Read Iban 1 Tesalonika 3 Bible Online

1 Tesalonika 3 - Iban bible

1 Tesalonika 3

¹ Nya alai lebuh kami nyau enda ulih natka diri agi, kami lalu mutuska runding ninggalka diri di Atens.

² Kami lalu ngasuh Timoti, menyadi kitai, ke bekereja ke Allah Taala sama enggau kami ngerembaika Berita Manah pasal Kristus, ngambika iya ngeringka sereta meransang kita dalam pengarap,

³ ngambika nadai siku kita beguyat lebuh kita kena perinsa. Kita empu nemu, pemerinsa nya endang ungkup kitai.

⁴ Laban lebuh kami begulai enggau kita, kami bisi madah, sebedau utai nya nyadi, kitai sigi deka kena perinsa. Diatu kita nemu utai nya udah nyadi.

⁵ Nya meh kebuah, lebuh aku nyau enda ulih natka diri agi, aku lalu ngasuh Timoti nemuai ngagai kita ngambika aku nemu pasal pengarap kita, laban aku irau enggai ke Sitan nguji kita, lalu ngelebuka pengawa kami.

⁶ Tang diatu Timoti baru udah pulai kitu ari kita, lalu udah mai berita ti manah pasal pengarap enggau pengerindu kita. Iya madahka pasal kita ke udah manah amat seruran ngingatka kami sereta lelengauka kami, baka kami ke lelengauka kita.

⁷Nya meh kebuah, menyadi, dalam semua penusah enggau pemerinsa kami, kami berasai diperansang ulih kita ketegal pengarap kita.

⁸Laban diatu kami idup, enti kita majak bediri tegap dalam Tuhan.

⁹Baka ni ku kami ulih meri terima kasih ti chukup ngagai Allah Taala, ke semua pengaga ti diasaika kami di mua Allah Taala ketegal kita?

¹⁰Siang malam kami enggau naka pemendar besampi minta diri betemu enggau kita mua mata, lalu meri ngagai kita utai ti agi bisi kurang dalam pengarap kita.

¹¹Nya alai diatu awakka Allah Taala ti Apai kitai, enggau Jesus Kristus Tuhan kitai, nujuka pejalai kami ngagai kita.

¹²Lalu awakka Tuhan ngasuh kita majak balat agi rinduka pangan diri, enggau rinduka semua orang, baka kami ke balat rinduka kita.

¹³ Lalu awakka Iya ngeringka ati kita kudus sereta nadai bepenyalah di mua Allah Taala ti Apai kitai, lebuh Tuhan Jesus datai, sama enggau semua nembiak Iya ti kudus.