Read Iban Kolosi 1 Bible Online

Kolosi 1 - Iban bible

Kolosi 1

¹Surat ari Paul, rasul Jesus Kristus ulih peneka Allah Taala, enggau ari menyadi kitai Timoti,

²Ngagai bala nembiak Tuhan enggau ngagai menyadi lelaki enggau menyadi indu kitai ke tetap ati ngagai Kristus di Kolosi: Awakka Allah Taala ti Apai kitai meri kita berekat enggau pemaik.

³Kami seruran meri terima kasih ngagai Allah Taala ti Apai Jesus Kristus Tuhan kitai, lebuh kami besampika kita,

⁴laban kami bisi ninga pasal pengarap kita ke Jesus Kristus, enggau pasal pengerindu kita ke semua nembiak Tuhan,

⁵ketegal pengadang ti disedia ke kita di serega. Kita udah ninga pasal pengadang tu suba dalam pesan ti bendar, iya nya Berita Manah

⁶ti udah datai ba kita. Baka iya ti bebuah sereta ngerembai di serata dunya, baka nya mega Berita Manah nya udah bebuah ba bala kita kenyau ari maya kita ke terubah ninga iya lalu belabuh meretika semua pemendar pasal pengasih Allah Taala.

⁷ Kita udah nemu pasal pengasih nya ari Epapras, orang ke sama bekereja enggau kami, ke dikerinduka kami. Epapras nya orang ke tetap ati bekereja ke Kristus ngarika kita,[1]

⁸lalu iya udah madah ngagai kami pasal pengerindu kita dalam Roh Kudus.

⁹ Nya kebuah, kenyau ari maya kami ninga nya, kami enda ngetu besampika kita, minta kita dipenuhka enggau penemu pasal peneka Allah Taala, sereta enggau semua penemu-dalam enggau pemereti ti datai ari Roh Kudus,

¹⁰ngambika kita idup nitihka jalai Tuhan, ngerinduka ati Iya lebuh kita bebuah ngereja semua pengawa ti manah, sereta mansang dalam penemu pasal Allah Taala.

¹¹Awakka kita digaga nyadi kering ulih semua pengering ti datai ari kuasa Iya ti bemulia, lalu awakka kita sedia tan natka semua pemerinsa enggau ati ti liat, lebuh kita, enggau ati ti gaga

¹²meri terima kasih ngagai Apai, ke udah ngasuh kami[2] bekunsika pesaka nembiak Tuhan ke diau dalam penampak.

¹³ Iya udah ngelepaska kitai ari kuasa pemetang, lalu mindahka kitai ngagai Perintah Anak ke dikerinduka Iya,

¹⁴ ke udah nebus kitai, reti nya, udah ngampun dosa kitai.[3]

¹⁵ Kristus nya meh gamal Allah Taala ti enda ulih dipeda. Iya Anak ke terubah diadaka ari atas semua utai ti digaga,

¹⁶laban semua utai ti di serega enggau di dunya udah digaga ulih Kristus,[4] utai ti ulih dipeda enggau ti enda ulih dipeda, nemuka utai nya kerusi diraja, tauka kuasa, tauka perintah, tauka pemerintah -- semua utai nya udah digaga ulih Kristus,[5] ke Kristus.

¹⁷ Kristus endang udah bisi dulu ari semua utai, lalu semua utai begempung dalam Iya.

¹⁸ Kristus nyadi kepala ke tubuh, iya nya eklisia. Kristus nyadika pun, Anak ke terubah diangkatka ari mati, ngambika Iya ari atas semua.

¹⁹Laban semua personaliti Allah Taala udah gaga diau dalam Kristus,

²⁰ lalu ulih Kristus, Allah Taala udah gaga ati mai semua utai bebaik enggau Allah Taala Empu, nemuka di dunya tauka di serega, ulih darah Kristus ti dituang ba kayu regang.

²¹Lalu kita, ke udah beserara ari Allah Taala, lalu udah bemunsuh enggau Iya dalam ati kita, lalu udah ngereja penyai,

²²diatu udah dibai Kristus bebaik enggau Allah Taala ngena tubuh Kristus Empu, ulih pemati Iya, ngambika Iya nyerahka kita kudus, nadai bepenyalah, nadai jalai mantah, ngagai Allah Taala,

²³asal ga kita majak tegap sereta tan dalam pengarap, enda bekinsit ari pengadang ti disemaya Berita Manah ti udah didinga kita, ti udah ditusui ngagai semua orang di baruh langit.[6] Aku udah nyadi ulun Berita Manah nya.

²⁴Diatu aku gaga ati natka pemerinsa, ke penguntung kita, lalu dalam tubuh aku empu, aku ngenyukupka pemerinsa ti enda ditatka Kristus, ke penguntung eklisia, iya nya tubuh Iya.

²⁵ Aku udah diasuh Allah Taala bekereja ke eklisia, ngereja pengawa ti udah diberi Iya ngagai aku ke penguntung kita, ngambika jaku Allah Taala ditemu magang,

²⁶ iya nya misteri ti udah dilalaika Allah Taala ari semua serak[7] sejeman-jeman tu, tang diatu dipandangka ngagai nembiak Iya.

²⁷Allah Taala udah mandangka nya laban Iya dekaka kita orang bansa bukai nemu pemesai pengaya enggau mulia misteri nya, iya nya Kristus ke diau dalam kita, ke alai kita manggaika pengadang kita deka sama enggau bempu mulia Allah Taala.

²⁸Kristus nya ke ditusui kami, lalu kami meri jaku tangkan sereta ngajar genap iku orang ngena semua penemu-dalam, ngambika kami ulih nyerahka genap iku sida chukup badas[8] dalam Kristus.

²⁹Nya meh kebuah aku bebendar bekereja ngena semua pengering kuasa ti diberi Iya ngagai aku.