Read Iban Epesus 6 Bible Online

Epesus 6 - Iban bible

Epesus 6

¹Kita ke anak, ngasika apai indai kita dalam Tuhan, laban utai nya ngena.

² “Bebasaka apai enggau indai nuan” - nya terubah-rubah pesan ti disempulang enggau semaya:

³ “ngambika nuan mujur, sereta panjai umur nguan menua.”

⁴ Lalu kita ke apai, anang ngereja utai ti tau ngemediska ati anak kita, tang iring sida nyadi orang ke besai tuai dalam disiplin enggau ajar Tuhan.

⁵Kita ke ulun, ngasika tuan kita enggau ati ti nangi sereta bejimat, enda belampung ati, baka ke ngasika Kristus;

⁶ukai semina lebuh sida meda kita, ketegal kita deka minta diri dipuji sida, tang laban kita ulun Kristus ke ngereja peneka Allah Taala enggau pengabis ati kita.[12]

⁷Kereja pengawa kita enggau ati ti ransing, baka ke ngereja pengawa ke Tuhan, ukai baka ke ngereja pengawa ke mensia,

⁸laban kita nemu, Tuhan deka ngupah genap iku kitai ketegal kereja ti manah ti dikereja kitai, nemuka kitai nya ulun tauka ukai ulun.

⁹ Lalu kita ke bempu ulun, kereja baka nya mega ngagai ulun kita. Badu agi ngemba sida, laban kita nemu, kita enggau sida sama besaumka siku aja Tuan di serega, lalu Iya enda bepilih mata.

¹⁰Ke pengujung iya, keringka diri dalam Tuhan, ngena pengering kuasa Iya.

¹¹ Rasukka semua senyata Allah Taala, ngambika kita ulih ngelaban akal Sitan.

¹²Laban kitai ukai beperang ngelaban isi enggau darah,[13] tang ngelaban bala pemerintah, ngelaban perintah, ngelaban kuasa dunya ti petang tu, enggau ngelaban kuasa roh ti jai di langit.

¹³Nya alai, rasukka semua senyata Allah Taala, ngambika kita tan lebuh hari ti jai nya datai, lalu lebuh kita udah ngereja semua utai, kita deka mengkang bediri tegap.

¹⁴ Nya alai bediri kita, lalu tanchangka pemendar nyadika belulang ba punggung kita, enggau pengelurus nyadika terabai dada kita,

¹⁵ enggau ati ti seruran sedia deka nusui Berita Manah pasal pemaik, nyadika kasut kita.

¹⁶Nambahka nya, ambi pengarap nyadika terabai kena kita madamka semua laja ti beapi-api ti ditimbakka Sitan.

¹⁷ Lalu ambi pengelepas nyadika selapuk kebal kita, enggau jaku Allah Taala nyadika pedang Roh.

¹⁸Besampi dalam Roh[14] tiap kali kita besampi, ngena semua macham sampi enggau peminta. Nya alai seruran bejaga lalu majak besampika semua nembiak Tuhan.

¹⁹Besampi mega ke aku ngambika lebuh aku bejaku, leka jaku diberi ngagai aku lebuh aku, enggau ati ti berani, madahka misteri Berita Manah,

²⁰laban aku nyadi pengari ke Berita Manah nya, taja pen aku kena jil ketegal Berita Manah nya. Besampi ke aku, ngambika aku berani nusui Berita Manah nya, laban aku enda tau enda nusui Berita Manah nya.

²¹ Menyadi kitai Taikikus, ke tetap ati nyadi ulun Tuhan, deka madahka semua utai ngagai kita, ngambika kita nemu pasal aku, enggau pasal utai ti dikereja aku.

²²Aku ngasuh iya nemuai ngagai kita ketegal tuju tu aja, ngambika kita nemu gaya pendiau kami, sereta meransang kita.

²³Awakka Allah Taala ti Apai, enggau Tuhan Jesus Kristus meri pemaik, pengerindu enggau pengarap ngagai semua orang Kristian.

²⁴Awakka berekat Allah Taala meruan enggau semua orang ke enda badu rinduka Tuhan Jesus Kristus.[15]