Read Iban 1 Tesalonika 2 Bible Online

1 Tesalonika 2 - Iban bible

1 Tesalonika 2

¹Kita empu nemu, menyadi, kami enda lebu udah nemuai ngagai kita suba,

² tang taja pen kami udah balat diperinsa sereta dikeduan di Pilipi, baka ke ditemu kita, kami udah diberi Allah Taala pemerani nusui Berita Manah Allah Taala, taja pen mayuh orang nyakal kami.

³Laban ajar kami ukai datai ari ati ti ngelakar, tauka ari juluk ati ti enda tuchi, tauka ari ati ti deka nipu,

⁴tang laban kami udah dikemendarka lalu diasuh Allah Taala nusui Berita Manah, nya alai kami bejaku, ukai deka ngerinduka ati mensia, tang deka ngerinduka ati Allah Taala ke nguji ati kami.

⁵ Kita empu nemu, lalu Allah Taala Empu nyadika saksi kami, kami nadai kala ngena jaku kelangkung, tauka ngena jaku ti ngelalaika pengamu;

⁶ lalu kami pen ukai mega minta puji ari mensia, nemuka ari kita tauka ari orang bukai,

⁷ taja pen kami nyangka patut minta sebarang utai ari kita laban kami tu rasul Kristus. Tang kami nelap lebuh kami begulai enggau kita, baka indai ke siru enggau anak diri.

⁸ Kami balat rinduka kita datai ke kami sedia deka bekunsi enggau kita, ukai semina Berita Manah ari Allah Taala, tang mega nyawa kami empu, laban kami balat sayauka kita.

⁹Kita, menyadi, tentu ingatka pemendar kami gawa. Kami gawa siang malam, ngambika kami enda nating kita lebuh kami nusui Berita Manah Allah Taala ngagai kita.

¹⁰Kita empu meda lalu Allah Taala mega meda ulah kami endang tuchi, betul, sereta nadai salah, lebuh kami begulai enggau kita.

¹¹ Kita empu nemu, kami ngintu kita baka apai ke ngintu anak diri,

¹² ngansak, meransang sereta mujuk kita idup ngemuliaka Allah Taala, ke udah ngangauka kita ngagai perintah enggau ngagai mulia Iya Empu.

¹³ Lalu kami mega seruran meri terima kasih ngagai Allah Taala ke nya, ngambika lebuh kita nerima jaku Allah Taala ti didinga kita ari kami suba, kita nerima iya ukai baka ke nerima jaku mensia, tang nerima jaku Allah Taala, laban iya endang amat jaku Allah Taala, ti bekereja dalam kita ke arap.

¹⁴ Laban kita, menyadi, nunda teladan eklisia Allah Taala dalam Jesus Kristus ti di Judea, laban kita empu natka diri diperinsaka bansa kita empu, baka sida di Judea ke diperinsaka orang Judah,

¹⁵ ke udah munuh Tuhan Jesus enggau sida nabi, lalu muru kami. Sida ngasuh Allah Taala enda lantang ati, sereta ngelaban semua orang

¹⁶ laban sida nagang kami madah ngagai orang bansa bukai Berita Manah ti ulih nyelamatka sida. Nya alai, baka selama, sida endang seruran ngisi diri penuh enggau dosa. Tang diatu Allah Taala udah ringat ngagai sida!

¹⁷ Menyadi, lebuh kami nadai begulai enggau kita batang tubuh enda lama, kami balat lelengauka kita lalu gagit ati deka betemu betunga mua enggau kita.

¹⁸Laban kami endang amat deka nemuai ngagai kita. Aku, Paul, endang enda ngetu-ngetu nguji nemuai ngagai kita, tang Sitan nagang kami.

¹⁹ Laban nama pengadang kami, tauka pengaga kami, tauka utai ti tau dikemegahka kami di mua Tuhan Jesus, enti ukai kita, lebuh Iya datai baru?

²⁰ Iya ti bendar, kita nyadi nyadika mulia enggau pengaga kami.