Read Iban Pilipi 2 Bible Online

Pilipi 2 - Iban bible

Pilipi 2

¹ Nya alai enti kita berasai diperansang laban kita begempung enggau Kristus, enti kita berasai lantang laban pengerindu Iya, enti kita bisi kaul enggau Roh Kudus, enti kita nelap sereta siru enggau pangan diri,

²awakka kita ngenyukupka pengaga ati aku: awakka kita sama sepenemu, rinduka pangan diri, besetuju sereta sebaka runding enggau pangan diri.

³ Anang ngereja utai semina berundingka diri empu aja, tauka beduduk ba ati ti deka ngenyumbungka diri, tang enggau ati ti baruh, seruran ngumbai orang bukai pama agi ari kita.

⁴Anang semina berundingka diri empu aja, tang berunding mega ke orang bukai.

⁵ Gaga runding kita sebaka enggau runding Jesus Kristus:

⁶Taja pen Iya endang Allah Taala tang Iya enda ngumbai diri sebaka enggau Allah Taala,

⁷tang Iya ngelengkaka semua nya, lalu ngaga Diri nyadi ulun, ada ngena gamal mensia.

⁸Iya ngemaruhka Diri, lalu ngasi nyentuk ke mati, indah mati ba kayu regang.

⁹ Nya alai Allah Taala udah ngangkatka Iya tinggi lalu meri Iya nama ti ari atas semua nama,

¹⁰ ngambika lebuh nama Jesus disebut, semua utai di serega, di dunya enggau di dunya ti di baruh, besugang magang,

¹¹lalu semua dilah deka ngaku Jesus nya Tuhan, ke mulia Allah Taala ti Apai.

¹²Nya alai, menyadi ke dikerinduka aku, baka kita ke udah seruran ngasika aku, ukai semina lebuh aku begulai enggau kita, tang kelebih agi lebuh aku enda begulai enggau kita, awakka kita bekereja enggau ati ti nangi sereta getar-getar ngenyukupka pengelepas kita;

¹³ laban Allah Taala ke bekereja dalam kita ti ngasuh kita deka sereta ulih ngereja utai ti ngerinduka ati Iya.

¹⁴Anang mutap tauka bekelikuh lebuh kita ngereja semua utai,

¹⁵ ngambika kita nyadi anak Allah Taala ke nadai bepenyalah, tuchi, nadai penimpang, lebuh kita diau begulai enggau orang ke jai sereta bedosa, ke alai kita manchar baka bintang di dunya tu.

¹⁶Enti kita bepegai teguh ba jaku ti meri pengidup, nya baru aku, lebuh Hari Kristus, tau temegahka diri ke enda lebu ngapa gawa.

¹⁷Tang enti sema darah aku dituang kena ngenselan piring pengarap kita, ati aku gaga lalu sama rami gaga ati enggau semua kita,

¹⁸baka kita ke gaga lalu sama rami gaga ati enggau aku.

¹⁹Enti Tuhan nulung, aku ngarapka diri ulih ngasuh Timoti nemuai ngagai kita enda lama da agi, ngambika ati aku lantang lebuh aku ninga berita pasal kita.

²⁰Aku nadai orang bukai ke baka iya, ke deka balat ibuhka pengelantang kita.

²¹Semua orang bukai semina berundingka pekara diri empu aja, ukai berundingka pekara Jesus Kristus.

²²Tang kita nemu pemesai guna Timoti ba aku, pasal iya ke sama bekereja enggau aku nusui Berita Manah, baka anak ke nulung apai.

²³Nya alai aku ngarapka diri ulih ngasuh iya nemuai ngagai kita, sepengelengkas aku nemu gaya pengidup aku ditu;

²⁴lalu aku ngarapka Tuhan deka mega ngasuh aku empu nemuai ngagai kita enda lama da agi.

²⁵Tang aku ngira diri patut ngirumka ngagai kita menyadi aku Epaproditus, ke sama gawa enggau aku, sereta sama nyadi soldadu enggau aku, ke nyadi seruan kita nulung aku,

²⁶laban iya lelengauka semua bala kita, lalu udah irau ati laban iya nemu kita udah ninga pasal iya ke enda dapat.

²⁷Iya endang amat udah sakit, lalu nyau deka mati. Tang Allah Taala udah kasihka iya, ukai semina kasihka iya, tang kasihka aku mega, enggai ke ati aku kelalu tusah.

²⁸Nya alai aku balat agi keran deka ngasuh iya nemuai ngagai kita, ngambika kita rami gaga betemu enggau iya baru, sereta ngambika aku kurang agi irau.

²⁹Nya alai, sambut meh iya dalam Tuhan enggau ati ti gaga. Lalu beri meh basa ngagai semua orang ke baka nya,

³⁰laban iya nyau ka mati bekereja ke Kristus, berambunka nyawa ngarika kita nembuka pengawa kita ba aku.