Read Iban Epesus 3 Bible Online

Epesus 3 - Iban bible

Epesus 3

¹Nya kebuah aku, Paul, nyadi orang jil Jesus Kristus ke penguntung kita orang bansa bukai.

² Kita tentu udah ninga pasal Allah Taala ke udah, ulih pengasih Iya, meri aku pengawa ke penguntung kita,

³enggau pasal jalai misteri nya udah dipadahka ngagai aku ngena pemandang, munyi ti udah ditulis aku mimit.

⁴ Lebuh kita macha tu, nya baru kita meretika utai ti ditemu aku pasal misteri Kristus,

⁵misteri ti nadai udah kala dipandangka ngagai bala anak mensia ba serak ti bukai, baka ti udah dipandangka Roh Kudus diatu ngagai sida rasul Iya ti kudus enggau ngagai sida nabi.

⁶ Misteri nya baka tu: Ulih Berita Manah, orang bansa bukai udah dibai sama enggau orang Judah bempu pesaka, nyadi raban tubuh nya, lalu sama enggau bempu utai ti udah disemaya dalam Jesus Kristus.

⁷Aku nyadi ulun Berita Manah tu ari pengasih Allah Taala, pengasih ti udah diberi ngagai aku ulih kuasa Iya ti bekereja dalam aku.

⁸Taja pen aku tu orang ke pemadu mit ari semua nembiak Tuhan, pengasih tu udah diberi ngagai aku, iya nya nusui ngagai orang bansa bukai pasal pemesai pengaya Kristus,

⁹ lalu mai semua bansa nemu misteri Iya ti dilalaika sejeman-jeman tu dalam Allah Taala ke ngaga semua utai;

¹⁰ngambika diatu, ulih eklisia, semua penemu-dalam Allah Taala dipadahka ngagai bala pemerintah, enggau kuasa ti di langit,

¹¹nitihka juluk ati Iya ti meruan belama iya, ti udah dipejalaika Iya dalam Jesus Kristus Tuhan kitai.

¹²Dalam Iya enggau ulih pengarap kitai ke Iya, kitai berani sereta kempang ati datai ngagai Allah Taala.

¹³Nya alai aku enda nyagi kita mantul ngapa ketegal pemerinsa aku ke kita, laban nya pulai ke mulia kita.

¹⁴Nya meh kebuah aku besugang di mua Apai,

¹⁵ke meri nama ngagai semua ruang bilik ti di serega enggau di dunya.

¹⁶Aku besampi ngambika, ari pemesai pengaya Iya ti bemulia, Iya ngeringka ati kita ngena kuasa ulih Roh Iya,

¹⁷sereta ngambika Kristus diau dalam ati kita, ulih pengarap, lebuh kita beurat sereta negapka diri dalam pengerindu.

¹⁸ Aku besampi ngambika kita, sama enggau semua nembiak Allah Taala, bisi kuasa kena nemu pemesai, pemanjai, peninggi enggau penalam

¹⁹pengerindu Kristus ti ngelui peragam mensia, ngambika kita dipenuhka enggau semua personaliti Allah Taala.

²⁰Ngagai Iya ke ulih ngereja utai lebih ari ti dipinta tauka diperagam kitai, ulih kuasa ti bekereja dalam kitai,

²¹awakka semua turun-menurun dalam eklisia, enggau dalam Jesus Kristus, ngemuliaka Iya belama-lama iya. Amin.