Read Iban 1 Tesalonika 4 Bible Online

1 Tesalonika 4 - Iban bible

1 Tesalonika 4

¹Ke pengujung iya, menyadi, kami minta lalu meransang kita dalam Tuhan, baka kita ke udah belajar ari kami jalai kita patut idup, lalu ngerinduka ati Allah Taala, baka ke dikereja kita diatu, awakka kita majak ngereja lebih agi ari nya.

²Laban kita nemu ajar ti udah diberi kami ngagai kita di baruh kuasa Tuhan Jesus.

³ Laban tu peneka Allah Taala ke kita, ngambika kita dikuduska: badu agi bambai;

⁴ kita patut nemu nagang pengingin tubuh diri[2] ngena jalai ti kudus sereta menyana,

⁵ukai ngembuan pengingin ti kamah baka orang bansa bukai ke enda nemu Allah Taala;

⁶ngambika nadai siku kita ngereja utai ti salah tauka ngambi ulih ba pangan diri,[3] laban Tuhan deka malas orang ke ngereja nya, munyi ti udah dipadahka kami ngagai kita kena kami nangkan kita.

⁷Laban Allah Taala ukai ngangauka kitai ngagai pengidup ti kamah, tang ngagai pengidup ti kudus.

⁸Nya alai, barang sapa nulak ajar tu, ukai nulak ajar mensia, tang nulak ajar Allah Taala, ke meri Roh Kudus Iya ngagai kita.

⁹Pasal pengerindu ke pangan ke sama pengarap, kita enda ibuh begunaka orang nuliska nya ngagai kita, laban kita empu udah diajar Allah Taala, ngasuh kita rinduka pangan diri;

¹⁰lalu kita endang amat rinduka semua menyadi di serata menua Masedonia. Tang kami meransang kita, menyadi, ngasuh kita majak ngereja lebih agi ari nya,

¹¹ ngasuh kita likun ulah, ngereja pengawa diri, lalu bekereja ngena jari kita empu munyi ti diasuh kami;

¹²ngambika kita manah ulah lebuh kita begulai enggau[4] orang ke ukai Kristian, lalu enda bepanggai ba orang.

¹³ Tang kami enggai ke kita enda nemu, menyadi, pasal orang ke udah mati,[5] ngambika kita enda tusah ati baka orang ke nadai pengadang.

¹⁴ Laban kitai arapka Jesus udah mati, lalu udah angkat idup baru, nya alai, ulih Jesus, Allah Taala deka mai enggau Iya orang ke udah mati.[6]

¹⁵ Laban tu utai ti dipadahka kami ngagai kita ari jaku Tuhan Empu, iya nya, kitai ke idup, ke agi tinggal di dunya tu nyentuk ngagai maya penatai Tuhan, enda mupuk dulu ari orang ke udah mati.[7]

¹⁶ Laban Tuhan Empu deka nurun ari serega enggau nyawa ti inggar, enggau nyawa tuai melikat, enggau munyi terumpit Allah Taala. Lalu orang ke mati, ke udah arapka Tuhan, deka angkat dulu.

¹⁷Udah nya baru kitai ke agi idup, ke agi tinggal, deka digempuruka sama enggau sida dalam remang lalu betemu enggau Tuhan di langit, lalu kitai deka diau begulai enggau Tuhan belama iya.

¹⁸Nya alai peransang pangan diri ngena jaku tu.