Read Iban Pilipi 1 Bible Online

Pilipi 1 - Iban bible

Pilipi 1

¹ Surat ari Paul enggau Timoti, ulun[1] Jesus Kristus Ngagai semua nembiak Tuhan ke diau di Pilipi, nyengkaum sida bishop[2] enggau sida dikon:[3]

² Awakka Allah Taala ti Apai kitai enggau Tuhan Jesus Kristus meri kita berekat enggau pemaik.

³Aku meri terima kasih ngagai Allah Taala aku ke kita genap kali aku ingatka kita.

⁴Dalam semua sampi aku ke semua kita, aku besampi enggau ati ti gaga,

⁵laban kenyau ari hari ti keterubah nyentuk ngagai diatu, kita udah sama enggau aku ngerembaika Berita Manah.

⁶ Lalu aku nemu, Allah Taala ke udah ngepunka pengawa ti badas tu ba kita, deka nembuka pengawa nya lebuh Hari Jesus Kristus.

⁷ Aku endang patut berunding baka tu ke semua kita, laban aku endang seruran ngingatka kita dalam ati aku, laban semua kita udah sama enggau aku ngereja pengawa ti udah diberi Allah Taala ngagai aku, nemuka lebuh aku bejaku ngarika sereta netapka pengamat Berita Manah dalam rumah jil tu tauka di luar.

⁸Laban Allah Taala nemu aku amat lelengauka kita ngena pengerindu Jesus Kristus.

⁹Tu sampi aku ke kita: minta pengerindu kita majak nambah-menambah, sama enggau penemu enggau penalam perening kita,

¹⁰ngambika kita nemu milih utai ti pemadu badas, lalu nyadi tuchi sereta nadai bepenyalah lebuh Hari Kristus,

¹¹penuh laban buah pengelurus ti datai ulih Jesus Kristus, ti mai puji enggau mulia ngagai Allah Taala.

¹² Aku dekaka kita nemu, menyadi, utai ti udah nyadi ba aku amat udah nulung ngerembaika Berita Manah,

¹³ datai ke semua orang ke nyaga istana Raja Besai, enggau semua orang bukai, nemu aku kena tan dalam rumah jil ketegal Kristus;

¹⁴lalu mayuh bala menyadi nyadi kempang ati dalam Tuhan, lalu majak berani agi nusui pesan Allah Taala.

¹⁵Sekeda amat madahka pasal Kristus laban sida kepapas tauka nyemekih pangan diri, tang sida ti bukai, ari ati ti manah.

¹⁶Raban ti kedua nya ngereja nya ari pengerindu, laban sida nemu aku udah dipaduka bejaku ngeringka Berita Manah.

¹⁷Raban ti keterubah nya, madahka pasal Kristus laban sida tinggi ati ke diri empu, ukai beduduk ba ati ti betul, laban sida nguji ngenusahka ati aku lebuh aku agi dalam rumah jil.

¹⁸Tang nya nadai ngawa, asal ga Berita Manah Kristus ditusui ngena semua macham chara, nemuka juluk ati nya salah tauka ngena. Lalu aku gaga ati ke nya.

¹⁹ Sigi amat, aku endang deka majak rami gaga ati, laban aku nemu, ari sampi kita, enggau ari tulung Roh Jesus Kristus, aku deka dilepaska.

²⁰ Aku endang ngarap sereta ngadang diri enda malu, tang bejaku enggau naka pemerani, ngambika Kristus seruran dimuliaka dalam tubuh aku baka selama, nemuka ngena pengidup tauka ngena pemati aku.

²¹ Laban ba aku, enti aku idup, aku idup ke Kristus, lalu enti aku mati, aku untung.

²²Enti aku majak idup di dunya tu, reti nya aku ulih ngereja mayuh agi pengawa ti beguna. Lalu aku enda nemu ni ti patut dipilih aku.

²³Aku enda nemu jalai milih utai ari utai dua bengkah nya. Aku bisi amat ati deka ninggalka pengidup tu, lalu begulai enggau Kristus, laban nya lebih manah agi;

²⁴tang aku beguna agi ba kita enti aku mengkang idup.

²⁵Nya alai laban aku nemu nya, aku nemu diri deka mengkang idup lalu majak diau enggau semua kita, ngemansang sereta meri pengaga ngagai kita dalam pengarap,

²⁶ngambika aku mayuh agi peluang temegah enggau kita dalam Jesus Kristus lebuh aku nemuai baru ngagai kita.

²⁷Utai ti lebih beguna nya, kita enda tau enda idup nitihka ajar ti dibai Berita Manah Kristus, ngambika, nemuka aku bisi enggau kita, tauka nadai enggau kita, aku ulih ninga[4] kita sama seati, sama sepenemu, begandin bau bebendar bekereja ke pengarap ti dibai Berita Manah,

²⁸ lalu enda takutka munsuh kita. Ba munsuh kita, tu nunjukka sida deka dirusak, tang ba kita, tu nunjukka kita dilepaska. Semua utai tu endang dikereja Allah Taala magang.

²⁹Laban ulih pengasih Iya, Iya udah meri kita hak ukai semina arapka Kristus, tang mega natka pemerinsa ketegal Iya,

³⁰ laban diatu kita sama enggau aku bebendar ngereja pengawa, pengawa ti udah dipeda kita kereja aku, lalu agi mengkang dikereja aku diatu, munyi ti didinga kita.