Read Iban Kolosi 3 Bible Online

Kolosi 3 - Iban bible

Kolosi 3

¹ Nya alai enti kita udah diangkatka idup baru enggau Kristus, tumpuka ati kita ngagai utai ti di serega, alai Kristus ke duduk muak ari kanan Allah Taala.

²Berundingka utai serega, ukai berundingka utai dunya,

³laban kita udah mati, lalu pengidup kita diatu dilalaika enggau Kristus dalam Allah Taala.

⁴Lebuh Kristus, ke nyadi pengidup kitai, pegari, kita deka mega pegari enggau Iya dalam mulia!

⁵Nya alai bunuh semua pengingin dunya ti dalam kita, baka: pengawa bambai, ulah ti kamah, runding ti kamah, pengingin ti jai, enggau pengamu (reti nya nyembah engkeramba).

⁶Nya utai ti nyungkak Allah Taala ringat ngagai orang ke enda ngasi.[12]

⁷Nya meh gaya pengidup kita suba, lebuh kita agi nitihka pengingin dunya.

⁸Tang diatu buai semua utai nya ari kita, baka: pengeringat, ati ti ngeransi, ati ti bedendam, ati ti seruran deka bejakuka orang, enggau jaku ti kamah.

⁹ Anang bulaka pangan diri, laban kita udah ngelengkaka pengidup ti lama, enggau semua pengawa iya,

¹⁰ lalu udah nyadi mensia ti baru, ke majak diubah nyadi baru belama dalam penemu neladan gamal Allah Taala Empu.

¹¹Dalam pengidup ti baru tu sigi nadai bida entara orang bansa bukai enggau orang Judah, entara orang ke udah ditutus enggau orang ke enda ditutus, entara orang ke enda beradat[13] enggau orang ke semina pama mimit ari jelu,[14] entara orang ke ulun enggau orang ke ukai ulun, tang Kristus nyadi semua, dalam semua!

¹² Nya alai, laban kita udah dipilih Allah Taala nyadi orang ke kudus sereta dikerinduka Iya, rasukka penyiru, penelap, ati ti baruh, ati ti nemu nunduk ngagai pangan diri, enggau ati ti liat.

¹³ Sabar enggau pangan diri, lalu ampun pangan diri enti kita bisi enda nyamai ati ngagai pangan diri. Baka Tuhan ke udah ngampun kita, baka nya mega kita ngampun pangan diri.

¹⁴Lebih ari semua, rasukka pengerindu kena ngempung semua utai nyadi siti.

¹⁵Lalu awakka pemaik Kristus merintah dalam ati kita, laban semua kita udah dikangauka ngagai pemaik nya dalam siti tubuh. Lalu seruran beterima kasih.

¹⁶ Awakka semua jaku Kristus diau dalam kita. Ajar lalu rara pangan diri ngena semua penemu-dalam, lalu belagu ngena masmur, pantun, enggau ngena lagu Roh ngagai Allah Taala, enggau ati ti beterima kasih.

¹⁷Dalam semua utai ti dikereja kita, nemuka ngena jaku tauka ngena pengawa, kereja semua utai nya dalam nama Tuhan Jesus, meri terima kasih ngagai Allah Taala dalam nama Iya.

¹⁸ Kita ke bini, nunduk ngagai laki kita, laban nya endang patut dikereja kita dalam Tuhan.

¹⁹ Kita ke laki, rinduka bini kita, lalu anang kasar enggau sida.

²⁰ Kita ke anak, ngasika apai indai kita dalam semua utai, laban nya ngerinduka ati Tuhan.

²¹ Kita ke apai, anang ngereja utai ti tau ngasuh anak kita ringat, enggai ke sida alah semengat.

²² Kita ke ulun, ngasika tuan kita dalam semua utai, ukai semina lebuh sida meda kita ketegal kita minta diri dikerinduka sida, tang enggau pengabis ati kita laban kita nangika Tuhan.

²³ Kereja semua utai enggau pengabis ati kita, baka ke bekereja ke Tuhan, ukai ke mensia,

²⁴laban kita nemu, kita deka nerima ari Tuhan pesaka nyadika upah kita, laban kita bekereja ke Tuhan Jesus Kristus.

²⁵ Laban orang ke ngereja penyalah deka diupah nitihka penyalah ti dikereja iya, lalu Tuhan enda bepilih mata.