Read Iban Epesus 5 Bible Online

Epesus 5 - Iban bible

Epesus 5

¹Nya alai tunda teladan Allah Taala, laban kita tu anak ke dikesayauka Iya.

² Lalu idup dalam pengerindu, baka Kristus ke udah rinduka kitai, lalu udah nyerahka Diri ketegal kitai, nyadika genselan enggau piring ti bebau rengut, ti diberi ngagai Allah Taala.

³Tang pengawa bambai, enggau semua ulah ti kamah, tauka pengamu enda patut nyadi ba bala kita, laban kita nembiak Tuhan.

⁴Anang bejaku kamah, tauka bejaku beli, tauka enda senunuh[8] bejaku laban utai nya enda patut; tang beri terima kasih ngagai Allah Taala.

⁵Kita enda tau enda nemu tu: orang ke bambai, tauka ngereja ulah ti kamah, tauka orang ke amu (sama reti enggau nyembah engkeramba), nadai ungkup dalam Perintah Kristus, enggau dalam Perintah Allah Taala.

⁶Anang nejuka orang nipu kita ngena jaku ti nadai reti, laban nya utai ti nyungkak Allah Taala ringat ngagai orang ke enda ngasika Iya.

⁷Nya alai anang begulai enggau orang ke baka nya.

⁸Laban dulu menya kita nya pemetang, tang diatu, dalam Tuhan, kita nyadi penampak. Nya alai, idup[9] baka anak penampak,

⁹laban penampak[10] mansutka semua buah ti badas, ti ngena, ti bendar.

¹⁰Uji giga utai ti ngerinduka ati Tuhan.

¹¹Anang enggau orang ngereja pengawa pemetang ti nadai guna, tang pansutka penyai sida.

¹²Indah nyebut utai ti dikereja sida belalai deh kitai malu.

¹³Tang semua utai ti diayanka penampak, deka nyata magang dipeda,

¹⁴laban penampak ngasuh semua utai nyata magang dipeda. Nya kebuah Bup Kudus nyebut: “Dani meh kita ke tinduk! Angkat ari pemati, lalu Kristus deka manchar ngagai kita.”

¹⁵Nya alai idup enggau bejimat, ukai baka orang ke beli, tang baka orang ke bepenemu-dalam.

¹⁶ Kena semua peluang[11] kita enggau badas, laban hari tu jai.

¹⁷Nya alai, anang beli, tang giga semua peneka Tuhan.

¹⁸Anang mabuk beirupka wain, laban pengawa nya jai, tang awakka kita dipenuhka enggau Roh Kudus,

¹⁹ bejaku enggau pangan diri ngena masmur, pantun enggau lagu Roh, belagu muji Tuhan dalam ati kita,

²⁰seruran meri terima kasih ngagai Allah Taala ti Apai, ke semua utai dalam nama Jesus Kristus Tuhan kitai.

²¹Nunduk ngagai pangan diri, kena masa Kristus.

²² Kita ke bini, nunduk ngagai laki kita, baka ke nunduk ngagai Tuhan.

²³Laban laki nyadi kepala bini, baka Kristus ke nyadi kepala eklisia, iya nya tubuh Iya Empu, lalu Iya Empu nyadika Juruselamat ke eklisia nya.

²⁴Baka eklisia ke nunduk ngagai Kristus, baka nya mega bini patut nunduk ngagai laki dalam semua utai.

²⁵ Kita ke laki, rinduka bini kita, baka Kristus ke rinduka eklisia, lalu nyerahka Diri Empu ke eklisia,

²⁶ngambika nguduska eklisia, lebuh Iya udah nuchi eklisia nya ngena ai enggau ulih jaku Iya,

²⁷lalu nyerahka eklisia nya enggau semua pemadas iya ngagai Iya Empu, nadai bepetik, enda ngeriut, tauka utai ti baka nya, ngambika eklisia nya kudus sereta nadai penimpang.

²⁸Baka nya meh laki patut rinduka bini diri, baka iya ke rinduka tubuh diri empu. Laki ke rinduka bini diri, rinduka diri empu.

²⁹Laban nadai orang kala begedika tubuh diri, tang iya nupi sereta bejimat ngintu tubuh nya, baka ti dikereja Kristus ke eklisia,

³⁰laban kitai tu raban tubuh Iya.

³¹ “Nya kebuah lelaki ninggalka apai indai iya, lalu jadi enggau bini iya, lalu seduai iya nyadi setubuh enggau pangan diri.”

³²Tu misteri ti besai kena aku mandingka Kristus enggau eklisia.

³³Tang genap iku kita patut rinduka bini diri, baka kita ke rinduka diri empu, lalu bini patut masa laki.