Read Iban Kolosi 4 Bible Online

Kolosi 4 - Iban bible

Kolosi 4

¹ Kita ke tuan, intu ulun kita enggau badas sereta lurus, laban kita empu nemu kita bisi mega Tuan di serega,

² Seruran majak besampi. Lebuh kita besampi, seruran bejaga sereta besampi terima kasih.

³Besampi mega ke kami, minta Allah Taala muka pintu ngambika kami ulih nusui misteri Kristus. Nya pengawa ti ngasuh aku kena tutup.

⁴Besampi ke aku, ngambika aku ulih nerangka misteri nya, baka ti patut dikereja aku.

⁵ Kita enda tau enda pintar lebuh kita begulai enggau orang ke ukai orang Kristian, ngena semua peluang kita.

⁶ Awakka jaku kita seruran badas sereta ngenyamaika ati orang, ngambika kita nemu jalai kita patut nyaut semua orang.

⁷ Taikikus deka madahka semua berita pasal aku ngagai kita. Iya tu menyadi ke dikerinduka kami, ke tetap ati enggau kami bekereja ke Tuhan.

⁸Aku udah ngasuh iya nemuai ngagai kita ketegal tuju tu aja, iya nya, ngambika kita nemu berita pasal kami, sereta ngambika iya meransang kita.

⁹ Iya deka datai sama enggau Onisimus, menyadi ke tetap ati, ke dikerinduka kitai, ke ari raban kita empu. Seduai iya deka madah ngagai kita semua utai ti nyadi ditu.

¹⁰ Aristarkus, ke ditutup dalam rumah jil sama enggau aku, ngirumka tabi basa ngagai kita, lalu baka nya mega Mark, petunggal Barnabas. (Kita udah nerima atur pasal iya; enti iya datai, sambut meh iya.)

¹¹Jesus, ke dikumbai Justus, mega ngirumka tabi basa. Ka semina sida tiga tu aja orang Judah ke arap, ke bekereja enggau aku ke Perintah Allah Taala, lalu sida tiga tu udah ngelantangka ati aku.

¹² Epaphras, iya nya siku raban kita empu, ke nyadi ulun[15] Jesus Kristus, ngirumka tabi basa. Iya seruran bebendar amat besampika kita, ngambika kita nyadi orang ke besai tuai dalam pengarap, lalu nemu semua peneka Allah Taala.

¹³Laban aku besaksi madahka iya udah bebendar amat bekereja ke kita, enggau ke sida ke di Laudisia, enggau di Hierapolis.

¹⁴ Luke, lutur ke dikesayauka kitai, enggau Demas ngirumka tabi basa ngagai kita.

¹⁵Beri tabi basa ari aku ngagai bala menyadi[16] ke di Laudisia, kelebih agi ngagai Nympa, enggau ngagai raban eklisia ke begempuru dalam rumah iya.

¹⁶Lalu lebuh surat tu udah dibacha di mua bala kita, awakka iya mega dibacha dalam eklisia di Laudisia. Lalu kita patut mega macha surat ari Laudisia.

¹⁷ Lalu sebut ngagai Arkipus, “Nuan enda tau enda nembuka pengawa ti udah diterima nuan dalam Tuhan.”

¹⁸ Aku, Paul, ke nulis leka jaku tu: Tabi ari Paul. Kingatka aku ke ditanchang ngena rantai! Awakka Allah Taala merekatka kita.