai, lalu orang Judah ke betutus ngumbai kita “orang ke enda betutus” (utai ti dikereja jari mensia ba tubuh mensia).

¹² Ingat: dulu suba kita nadai Kristus, diseraraka ari bansa orang Israel, nadai ungkup dalam sempekat, nadai pengadang, lalu nadai Allah Taala di dunya tu.

¹³Tang diatu, dalam Jesus Kristus, kita ke udah diau jauh suba, udah dibai semak, ulih darah Kristus.

¹⁴Laban Kristus Empu nyadika pemaik kitai. Ngena tubuh Iya Empu, Iya udah ngaga orang Judah enggau orang bansa bukai nyadi siku, lalu udah ngeruntuhka dinding pemenchi ti nyeraraka kitai.

¹⁵ Iya udah muai Adat enggau semua pesan enggau atur ti dalam Adat, ngambika Iya, dalam Iya Empu, ngaga siti aja bansa kena Iya nganti dua bengkah bansa nya, lalu mai pemaik ngagai sida.

¹⁶ Iya lalu mai bansa dua bengkah nya bebaik enggau Allah Taala, dalam siti tubuh, ulih kayu regang, lalu munuh ati sida ti seruran deka bemunsuh enggau pangan diri.

¹⁷ Nya alai Kristus datai lalu madahka pemaik ngagai kita ke jauh ari Allah Taala, enggau ngagai orang Judah ke semak Iya,

¹⁸laban ulih Kristus, kitai sama ulih datai ngagai Apai ulih siku Roh.

¹⁹Nya alai, kita ukai temuai agi, ukai orang kampar agi, tang sama nyadi peranak enggau bala nembiak Tuhan, nyadi raban ruang bilik Allah Taala.

²⁰Ruang bilik nya didirika ba atas pugu ti didudukka sida rasul enggau sida nabi, lalu Jesus Kristus Empu nyadika batu pemun nya.

²¹Dalam Iya semua perengka rumah nya dipejantilka lalu mansang nyadi rumah sembiang ti kudus dalam Tuhan.

²²Lalu dalam Iya kita mega didirika nyadi rumah alai Roh Allah Taala diau.