Read Iban Pilipi 4 Bible Online

Pilipi 4 - Iban bible

Pilipi 4

¹Nya alai, menyadi ke dikerindu sereta dikelengauka aku, ke nyadika pengaga enggau makota aku, bediri tegap dalam Tuhan, menyadi.

²Aku minta Eudia, lalu aku minta Sintike besetuju enggau pangan diri dalam Tuhan.

³ Lalu aku minta nuan, pangan aku ke taluk,[6] nulung sida indu tu, laban sida udah bebendar enggau aku nusui Berita Manah, sama enggau Klemen, enggau semua sida bukai ke sama bekereja enggau aku, ke bisi nama dalam bup pengidup.

⁴Seruran gaga ati dalam Tuhan. Aku nandu nya baru: awakka kita gaga ati!

⁵Awakka semua orang nemu penyiru kita. Tuhan nyau semak.

⁶ Anang irauka utai, tang dalam semua utai, bantaika semua peminta kita ngagai Allah Taala ngena sampi, sampi peminta, enggau sampi terima kasih.

⁷Lalu pemaik Allah Taala, ti ngelui peragam mensia, deka nyaga ati enggau runding kita dalam Jesus Kristus.

⁸Ke pengujung iya, menyadi, perundingka utai ti bendar, ti manah, ti lurus, ti tuchi, ti badas, ti nelap, ti pemadu menyana, ti tau dipuji.

⁹Kereja semua utai ti udah dipelajar, udah diterima, udah didinga, udah dipeda kita kereja aku; lalu Allah Taala ti meri pemaik deka meruan enggau kita.

¹⁰ Ati aku balat gaga dalam Tuhan, laban kita diatu nyau nemu ibuhka aku baru. Iya ti bendar, kita endang amat nemu ibuhka aku suba, tang kita nadai peluang alai kita ngayanka nya.

¹¹Ukai reti nya aku beserabanaka penyuntuk diri, laban aku udah belajar nemu puas ati, nemuka aku suntuk tauka enda.

¹²Aku nemu reti asai suntuk, lalu aku mega nemu reti asai mayuh utai. Dalam semua utai, aku udah nemu chara ti resia kena aku napi maya aku kenyang tauka lapar, maya aku mayuh utai tauka suntuk.

¹³ Aku ulih ngereja semua utai ulih Iya ke meri aku pengering.

¹⁴Tang manah amat kita udah nulung aku lebuh aku dituntung penusah.

¹⁵ Kita orang Pilipi endang nemu, lebuh aku baru belabuh nusui Berita Manah suba, lebuh aku angkat ari menua Masedonia, nadai eklisia deka nulung aku, kelimpah ari kita;

¹⁶ laban indah lebuh aku di Tesalonika deh kita suah ngirumka tulung ngagai aku.

¹⁷Ukai reti nya aku minta pemeri nya, tang aku deka meda penguntung kita ditambahka ngagai akaun kita.

¹⁸ Aku udah nerima semua bayar, lebih ari chukup! Aku puas ati, laban aku udah nerima ari Epaproditus pemeri ti dikirumka kita ngagai aku, piring ti bebau rengut, piring ti diterima sereta dikerinduka Allah Taala.

¹⁹Lalu Allah Taala aku, deka meri semua utai ti dipeguna kita, nitihka pengaya mulia Iya dalam Jesus Kristus.

²⁰Beri meh mulia ngagai Allah Taala enggau Apai kitai belama-lama iya! Amin.

²¹Beri tabi basa ngagai genap iku nembiak Tuhan. Bala menyadi ke begulai enggau aku ditu, bela ngirumka tabi basa ngagai kita.

²²Semua nembiak Tuhan bela ngirumka tabi basa ngagai kita, kelebih agi sida ke dalam istana Raja Besai.

²³ Awakka pengasih Tuhan Jesus Kristus meruan enggau kita semua. Amin.