Read Iban 1 Tesalonika 5 Bible Online

1 Tesalonika 5 - Iban bible

1 Tesalonika 5

¹Tang ba pasal maya enggau musin, menyadi, kami enda ibuh nuliska pasal nya ngagai kita.

² Laban kita empu nemu, Hari Tuhan deka datai baka penchuri ke datai lebuh malam hari.

³ Lebuh orang nyebut, “Kitai bisi pemaik sereta likun,” pengerusak deka ngenyit ninggang sida, baka indu ke radai deka beranak, lalu sida nadai jalai ngerarika diri.

⁴ Tang kita, menyadi, ukai diau dalam pemetang lalu kita enda patut tekenyit lebuh Hari nya datai baka penchuri,

⁵ laban semua kita endang anak penampak, anak siang hari. Kitai tu ukai anak malam hari tauka anak pemetang.

⁶ Nya alai, anang kitai tinduk baka orang bukai, tang awakka kitai seruran dani sereta sedia belama;

⁷ laban orang ke tinduk, tinduk lebuh malam hari, lalu orang ke mabuk, mabuk lebuh malam hari.

⁸ Tang laban kitai tu anak siang hari, kitai patut nemu nagang diri, lalu ngerasukka pengarap enggau pengerindu nyadika terabai dada kitai, enggau pengadang kitai ke pengelepas nyadika selapuk kebal kitai.

⁹ Laban Allah Taala ukai milih kitai ngambika kitai ditinggang pengeringat, tang ngambika kitai bulih pengelepas ulih Tuhan kitai Jesus Kristus

¹⁰ke udah mati ke kitai, ngambika, nemuka kitai dani tauka tinduk, kitai tau idup begulai enggau Iya.

¹¹Nya alai peransang sereta tulung sukung pangan diri, baka ke dikereja kita diatu.

¹² Tang, menyadi, kami minta kita bebasaka orang ke bekereja ba bala kita, ke nyadi tuai kita dalam Tuhan sereta meri jaku tangkan ngagai kita.

¹³ Beri basa enggau pengerindu ti pemadu besai ngagai sida ketegal pengawa sida. Diau bebaik enggau pangan diri.

¹⁴ Lalu kami ngasuh kita, menyadi, meri jaku tangkan ngagai orang ke ngelusu,[8] meransang orang ke takut, nulung orang ke lemi, lalu liat ati enggau semua sida.

¹⁵ Bejaga kita, anang malas penyai ngena penyai, tang seruran ngereja utai ti badas ngagai pangan diri enggau ngagai semua orang.

¹⁶ Seruran gaga ati;

¹⁷ seruran besampi;

¹⁸ beri terima kasih dalam semua utai, laban nya utai ti dikedekaka Allah Taala ari kita dalam Jesus Kristus.

¹⁹ Anang madamka Roh Kudus.

²⁰ Anang ngeleseka jaku sida nabi,[9]

²¹ tang uji[10] dulu semua utai. Bepegai teguh ba utai ti badas,

²²seliahka semua penyai.

²³Awakka Allah Taala ti meri pemaik, nguduska kita enggau penuh; lalu awakka roh enggau semengat enggau tubuh kita diintu enggau menyana sereta nadai bepenyalah lebuh Jesus Kristus Tuhan kitai datai.

²⁴Iya ke ngangauka kita, deka ngereja nya laban Iya endang tau dikarapka.

²⁵Menyadi, besampi ke kami.

²⁶ Beri tabi basa ngena pengerindu ngagai semua menyadi dalam Tuhan.

²⁷ Dalam nama Tuhan aku ngansak kita macha surat tu ngagai semua bala menyadi.

²⁸ Awakka pengasih Jesus Kristus Tuhan kitai meruan enggau kita.[11]