Read Iban Kolosi 2 Bible Online

Kolosi 2 - Iban bible

Kolosi 2

¹Laban aku dekaka kita nemu pemendar aku bekereja ke kita, enggau ke sida ke di Laudisia, enggau ke semua orang ke enda kala betemu betunga mua enggau aku.

²Aku dekaka ati sida diperansang sereta begempung dalam pengerindu, ngambika sida meretika semua utai, lalu nemu misteri Allah Taala, iya nya Kristus Empu,[9]

³ ke alai semua penemu-dalam enggau penemu dilalaika.

⁴Aku nyebut tu ngambika orang enda ulih nipu kita ngena kelakar ti manah didinga.

⁵Laban taja pen aku enda begulai enggau kita batang tubuh, tang aku begulai enggau kita dalam roh,[10] lalu aku gaga meda kita seati sereta tegap dalam pengarap kita ke Kristus.

⁶Nyadi laban kita udah nerima Jesus Kristus nyadika Tuhan kita, awakka kita majak idup dalam Iya,

⁷beurat sereta mansang dalam Iya, lalu nyadi tegap dalam pengarap, nitihka ajar ti udah diberi ngagai kita, lalu seruran meri terima kasih.

⁸Anang nejuka orang nipu kita ngena penemu enggau kelakar ti nadai reti, ti datai ari ajar mensia, ti datai ari ajar bala roh ti merintah di langit enggau di dunya tu, ukai ari Kristus.

⁹Laban semua personaliti Allah Taala endang diau dalam tubuh Kristus,

¹⁰ lalu kita udah diberi pengidup enggau penuh dalam Kristus ke ari atas semua pemerintah enggau kuasa.

¹¹Dalam Kristus mega kita udah ditutus ngena chara roh, lebuh Iya ngelepaska kita ari ulah ti bedosa, ukai ditutus jari mensia tang, tang ditutus Kristus,

¹² lebuh kita dikuburka sama enggau Iya lebuh kita dibaptisa, lalu kita mega diangkatka ari mati sama enggau Iya ulih pengarap kita ke kuasa Allah Taala ti ngangkatka Iya ari mati.

¹³ Lebuh kita agi mati dalam dosa, lalu kita apin ditutus ari dosa kita, Allah Taala ngidupka kita sama enggau Kristus, lebuh Iya ngampun kitai ari semua dosa kitai,

¹⁴ lebuh Iya muai semua adat ti ditulis enggau atur ti ngelaban kitai. Iya muai semua utai nya, lebuh Iya mantangka sida ba kayu regang.

¹⁵ Iya ngerampas semua senyata ari perintah enggau kuasa, lalu mandangka sida ngagai orang mayuh, kena Iya ngayanka Diri udah menang ngelaban sida ngena kayu regang.

¹⁶ Nya alai anang nejuka orang ngakim kita pasal utai ti diempa tauka diirup kita, tauka pasal hari ti kudus, tauka pasal Gawai Anak Bulan, tauka pasal hari Sabat.

¹⁷ Semua utai nya semina ayuk utai ti deka datai, tang utai ti bendar diempu Kristus.

¹⁸Anang nejuka orang ngumbai kita enda chukup badas. Sida nya orang ke pura-pura baruh ati lalu besembahka melikat. Sida bejakuka pasal genera, ngerigangka diri enggau nadai kebuah ngena runding mensia.

¹⁹ Sida enda bepegai teguh ba Kristus,[11] ke nupi sereta bejantilka semua perengka tubuh nya ngena urat enggau rakat, lalu ngasuh tubuh nya mansang besai nitihka peneka Allah Taala.

²⁰ Enti kita udah mati enggau Kristus, lalu udah dilepaska ari roh ke merintah di langit enggau di dunya, nama kebuah kita diau baka ke agi diempu dunya? Nama kebuah kita nunduk ngagai adat baka

²¹“Anang megai nya, Anang ensepi nya, Anang negu nya”?

²² Semua adat nya bejakuka pasal utai ti nemu abis lebuh sida udah dikena, laban utai nya semina adat enggau ajar mensia.

²³Adat nya baka ke beduduk ba penemu-dalam, ngasuh orang pura-pura ngayanka diri kudus, ngayanka diri baka ke baruh ati, merinsaka tubuh diri, tang utai nya nadai guna kena nagang pengingin tubuh.