Read Iban Epesus 4 Bible Online

Epesus 4 - Iban bible

Epesus 4

¹Nya alai aku, ke nyadi orang jil Tuhan, bebendar minta kita diau menyana nitihka kangau Tuhan,

² baruh ati, nelap, liat ati, sabar enggau pangan diri dalam pengerindu,

³lalu enggau naka ulih nyaga penyerakup dalam Roh ngena pemaik ti nanggam kita semua.

⁴Tubuh siti aja, lalu Roh Kudus siku aja, baka kita ke udah dikangauka ngagai siti aja pengadang,

⁵siku aja Tuhan, siti aja pengarap, siti aja pemaptisa,

⁶siku aja Allah Taala ti Apai semua, ke ari atas semua, ke bekereja ngena semua, dalam semua.

⁷Tang genap iku kitai udah diberi pengasih nitihka pemesai ungkup ti diletak Kristus.

⁸ Nya kebuah Bup Kudus nyebut, “Lebuh Iya niki ke atas ngagai endur ti pemadu tinggi, Iya mai mayuh orang tangkap enggau Iya; Iya meri pemeri ngagai mensia.”[3]

⁹(Nama reti “Iya niki”? Reti nya, terubah, Iya nurun ngagai buntut dunya.

¹⁰Iya ke nurun nya mega Iya ke niki ke atas jauh ngilah semua langit, ngambika Iya ngemenuhka semua utai enggau Iya Empu.)

¹¹Iya nya ke meri pemeri ngambika sekeda nyadi rasul, sekeda nyadi nabi, sekeda nyadi penginjil, sekeda nyadi gembala[4] lalu sekeda nyadi pengajar,

¹²kena nyikap[5] nembiak Tuhan ngereja pengawa orang Kristian, kena ngemansangka tubuh Kristus,

¹³datai ke semua kitai nyau segempung magang dalam pengarap, sama sepenemu pasal Anak Allah Taala, nyadi orang ke besai tuai lalu nyadi sebaka enggau Kristus.

¹⁴Kitai enda tau agi nyadi anak mit ke dikebu lalu ditabanka kia-kia ulih genap macham ajar ti datai ari akal mensia, enggau ulih kelakar orang ke nipu.

¹⁵ Tang kitai patut bejakuka pasal utai ti bendar dalam pengerindu, mansang dalam semua utai ngagai Iya ke nyadi kepala, iya nya Kristus,

¹⁶ ke bejantilka semua perengka tubuh, lalu nanggam sida ngena semua rakat ti diberi ngagai tubuh nya, lalu ngasuh semua perengka tubuh nya sama bekereja enggau menyana ngemansang lalu niri negika tubuh nya dalam pengerindu.

¹⁷Nya alai, aku netap lalu nekanka tu dalam nama Tuhan: badu agi diau baka orang bansa bukai ke enda menuku runding.

¹⁸Runding sida nyau petang, lalu sida diseraraka ari pengidup Allah Taala laban sida nadai nemu utai sereta kieh.

¹⁹Sida nyau enda nemu malu agi, lalu udah nyerahka diri ngagai pengidup ti kamah, sereta seruran ingin deka ngereja semua macham ulah ti kamah.

²⁰Nya ukai utai ti dipelajarka kita pasal Kristus!

²¹Laban kita tentu udah ninga lalu diajar pasal Iya, laban pemendar endang dalam Jesus.

²² Kita udah diajar muai jalai pengidup kita ti lama, ulah ti lama ti dirusak sereta ditipu pengingin pengidup nya,

²³lalu ngelakka runding enggau ati kita diubah nyadi baru,

²⁴ lalu kita nyadi mensia ti baru, ditempa neladan gamal Allah Taala lalu nyadi amat lurus sereta kudus.

²⁵ Nya alai, badu agi bula! Awakka semua kitai nyebut utai ti bendar ngagai pangan diri, laban semua kitai tu raban siti tubuh.[6]

²⁶ Anang bedosa lebuh kita ringat. Anang ringat apus hari,

²⁷lalu anang meri peluang ngagai Sitan.

²⁸Orang ke penchuri enda tau enda badu agi ngenchuri, lalu ngereja pengawa ti menyana ngena jari iya empu, ngambika iya bisi utai dipekunsika enggau orang ke suntuk.

²⁹Anang mansutka jaku ti jai, tang semina nyebut jaku ti manah kena ngemansangka pengarap orang, ba maya ti patut, ngambika jaku nya meri berekat ngagai orang ke ninga.

³⁰Lalu anang ngenusahka ati Roh Kudus Allah Taala, ke udah dikena ngechop kita ke Hari Penebus.

³¹Buai semua dengki, tebiat ngeransi, pengeringat, jaku laya, tebiat bejakuka orang, enggau semua ati ti begedi,

³² lalu nelap enggau pangan diri, siru enggau pangan diri, ngampun pangan diri, baka Allah Taala, dalam Kristus, ke udah ngampun kita.[7]